HA Bukid han mga Olibo, diin mahimo makita an makaruruyag nga Jerusalem ngan an templo ha ubos hito, dinaop kan Jesus an upat han iya apostol ngan pribado nga nagpakiana mahitungod han pipira han iya ginsiring. Nagsiring pa la hiya nga an templo ha Jerusalem bubungkagon. Ngan ha usa nga panhitabo antes hito, iya ginsumatan hira mahitungod han “kataposan han kalibotan.” (Mateo 13:40, 49) Hito nga takna, an mga apostol nagpakiana: “Ano an tigaman han imo pagkanhi, ngan ha kataposan han kalibotan?”​—Mateo 24:3.

Ha baton ni Jesus, iya iginsumat an mahitatabo antes han kabungkagan han Jerusalem. Kondi diri la ito an iya iginpapasabot. An iya tagna magkakaada mas daku nga katumanan ha bug-os nga kalibotan. Igintagna niya an mga panhitabo ngan kahimtang ha kalibotan nga magigin pangirilal-an han usa nga tigaman. Ipapakita hito nga tigaman nga nagtikang na an presensya ni Jesus sugad nga Hadi ha langit. Ha iba nga pagkayakan, iginpapasabot hito nga ginhimo na ni Jehova hi Jesus nga Hadi han maiha na nga iginsaad nga Mesianiko nga Ginhadian. Ito nga tigaman nagpapasabot nga hirani na pagwad-on han Ginhadian an karaotan ngan ihatag ha katawohan an tinuod nga kamurayawan. Salit an igintagna ni Jesus nagtitigaman han kataposan nga mga adlaw han daan nga sistema​—an naeksister yana nga mga sistema ha relihiyon, politika, ngan sosiedad—ngan han tinikangan han usa nga bag-o.

Han iginsaysay ni Jesus an mahitatabo ha tuna durante han iya presensya sugad nga Hadi ha langit, nagsiring hiya nga magkakaada girra, kakulang hin pagkaon, magkusog nga linog, ngan sakit ha iba-iba nga nasud ha kalibotan. Magtitikaduro an karaotan, ngan isasangyaw han tinuod nga mga disipulo ni Jesus an Ginhadian han Dios ha bug-os nga tuna. Ini ngatanan magtatapos ha “daku nga kagol-anan” nga waray pa gud mahitabo.​—Mateo 24:21.

Paonan-o hibabaroan han mga sumurunod ni Jesus nga hirani na ito nga kagol-anan? “Tikang ha igera magtoon kamo,” siring ni Jesus. (Mateo 24:32) An pagkaada dahon ha sanga han igera makatirigamnan nga pangirilal-an nga hirani na an katpaso. Ha pariho nga paagi, an katuman han tanan nga igintagna ni Jesus ha usa ka peryodo matin-aw nga pangirilal-an nga hirani na an kataposan. Waray iba, kondi an Amay la, an maaram han eksakto nga adlaw ngan oras han pagtikang han daku nga kagol-anan. Salit, gin-aghat ni Jesus an iya mga disipulo: ‘Pag-agma kay diri kamo maaram kon san-o an panahon.’​—Markos 13:33.

​—Iginbasar ha Mateo kapitulo 24 ngan 25; Markos kapitulo 13; Lukas kapitulo 21.