Hinbatian na han mga tawo tikang ha kahigrayoan an mahitungod kan Jesus. Damu an nagbiyahe bisan ha turuyoon nga mga lugar basi makabati han iya pagtutdo ngan makakita han iya mga milagro. Pero paglabay hin pipira ka adlaw, inuli hiya ha Capernaum, an sentro han iya buruhaton. Hinbaroan dayon ito dinhi hini nga bug-os nga syudad nga hirani ha Dagat han Galilea. Salit damu an kinadto ha balay nga iya inuukyan. An iba ha ira mga Pariseo ngan magturutdo han Balaud nga tikang pa ha Galilea ngan Judea, pati ha Jerusalem.

“Damu hinduro an kinadto salit waray na lugar bisan ha may purtahan, ngan nagtikang hiya pagsangyaw ha ira.” (Marcos 2:2) Yana, andam na an ngatanan para han urusahon nga hitabo. Makakabulig ini ha aton nga maapresyar nga hi Jesus may gahum ha pagwara ha hinungdan han pag-antos han tawo ngan ha pagpahiuli han maopay nga kahimsog han ngatanan nga iya ginpili.

Samtang nagtututdo hi Jesus ha kwarto nga puno hin tawo, may upat ka tawo nga nagdara hin usa nga paralisado nga nahigda ha tiheras. Karuyag nira nga tambalon ni Jesus an ira sangkay. Pero tungod kay damu an tawo, diri hira “makahirani kan Jesus.” (Marcos 2:4) Hunahunaa la an ira duro nga kasubo tungod hito. Sumaka hira ha atop han balay ngan ginbuhoan ito. Katapos, iginturos nira tipasulod ha balay an tiheras nga ginhihigdaan han paralisado.

Nasina ba hi Jesus han ira ginbuhat? Waray gud! Gin-apresyar gud niya an ira pagtoo ngan nagsiring ha paralisado: “Ginpasaylo na an imo mga sala.” (Mateo 9:2) Pero makakagpasaylo gud ba hi Jesus han mga sala? Waray umuyon hito an mga eskriba ngan mga Pariseo, hira nangatadongan: “Kay ano nga sugad hini magyakan ini nga tawo? Nagpapasipara hiya. Hin-o an makakapasaylo han mga sala labot la han Dios?”—Marcos 2:7.

Maaram hi Jesus han ira ginhuhunahuna, salit nagsiring hiya ha ira: “Kay ano nga nangangatadongan kamo hin sugad hito ha iyo kasingkasing? Ano an mas masayon, an pagsiring ha paralisado, ‘Ginpasaylo na an imo mga sala,’ o an pagsiring, ‘Buhát, dad-a an imo tiheras ngan lakat’?” (Marcos 2:8, 9) Oo, tungod han kinabuhi ni Jesus nga iya ihahalad ha maabot nga panahon, makakagpasaylo hiya han sala han mga tawo.

Katapos, iginpakita ni Jesus ha mga tawo pati na ha mga nakontra ha iya nga may awtoridad hiya ha pagpasaylo han mga sala. Ginsidngan niya an paralisado: “Buhát, dad-a an imo tiheras ngan uli ha iyo balay.” Ngan bumuhat dayon an tawo ngan naglakat tipagawas dara an iya tiheras ha atubangan han ngatanan. Nahipausa gud hito an mga tawo! Gindayaw nira an Dios ngan nagsiring: “Waray pa gud kami makakita hin sugad hini”!—Marcos 2:11, 12.

Tigamni nga gin-unabi ni Jesus nga may koneksyon an sala ngan an sakit, pati an pagpasaylo han sala ngan an maopay nga kahimsog. An Biblia nagtututdo nga an aton siyahan nga kag-anak nga hi Adan nakasala salit kita ngatanan nakapanunod han resulta han sala nga amo an sakit ngan kamatayon. Pero ilarom ha pagmando han Ginhadian han Dios, papasayloon ni Jesus an sala han ngatanan nga nahigugma ngan nag-aalagad ha Dios. Ngan an sakit mawawara na ha kadayonan.—Roma 5:12, 18, 19.