Sugad nga hingpit nga tawo, waray maeksperyensyahi ni Jesus an damu han mga kakurian ngan kabaraka nga naeksperyensyahan han iba nga tawo. Bisan pa hito, nagpakita hiya hin hilarom nga empatiya ha mga tawo. Andam hiya magsakripisyo para ha ira, basi buhaton an labaw pa kay han ginkikinahanglan. Oo, an kalooy nagpagios ha iya nga buligan an iba. Pamalandonga an mga ehemplo nga mababasa ha Kapitulo 32, 37, 57, 99.

An mga tawo nga iba-iba an pangidaron—bata ngan lagas—nadaop kan Jesus kay waray hiya maghatag hin impresyon nga okupado hiya hinduro o nga labaw hiya. Inabat nira nga interesado ha ira hi Jesus salit komportable hira ha iya. Basi hibaroan ini, kitaa an Kapitulo 25, 27, 95.

Regular nga nadaop hi Jesus ha iya Amay pinaagi ha sinsero nga pag-ampo, kon nag-uusahan ngan kon kaupod an tinuod nga mga magsiringba. Nag-ampo hiya ha damu nga okasyon, diri la durante ha pangaon. Nag-ampo hiya basi pasalamatan an iya Amay, dayawon, ngan mangaro hin giya antes maghimo hin seryoso nga mga desisyon. Tagda an mga ehemplo nga mababasa ha Kapitulo 24, 34, 91, 122, 123.

Usahay bisan kon kinahanglan unta ni Jesus pumahuway ngan magrelaks, gin-una pa gihapon niya an iba kay ha iya kalugaringon. Diri hiya makikalugaringon. Hini liwat nga paagi, naghatag hiya hin ehemplo nga mahimo naton subaron hin maopay. Usisaha kon paonan-o ini iginpakita ha Kapitulo 19, 41, 52.

Labot la ha pagtutdo nga kinahanglan magpasaylo, iginpakita ni Jesus an pagin mapinasayloon ha pakig-upod ha iya mga disipulo ngan ha iba. Pamalandonga an mga ehemplo nga mababasa ha Kapitulo 26, 40, 64, 85, 131.

Igintagna nga isasalikway han kadam-an nga Judio an Mesias ngan papatayon hiya han iya mga kaaway. Salit puydi unta nga diri buhaton ni Jesus an iya bug-os nga mahihimo para ha mga tawo. Pero, aktibo lugod nga iya ginsuportaran an tinuod nga pagsingba. Nagpakita hiya hin susbaranan ha pagin aktibo para ha ngatanan niya nga sumurunod nga nakakaeksperyensya hin kawaray-interes o pagkontra pa ngani. Kitaa an Kapitulo 16, 72, 103.

Labaw gud hi Jesus ha diri perpekto nga mga tawo ha damu nga paagi, sugad pananglitan ha kahibaro ngan kinaadman. Tungod kay perpekto, sigurado nga may-ada hiya pisikal ngan mental nga mga abilidad nga labaw kay ha bisan hin-o. Bisan pa hito, mapainubsanon nga nagserbi hiya ha iba. May mahibabaroan ka nga leksyon mahitungod hini ha Kapitulo 10, 62, 66, 94, 116.

Hi Jesus pirme nagpapasensya ha iya mga apostol ngan ha iba kon napapakyas hira ha pagsubad ha iya o ha pag-aplikar han iya ginsiring. Mapailubon nga gin-utro niya an mga leksyon nga kinahanglan nira basi magin mas duok hira kan Jehova. Pamalandonga an mga ehemplo han pagin pasensyoso ni Jesus nga mababasa ha Kapitulo 74, 98, 118, 135.