Hi Jesus nakadto pa ha Samaria o ha Galilea. Ginpakianhan hiya han mga Pariseo mahitungod han pag-abot han Ginhadian nga ginlalaoman nira nga may magarbo nga parada ngan seremonya. Pero hiya nagsiring: “Diri ngatanan makakakita han pag-abot han Ginhadian han Dios. An mga tawo diri masiring, ‘Kitaa niyo didi!’ o ‘Didto!’ Kay an Ginhadian han Dios aada ha butnga niyo.”—Lucas 17:20, 21.

Bangin ginhuhunahuna han iba nga iginpapasabot ni Jesus nga an Ginhadian nagmamando ha kasingkasing han mga surugoon han Dios. Pero sayop ito kay an Ginhadian waray dida ha kasingkasing han mga Pariseo nga kaistorya ni Jesus. Kondi, aada ito ha butnga nira kay an pinili nga Hadi han Ginhadian han Dios, hi Jesus, nakada mismo kaupod nira.—Mateo 21:5.

Posible nga pagbaya han mga Pariseo, naghatag hi Jesus hin dugang nga detalye ha mga disipulo mahitungod han pag-abot han Ginhadian. May kalabotan ha iya presensya sugad nga magmarando han Ginhadian, nagpahamangno hiya: “Maabot an panahon nga maghihingyap kamo nga makita an usa han mga adlaw han Anak han tawo, pero diri niyo ito makikita.” (Lucas 17:22) Iginpapasabot ni Jesus nga an pagmando han Anak han tawo ha Ginhadian mahitatabo ha tidaraon. Antes umabot ito nga takna, an iba nga disipulo bangin mamiling gud hito, pero kinahanglan padayon hira nga maghulat ha itinanda nga panahon han Dios para ha pag-abot han Anak han tawo.

Hi Jesus nagpadayon: “An mga tawo masiring ha iyo, ‘Kitaa niyo didto!’ o ‘Kitaa niyo didi!’ Ayaw kamo paggawas o paglanat ha ira. Kay pariho han kidlat nga naglalamrag tikang ha usa nga bahin ha ilarom han langit tubtob ha luyo nga bahin, magigin sugad liwat hito an Anak han tawo.” (Lucas 17:23, 24) Paonan-o mapapanalipdan an mga disipulo ni Jesus kontra ha pagsunod ha buwa nga mga mesias? Nagsiring hi Jesus nga an pag-abot han tinuod nga Mesias pariho han kidlat nga nakikita ha bisan diin. An ebidensya han iya presensya ha pagmando ha Ginhadian makikita hin matin-aw han ngatanan nga nag-oobserbar.

Katapos, nag-unabi hi Jesus hin panhitabo ha naglabay basi itanding an magigin disposisyon han mga tawo hito nga panahon: “An nahitabo ha mga adlaw ni Noe mahitatabo liwat ha mga adlaw han Anak han tawo . . . Pariho liwat hito an nahitabo ha panahon ni Lot: Okupado an mga tawo ha pagpinangaon, pagpinanginom, pagpinamalit, pagpinamaligya, pagpinananom, ngan pagpinanhimo hin balay. Pero ha adlaw han paggawas ni Lot ha Sodoma, inuran hin kalayo ngan asupre tikang ha langit ngan namatay hira ngatanan. Pariho liwat hito an mahitatabo ha panahon kon igpahayag na an Anak han tawo.”—Lucas 17:26-30.

Diri iginpapasabot ni Jesus nga an mga tawo ha panahon ni Noe ngan ni Lot ginbungkag tungod kay nagpadayon hira ha ira adlaw-adlaw nga buruhaton sugad han pangaon, panginom, pamalit, pamaligya, pananom, ngan panhimo hin balay. Bisan hira Noe ngan Lot ngan an ira pamilya nagbuhat liwat han pipira hito. Pero samtang ginbubuhat ito han iba, waray hira maghatag hin atensyon ha kaburut-on han Dios ngan ginbalewaray nira an panahon diin hira nabubuhi. Salit ginsagdonan ni Jesus an iya mga disipulo nga maghatag hin atensyon ha kaburut-on han Dios ngan aktibo nga makigbahin ha pagbuhat hito. Pinaagi hini, iginpakita niya ha ira an paagi basi matalwas—basi padayon nga mabuhi—kon ipadapat na han Dios an kabungkagan ha tidaraon.

Kinahanglan likayan han mga disipulo nga maagaw an ira atensyon han mga butang hini nga kalibotan, “mga butang nga ginbayaan.” Hi Jesus nagsiring: “Hito nga panahon, an aadto ha atop han balay diri lumusad pagkuha han iya mga gamit ha sulod han balay, ngan an aadto ha uma diri liwat umuli pagkuha han mga butang nga iya ginbayaan. Hinumdumi niyo an asawa ni Lot.” (Lucas 17:31, 32) Nagin harigi hiya nga asin.

Basi padayon nga ihulagway an magigin sitwasyon kon an Anak han tawo magmando na sugad nga Hadi, hi Jesus nagsiring ha iya mga disipulo: “Hito nga gab-i may duha nga tawo ha usa nga higdaan; an usa kukuhaon pero an usa babayaan.” (Lucas 17:34) Salit an iba matatalwas, pero an iba babayaan, mamamatay hira.

An mga disipulo nagpakiana: “Diin, Ginoo?” Hi Jesus binaton: “Kon hain an lawas, didto matitirok an mga agila.” (Lucas 17:37) Oo, an iba magigin pariho han mga agila nga nakakakita ha hirayo. Ini nga mga disipulo titirukon ngadto ha tinuod nga Kristo, an Anak han tawo. Hito nga panahon ha tidaraon, ihahatag ni Jesus ha iya mga disipulo an kamatuoran nga nagtatalwas han kinabuhi para hadton may pagtoo.