Karuyag han Dios nga an mga tawo mabuhi ha tuna nga malipayon. Ginlarang niya an tuna ngan an ngatanan nga aada hito tungod kay hinigugma niya an mga tawo. Diri mag-iiha, magios hiya basi magin maopay an tidaraon han katawohan ha bug-os nga kalibotan. Wawad-on niya an mga hinungdan han pag-antos.​—Basaha an Jeremias 29:11.

Waray pa gobyerno nga nakagwara han kamadarahog, sakit, o kamatayon. Pero may maopay nga sumat. Hirani na saliwnan han gobyerno han Dios an tanan nga gobyerno yana. An mga sakop hito magkakaada kamurayawan ngan maopay nga kahimsog.​—Basaha an Isaias 25:8; 33:24; Daniel 2:44.

Matatapos la an pag-antos kon wad-on na han Dios an magraot nga tawo. (Sepania 2:3) San-o ito mahitatabo? Igintagna han Biblia an mga panhitabo yana nga hinungdan kon kay ano nga namimeligro an mga tawo. Ngan iginpapakita hito nga mga panhitabo nga hirani na gumios an Dios.​—Basaha an 2 Timoteo 3:​1-5.

Kinahanglan kita mahibaro mahitungod ha Dios pinaagi han iya Pulong, an Biblia. Pariho ito hin surat tikang ha mahigugmaon nga amay. Iginsusumat hito kon paonan-o kita magigin malipayon yana ngan magkakaada kinabuhi nga waray kataposan dinhi ha tuna ha tidaraon. Kondi bangin diri maruyag an iba nga mag-aram ka ha Biblia. Pero ayaw hira tuguti nga pugngan ka ha pagkaada maopay nga tidaraon.​—Basaha an Proberbios 29:25; Pahayag 14:6, 7.