Mga usa ka tuig na nga priso hi Juan nga Parabaptis. Pero, nahibabaro la gihapon hiya mahitungod han mga milagro ni Jesus. Hunahunaa la an iya inabat han ginsumatan hiya han iya mga disipulo nga ginbanhaw ni Jesus an anak han balo ha Nain. Kondi, karuyag ni Juan hibatian mismo kan Jesus kon ano an kahulogan hini ngatanan. Salit iya ginsugo an duha han iya mga disipulo. Kay ano? Basi ipakiana ini kan Jesus: “Ikaw na ba an Usa nga Makanhi nga amon ginpipinamulat, o may iba pa nga maabot?”—Lucas 7:19.

Baga ba hin diri ito katoohan nga pakiana? Hi Juan matinumanon nga tawo. Han ginbawtismohan niya hi Jesus haros duha ka tuig na an naglabay, iya nakita an espiritu han Dios nga nalusad ngada kan Jesus ngan hinbatian an pag-uyon han Dios. Waray rason nga maghunahuna kita nga nagluya an pagtoo ni Juan. Kay kon ito an nahitabo, diri unta hiya dadayawon ni Jesus, sugad han iya bubuhaton hini nga higayon. Pero kon diri nagruruhaduha hi Juan, kay ano nga nakagpakiana hiya hito may kalabotan kan Jesus?

Bangin karuyag la ni Juan makompirma mismo kan Jesus kon hiya gud an Mesias. Magpaparig-on ini kan Juan samtang nag-aantos hiya ha prisohan. Ngan posible nga may iba pa nga hinungdan an iya pagpakiana. Maaram hiya han mga tagna ha Biblia nga nagpapakita nga an Usa nga Pinili han Dios magigin hadi ngan paratalwas. Pero, damu ka bulan katapos bawtismohan hi Jesus, priso la gihapon hi Juan. Salit nagpakiana hi Juan kon may-ada pa maabot, usa nga kasaliwan ni Jesus, siring pa, nga bug-os nga magtutuman han ngatanan nga igintagna nga bubuhaton han Mesias.

Imbes nga sidngan la an mga disipulo ni Juan hin ‘Oo ako an Usa nga Makanhi,’ naghatag hi Jesus hin pamatuod nga ginbubuligan hiya han Dios pinaagi ha pagtambal han ngatanan nga klase hin sakit han damu nga tawo. Katapos ginsidngan niya an mga disipulo: “Balik kamo kan Juan ngan isumat ha iya an iyo hinbabatian ngan hinkikit-an: An mga buta nakakakita na ngan an mga piay nakakalakat na, an mga may liprosi nagkatatambal na ngan an mga bungol nakakabati na, ngan an mga patay nagkababanhaw, ngan iginpapahayag an maopay nga sumat ha mga pobre.”—Mateo 11:4, 5.

An pakiana ni Juan bangin nagpapasabot nga naglalaom hiya nga may hihimoon hi Jesus nga labaw pa kay han Iya ginbubuhat ngan bangin mapagawas pa ngani hiya ha prisohan. Pero, ginsidngan ni Jesus hi Juan nga diri maglaom hin labaw pa kay han mga milagro nga iya ginhihimo.

Pagbaya han mga disipulo ni Juan, ginpasarig ni Jesus an mga tawo nga hi Juan labaw pa ha propeta. Hiya an “sinugo” o mensahero ni Jehova nga igintagna ha Malakias 3:1. Hiya liwat an propeta Elias nga igintagna ha Malakias 4:5, 6. Hi Jesus nagsaysay: “Ha pagkamatuod, susumatan ko kamo: Waray pa natawo nga labaw kan Juan nga Parabaptis, kondi an usa nga uroubos ha Ginhadian han langit mas labaw ha iya.”—Mateo 11:11.

Pinaagi ha pagsiring nga an uroubos ha Ginhadian han langit mas labaw kan Juan, iginpakita ni Jesus nga diri ha langit an paglaom ni Juan. Igin-andam ni Juan an dalan para kan Jesus, pero namatay hiya antes abrihan han Kristo an dalan ngadto ha langit. (Hebreo 10:19, 20) Kondi hi Juan matinumanon nga propeta han Dios salit magigin sakop hiya han Ginhadian han Dios dinhi ha tuna.