An mga Kristiano hadto nagkakanta, nag-aampo, nagbabasa, ngan naghihisgot han Kasuratan ha ira mga katirok. Waray hira ginhihimo nga mga rituwal. (1 Korinto 14:26) Pariho liwat hito an amon mga katirok yana.

An igintututdo basado ha Biblia ngan praktikal. Ha Sabado o Domingo, an kada kongregasyon nagkakatirok basi mamati hin 30-minutos nga pahayag nga basado ha Biblia. Naghihisgot ini han kalabotan han Biblia ha aton kinabuhi ngan ha mga panhitabo yana. Gin-aaghat kami nga sundan an pahayag gamit an amon kalugaringon nga Biblia. Katapos hini amo an usa ka oras nga Pag-aram ha “Barantayan,” diin puydi makigbahin an mga membro han kongregasyon ha paghisgot hin usa nga artikulo han aradman nga edisyon han An Barantayan. Nabubuligan kami hini ha pag-aplikar han giya han Biblia ha amon kinabuhi. An pariho nga artikulo gin-aadman han sobra 110,000 nga kongregasyon ha bug-os nga kalibotan.

Gintututdoan kami nga magin maopay nga magturutdo. May mga katirok liwat kami ha kabutngaan han semana; may-ada ini tulo-ka-bahin. Siyahan, an 30-minutos nga Pag-aram ha Biblia han Kongregasyon. Usa ini nga pakiana-ngan-baton nga paghisgot nga nagpapahilarom han amon pagsabot ha mga prinsipyo ngan mga tagna ha Biblia. Ikaduha, an 30-minutos nga Teokratiko nga Eskwelahan ha Ministeryo nga gintitikangan ha paghisgot hin usa-ka-bahin han Biblia nga abanse nga ginbasa han membro han kongregasyon. Katapos maghahatag hin halipot nga mga presentasyon an mga estudyante nga nakalista. May-ada ini magsaragdon basi mabuligan kami nga mag-uswag ha pagbasa ngan pagyakan. (1 Timoteo 4:13) Ikatulo, an 30-minutos nga Katirok ha Pag-alagad nga may-ada pahayag, pasundayag, ngan mga interbyu, diin gintututdoan kami kon paonan-o igtututdo an Biblia ha iba.

Kon tumambong ka ha amon mga katirok, sigurado nga maruruyagan mo an kalidad han edukasyon ha Biblia nga imo makakarawat.—Isaias 54:13.

• Ano an imo malalaoman ha mga katirok han mga Saksi ni Jehova?

• Ha amon mga katirok, ano an karuyag mo matambongan?