MAARAM hi Jehova nga usa ka adlaw an iya hinigugma hinduro nga Anak mag-aantos ngan mamamatay. An tagna ha Genesis 3:15 diri-direkta nga nag-unabi hini. Maipapakita ba han Dios ha katawohan kon mationan-o kabirilhon an kamatayon han iya Anak? An Biblia nag-uunabi hin aktuwal nga ilustrasyon mahitungod hini. Dida hito nga ilustrasyon, ginsugo han Dios hi Abraham nga ihalad an iya hinigugma nga anak nga hi Isaak, sugad han Iya ginbuhat.

Marig-on gud an pagtoo ni Abraham. Hinumdumi nga nagsaad ha iya an Dios nga an igintagna nga Manluluwas, o Binhi, magtitikang kan Isaak. Tungod kay nasarig hiya nga babanhawon han Dios hi Isaak kon kinahanglan, sinugot hiya nga ihalad an iya anak. Kondi han bubuhaton na niya ito, ginpugngan hiya hin anghel han Dios. Gindayaw han Dios hi Abraham tungod kay waray hiya mag-alang nga ihalad an pinakapresyoso ha iya, ngan ginparig-on han Dios an Iya saad hinin matinumanon nga patriarka.

Ha urhi, nagkaada hi Isaak duha nga anak, hira Esaw ngan Jakob. Diri pariho kan Esaw, ginpabilhan ni Jakob an iya relasyon ha Dios salit ginbendisyonan hiya. Ginliwanan han Dios an ngaran ni Jakob hin Israel, ngan an iya 12 nga anak nga kalalakin-an an nanguna han mga tribo han Israel. Kondi, paonan-o ito nga pamilya nagin daku nga nasud?

Han naawa an kadam-an nga anak ni Israel ha ira manghod nga hi Jose, nagtikang an sunod-sunod nga hitabo. Ira iginbaligya hiya sugad nga uripon, ngan gindara ha Ehipto. Kondi, ginbendisyonan han Dios iton matinumanon ngan waray-kahadlok nga batan-on. Bisan pa han duro nga kakurian, ha urhi ginpili ngan gintagan hin daku nga awtoridad hi Jose ni Paraon, an magmarando ha Ehipto. Napapanahon ito tungod kay nagkaada kagutom nga nagin hinungdan nga sugoon ni Jakob an pipira han iya anak ngadto ha Ehipto basi pumalit hin pagkaon​—ngan hito nga panahon hi Jose na an nagdudumara han ngatanan nga pagkaon! Katapos han ira emosyonal nga pagkirita, ginpasaylo ni Jose an iya mabinasulon nga kabugtoan ngan ginhangyo hira nga dad-on an bug-os nga pamilya ha Ehipto. Gintagan hira hin matambok nga tuna diin padayon hira nga magdadamu ngan mag-uuswag. Nasantop ni Jose nga an Dios an nagpahinabo hito basi matuman an Iya mga saad.

An lagas na nga hi Jakob nagpabilin ha Ehipto tubtob han iya kamatay, upod han iya nagtitikadaku nga pamilya. Antes hiya mamatay, iya igintagna nga an iginsaad nga Binhi, o Manluluwas, magigin gamhanan nga Magmarando nga magtitikang ha tulin han iya anak nga hi Juda. Paglabay hin katuigan, antes mamatay hi Jose, iya igintagna nga maabot an panahon nga pahihinaboon han Dios nga makagawas an pamilya ni Jakob ha Ehipto.

​—Iginbasar ha Genesis kapitulo 20 tubtob 50; Hebreo 11:17-22.