Hi Jesus naghahatag hin maopay nga sagdon ha iya mga disipulo kon paonan-o gagamiton an materyal nga mga karikohan. Pero diri la an iya mga disipulo an namamati. Nakadto liwat an mga Pariseo, ngan kinahanglan nira iaplikar an sagdon ni Jesus. Kay ano? Tungod kay hira “mahigugmaon ha salapi.” Pakabati nira hito, “nanyam-id hira kan Jesus.”—Lucas 15:2; 16:13, 14.

Pero waray mahadlok hi Jesus. Ginsidngan niya hira: “Nagpapakamatadong kamo ha atubangan han mga tawo, kondi maaram an Dios han aada ha iyo kasingkasing, kay an ginpapahitaas han mga tawo mangil-ad ha pagkita han Dios.”—Lucas 16:15.

Maiha na nga “ginpapahitaas han mga tawo” an mga Pariseo, pero panahon na para han pagbag-o, panahon na nga mabaliskad an kahimtang. An mga ginpapahitaas tungod kay riko ha mga butang ha kalibotan, gamhanan ha politika, ngan maimpluwensya ha relihiyon, papaubson. Pero an ordinaryo nga mga tawo nga mahunahunaon han ira espirituwal nga mga panginahanglan, papahitas-on. Iginpatin-aw ni Jesus inin nahitatabo nga daku nga pagbag-o, ha pagsiring:

“An Balaud ngan an mga sinurat han mga Propeta iginpasamwak tubtob kan Juan. Tikang hadto, iginpapasamwak an maopay nga sumat han Ginhadian han Dios, ngan an ngatanan nga klase han tawo nangangalimbasog nga makasulod hito. Ha pagkamatuod, mas mawawara pa an langit ngan an tuna kay ha mawara an usa nga letra han Balaud nga diri matutuman.” (Lucas 3:18; 16:16, 17) Paonan-o iginpakita ha ginsiring ni Jesus an pagbag-o nga nahitatabo?

Iginhahambog han Judio nga mga lider han relihiyon nga nasunod hira ha Balaud ni Moises. Hinumdumi nga han milagroso nga gintambal ni Jesus an buta didto ha Jerusalem, an mga Pariseo hambog nga nagsiring: “Kami mga disipulo ni Moises. Maaram kami nga an Dios nakiistorya kan Moises.” (Juan 9:13, 28, 29) Usa nga katuyoan han Balaud nga iginhatag pinaagi kan Moises amo an paggiya ha mga mapainubsanon ngadto ha Mesias, nga amo hi Jesus. Iginpakilala ni Juan nga Parabaptis hi Jesus sugad nga an Kordero han Dios. (Juan 1:29-34) Pagtikang han ministeryo ni Juan, an mapainubsanon nga mga Judio, labi na an mga pobre, nakabati mahitungod han “Ginhadian han Dios.” Oo, may “maopay nga sumat” para ha ngatanan nga naruruyag magin sakop han Ginhadian han Dios ngan makapahimulos hito.

Diri kay waray matuman an katuyoan han Mosaiko nga Balaud; lugod, naggiya ito ngadto ha Mesias. Dugang pa, matatapos an obligasyon ha pagtuman hito. Pananglitan, igintugot hito nga Balaud an pagdiborsyo ha iba-iba nga hinungdan, pero yana hi Jesus nagsaysay nga “an bisan hin-o nga nakikigdiborsyo ha iya asawa ngan nag-aasawa hin iba, nag-aadulteryo. Ngan an nag-aasawa hin babaye nga nakigdiborsyo ha bana, nag-aadulteryo.” (Lucas 16:18) Nakapasina gud ini ha mga Pariseo nga mahilig maghimo hin mga surundon.

Naghatag hi Jesus hin ilustrasyon nga nagpapabug-at han daku nga pagbag-o nga nahitatabo. Mahitungod ito ha duha nga lalaki—diin an ira tagsa nga estado ha kinabuhi, o kahimtang, nagbag-o gud. Samtang ginhihisgotan an ilustrasyon, hinumdumi nga may namamati nga mga Pariseo nga mahigugmaon ha salapi ngan ginpapahitaas han mga tawo.

Hi Jesus nagsiring: “May usa nga riko nga tawo, nga an bado marahalon nga purpura. Kada adlaw nagkikinabuhi hiya ha kalipayan ngan kahimyang. Pero may makililimos nga Lasaro an ngaran nga puno hin samad. Gindadara hiya pirme ha ganghaan han riko nga tawo. Ngan naghihingyap hiya nga mabusog han mga pagkaon nga nahuhulog tikang ha lamesa han riko nga tawo. Gindidilaan pa ngani han mga ayam an iya mga samad.”—Lucas 16:19-21.

An mga Pariseo mahigugmaon ha salapi, salit waray ruhaduha nga hira an gin-uunabi ni Jesus nga “riko nga tawo.” Ini nga Judio nga mga lider han relihiyon naruruyag liwat magsul-ot hin marahalon ngan magarbo nga bado. Labot la han karikohan nga bangin gintatag-iya nira, baga hin damu gud an ira pribilehiyo ngan oportunidad. Oo, an pag-ilustrar ha ira sugad nga tawo nga nakabado hin marahalon nga purpura nagpapakita han ira maopay nga kahimtang ngan pagpakamatadong.—Daniel 5:7.

Paonan-o gintatagad hinin riko ngan mapahitas-on nga mga lider an pobre ngan ordinaryo nga mga tawo? Nakakaminos nga gintatagad nira hira sugad nga ‛am ha·’aʹrets, o mga tawo han tuna, nga diri maaram han Balaud ngan diri angay tutdoan  hito. (Juan 7:49) Iginpapakita hini an kahimtang han ‘makililimos nga hi Lasaro’ nga naghihingyap bisan han gudtiay nga “pagkaon nga nahuhulog tikang ha lamesa han riko nga tawo.” Pariho kan Lasaro nga puno hin samad, an ordinaryo nga mga tawo ginmiminos, sugad hin diri hira nalilipayan han Dios.

Iton makasurubo nga kahimtang maiha na nga nahitatabo, pero maaram hi Jesus nga inabot na an panahon para magbag-o gud an kahimtang hadton pariho han riko nga tawo ngan pariho kan Lasaro.

Nagpadayon hi Jesus ha pagsaysay mahitungod hinin daku nga mga pagbag-o. Hiya nagsiring: “Paglabay han panahon, namatay an makililimos, ngan gindara hiya han mga anghel ngan ginpalingkod ha sapit ni Abraham. Namatay liwat an riko nga tawo ngan iginlubong. Didto ha Hades diin hiya nagsasakit, hinangad hiya ngan ha hirayo nakita niya hi Abraham ngan hi Lasaro nga magsapit nga nalingkod.”—Lucas 16:22, 23.

Maaram an mga namamati kan Jesus nga hi Abraham maiha na nga patay ngan aadto ha Lubnganan. Iginpapatin-aw han Kasuratan nga waray bisan usa nga aadto ha Lubnganan, o Sheol, nga nakakakita o nakakayakan, upod na hito hi Abraham. (Eklesiastes 9:5, 10) Kon sugad, para ha mga lider han relihiyon, ano an iginpapasabot han ilustrasyon ni Jesus? Ano daw la an iya karuyag ipasabot mahitungod ha ordinaryo nga mga tawo ngan ha mahigugmaon ha salapi nga mga lider han relihiyon?

Iginpatin-aw pa la ni Jesus an usa nga pagbag-o pinaagi ha pagsiring nga ‘an Balaud ngan an mga sinurat han mga Propeta iginpasamwak tubtob kan Juan nga Parabaptis, pero tikang hadto iginpapasamwak na an Ginhadian han Dios.’ Salit pinaagi ha pagsangyaw ni Juan ngan ni Jesu-Kristo, sugad hin namatay an riko nga tawo ngan hi Lasaro ha ira kahimtang hadto, ngan nabag-o an ira kahimtang ha atubangan han Dios.

Maiha na nga gutom ha espirituwal adton ubos o pobre nga mga tawo. Pero nabubuligan hira ngan nagios uyon han mensahe mahitungod han Ginhadian nga siyahan nga iginpahayag ni Juan nga Parabaptis ngan katapos ni Jesus. Hadto, naglalaom la hira ha gudtiay nga ‘pagkaon nga nahuhulog tikang ha simboliko nga lamesa’ han mga lider han relihiyon. Pero yana ginpapakaon hira hin importante nga mga kamatuoran tikang ha Kasuratan, labi na han mag-opay gud nga mga butang nga igintututdo ni Jesus. Sugad hin maopay na an ira kahimtang ha atubangan ni Jehova nga Dios.

Ha kabaliktaran, an riko ngan maimpluwensya nga mga lider han relihiyon waray kumarawat han mensahe han Ginhadian nga iginpasamwak ni Juan ngan iginsangyaw ni Jesus ha iba-iba nga lugar. (Mateo 3:1, 2; 4:17) Ngani nasisina hira, o nasasakit, hito nga mensahe nga nagtutudlok ha sugad hin naglalaga nga paghukom han Dios ha tidaraon.  (Mateo 3:7-12) Magigin kapahuwayan gud para hinin mahigugmaon ha salapi nga mga lider han relihiyon kon umundang hi Jesus ngan an iya mga disipulo ha pagpasamwak han mensahe han Dios. Ito nga mga lider pariho ha riko nga tawo ha ilustrasyon, nga nagsiring: “Amay nga Abraham, malooy ka ha akon, ngan sugoa hi Lasaro nga itunlob ha tubig an iya tudlo basi patugnawon an akon dila, kay nagsasakit ako tungod hinin naglalaga nga kalayo.”—Lucas 16:24.

Pero diri ito mahitatabo. Diri magbabag-o an kadam-an han mga lider han relihiyon. Waray hira ‘mamati kan Moises ngan ha mga Propeta,’ nga an mga sinurat maggigiya unta ha ira nga karawaton hi Jesus sugad nga Mesias han Dios ngan Hadi. (Lucas 16:29, 31; Galacia 3:24) Waray liwat hira magpaubos ngan makombinse hadton mga pobre nga kumarawat kan Jesus ngan yana gin-uuyonan na han Dios. Para ha mga disipulo ni Jesus, diri nira ikukompromiso o paluluyahon an kamatuoran basi la matagbaw an mga lider han relihiyon o magkaada hin kapahuwayan. Ha ilustrasyon ni Jesus, iginsaysay niya ini nga kamatuoran nga ginsiring han “Amay nga Abraham” ha riko nga tawo:

“Anak, hinumdumi nga han buhi ka pa, nakarawat mo hin bug-os an mag-opay nga butang, pero hi Lasaro magraot nga butang an nakarawat. Kondi yana mahimyang hiya didi, samtang ikaw nagsasakit. Dugang pa, may hilarom nga pangpang ha butnga naton, salit an naruruyag kumada ha iyo tikang didi diri makakahimo, ngan diri liwat makakatabok an mga tawo tikang dida ngadi ha amon.”—Lucas 16:25, 26.

Matadong gud ngan angayan ito nga daku nga pagbag-o nga nahitabo! Nagpapasabot ito hin pagkabalyo han kahimtang han hambog nga mga lider han relihiyon ngan han mga mapainubsanon nga kumarawat han yugo ni Jesus ngan ha urhi nakapahuway ngan nakakaon ha espirituwal. (Mateo 11:28-30) Ini nga pagbag-o nagin mas klaro paglabay hin pipira ka bulan han an Balaud nga kasabotan ginliwanan han bag-o nga kasabotan. (Jeremias 31:31-33; Colosas 2:14; Hebreo 8:7-13) Han iginbuhos han Dios an baraan nga espiritu hadton Pentekostes 33 C.E., nagin klaro gud nga an mga disipulo ni Jesus an gin-uyonan han Dios, diri an mga Pariseo ngan an ira mga kaalyado ha relihiyon.