ANTES ka kumuha hin Biblia basi basahon, mapulsanon nga hibaroan an pipira nga impormasyon mahitungod hito. An Biblia nga tinatawag liwat nga an Baraan nga Kasuratan, koleksyon hin 66 nga libro, o seksyon, nga nagtitikang ha Genesis ngan nagtatapos ha Pahayag, o Apokalipsis.

Hin-o an awtor han Biblia? Makapainteres ito nga pakiana. Ha pagkamatuod, an Biblia o an Kasuratan iginsurat hin mga 40 nga kalalakin-an ha sulod hin mga 1,600 ka tuig. Makatirigamnan nga waray angkona hito nga mga kalalakin-an nga hira an awtor han Biblia. Usa han nagsurat an nagsiring: ‘An ngatanan nga mga Baraan nga Surat ginpakaaghat han Dios.’ (2 Timoteo 3:16) Usa pa an nagsiring: “An Espiritu ni Jehova naghimangraw pinaagi ha akon, ngan an iya pulong nakada han akon dila.” (2 Samuel 23:2) Ha sugad nga paagi, ginpabug-atan han mga nagsurat hito nga hi Jehova nga Dios, an Supremo nga Magmarando ha uniberso, amo an Awtor han Biblia. Ira iginpakita nga karuyag han Dios nga magin duok ha mga tawo.

May-ada usa pa nga butang nga importante basi masabtan an Biblia. An Biblia may-ada usa nga kabug-osan nga tema: an pagbindikar han katungod han Dios ha pagmando ha katawohan pinaagi han iya Ginhadian ha langit. Ha masunod nga mga pahina, makikita mo nga ini nga tema aada ha ngatanan nga bahin han Biblia, tikang ha Genesis tubtob ha Pahayag.

Samtang ginhuhunahuna ini, tagda yana an mensahe nga mababasa ha Biblia, an pinakapopular nga libro ha kalibotan.