1, 2. (a) Paonan-o pinabug-atan ni Jesus an bili han pagplano? (b) Ha ano nga kanataran labi na nga importante an pagplano?

 AN PAGTUKOD hin usa nga balay nagkikinahanglan hin maopay nga pangandam. Antes ibutang an pundasyon, kinahanglan mayada tuna ngan iginuhit nga mga plano. Kondi, usa pa nga butang an importante. Hi Jesus nagsiring: “Hin-o ha iyo nga karuyag magtukod hin torre an diri siyahan lumingkod ngan pag-ihapon an magagasto, basi makita kon mayada ba hiya igo ha paghuman hito?”—Lukas 14:28.

² An pagtukod hin usa nga balay pariho liwat han pagtukod hin malampuson nga pag-asawa. Damu an nasiring: “Karuyag ko mag-asawa.” Kondi pira an naukoy basi  paghunahunaon an ginkikinahanglan? Bisan kon an Biblia nagsasaysay hin maopay mahitungod han pag-asawa, iginpapatin-aw liwat hito an mga ayat nga iginpipresenta han pag-asawa. (Proberbios 18:22; 1 Korinto 7:28) Salit, adton nagpaplano mag-asawa kinahanglan magkaada totoo nga panhunahuna ha mga bendisyon ngan ha mga kinahanglanon han pagin inasaw-an.

3. Kay ano nga birilhon nga bulig an Biblia hadton nagpaplano ha pag-asawa, ngan ano an tulo nga mga pakiana nga mabulig ha aton ha pagbaton?

³ Nakakabulig an Biblia. An sagdon hito inspirado han Tinikangan han pag-asawa, hi Jehova nga Dios. (Efeso 3:14, 15; 2 Timoteo 3:16) Ha paggamit han mga prinsipyo nga hiaagian dida hinin kadaan kondi napapanahon gud nga giya nga libro, aton siguruhon kon (1) Paonan-o maisusumat han usa ka tawo kon hiya ba andam na mag-asawa? (2) Ano an sadang pangitaon ha usa nga padis? ngan (3) Paonan-o matitipigan nga dungganon an pagkatrato?

4. Ano an importante nga butang ha pagpabilin ha malampuson nga pag-asawa, ngan kay ano?

⁴ An pagtukod hin usa nga balay bangin magasto, kondi magasto liwat an pagmangno han hilawig nga pagtipig hito. Pariho ito han pag-asawa. An pag-asawa baga in makuri gud; kondi, an pagtipig han relasyon han mag-asawa kada tuig kinahanglan pagtagdon liwat. Ano an ginkikinahanglan han pagtipig han sugad nga relasyon? An importante nga butang amo an bug-os kasingkasing nga pagkilala han responsabilidad. Dinhi iginsasaysay han Biblia an relasyon han mag-asawa: “An lalaki mabaya ha iya amay ngan ha iya iroy ngan hiya matampo ha iya asawa ngan hira magigin usa nga unod.” (Genesis 2:24) Iginhatag ni Jesu-Kristo an amola Kasuratanhon nga basihanan para han diborsiyo nga may posibilidad han pag-asawa utro—“pakighilawas,” nga amo an, igindidiri nga relasyon ha sekso gawas han pag-asawa. (Mateo 19:9) Kon nagpaplano ka mag-asawa, hinumdumi inin Kasuratanhon nga  mga suruklan. Kon diri ka pa andam para hinin seryoso nga pagkilala han responsabilidad, niyan diri ka pa andam mag-asawa.—Deuteronomio 23:21; Eklesiastes 5:4, 5.

5. Bisan kon an seryoso nga pagkilala han responsabilidad ha pag-asawa nakakapahadlok ha iba, kay ano nga sadang pabilhan gud ito hadton karuyag mag-asawa?

⁵ An ideya han seryoso nga pagkilala han responsabilidad nakakapahadlok ha damu nga mga tawo. “An paghibaro nga kami nga duha magtatampo ha bug-os nga kinabuhi nakahimo ha akon nga umabat nga gindid-an, sinadhan, ginpriso gud,” siring han usa ka olitawo. Kondi kon tinuod nga nahigugma ka ha tawo nga karuyag mo pakasalan, an pagkilala han responsabilidad diri magigin sugad han usa nga pinas-an. Lugod, huhunahunaon ito sugad nga surok han kasigurohan. An pagkilala han responsabilidad ha pag-asawa makakahimo han mag-asawa nga maruyag nga magtampo ha maopay ngan makuri nga mga panahon ngan nasuporta ha usa kag usa anoman an mahitabo. An Kristiano nga apostol nga hi Pablo nagsurat nga an totoo nga gugma “nag-aantos han ngatanan nga mga butang” ngan “nag-iilob han ngatanan nga mga butang.” (1 Korinto 13:4, 7) “An pagkilala han responsabilidad ha pag-asawa nakakahimo ha akon nga umabat nga labaw nga may kasigurohan,” siring han usa nga babaye. “Nahigugma ako han kahimyang han paghimo hin dayag nga pagpahayag nga magtatampo kami nga duha.”—Eklesiastes 4:9-12.

6. Kay ano nga gimaopayi an diri pagdagmit ha pag-asawa ha batan-on nga edad?

⁶ An pagsunod ha sugad nga pagkilala han responsabilidad nagkikinahanglan hin kahamtong. Salit, hi Pablo nagsasagdon nga maoroopay para ha mga Kristiano nga diri mag-asawa tubtob nga hira “umagi ha kaanyag han pagkabatan-on,” an panahon nga makusog an mga pagbati ha sekso ngan makakabaliko han desisyon han usa. (1 Korinto 7:36) Madagmit magbag-o an mga batan-on samtang nagtutubo hira. Damu han batan-on pa hinduro nga nag-aasawa  an nagbabag-o ha ira mga panginahanglan ngan mga hingyap, sugad man an ira padis, katapos han pipira la ka tuig. Iginpapahayag han mga estadistika nga an mga tinedyer nga nag-aasawa mas masurub-on ngan nagdidiborsiyo kaysa hadton naghuhulat hin pipira ka panahon kon hira gurang na. Salit ayaw pagdagmit ha pag-asawa. An pipira ka tuig nga ginasto sugad nga batan-on, solo nga adulto makakaghatag ha imo hin presyoso nga eksperiensia nga makakahimo ha imo nga mas hamtong ngan kalipikado gud nga magin angayan nga padis. An paghulat ha pag-asawa makakabulig liwat ha imo nga hisabtan hin maoroopay an imo kalugaringon—usa nga kinahanglanon kon karuyag mo mapatubo an malampuson nga relasyon ha imo pag-asawa.

7. Kay ano nga adton nagpaplano mag-asawa sadang mag-usisa siyahan ha iya kalugaringon?

⁷ Masayon ba para ha imo an paglista han mga kalidad nga karuyag mo ha usa nga padis? Para ha kadam-an masayon ito. Kondi, kumusta man an imo kalugaringon nga mga kalidad? Ano an imo mga kalidad nga mabulig ha imo ha pakaamot ha malampuson nga pag-asawa? Magigin ano nga klase ka hin bana o asawa? Pananglitan, kinakarawat mo ba an imo mga sayop ngan kinakarawat an sagdon, o pirme ka nagdedepensa kon ginsasaway? Malipayon ka ba ngan positibo, o madagmit ka masubo, agsob nga nagrereklamo? (Proberbios 8:33; 15:15) Hinumdumi, an pag-asawa diri magbabag-o han imo personalidad. Kon ikaw mapahitas-on, sensitibo hinduro, o sobra nga negatibo han solo ka pa, magigin sugad ka la gihapon kon inasaw-an na. Tungod kay makuri makita an aton kalugaringon sugad han pagkita ha aton han iba, kay ano nga diri magpakiana ha usa nga ginikanan o usa nga masasarigan nga sangkay para ha prangka nga mga komento ngan mga suhestion? Kon hibaroan mo an mga pagbag-o nga mahimo buhaton, buhata ini antes pa mag-asawa.

8-10. Ano nga sagdon an ginhahatag han Biblia nga mabulig ha indibiduwal ha pag-andam ha pag-asawa?

 ⁸ An Biblia nagdadasig ha aton nga tugotan an baraan nga espiritu han Dios nga magbuhat ha aton, mamunga hin mga kalidad sugad han “gugma, kalipay, kamurayawan, pagkamainantuson, kalooy, pagkamaopay, pagtoo, kaaghop, pagpugong-ha-kalugaringon.” Nagsusumat liwat ito ha aton nga “magbag-o ha puwersa nga nagpapagios han [aton] hunahuna” ngan “magsul-ot han bag-o nga personalidad nga ginlarang sumala han kaburut-on han Dios ha totoo nga katadongan ngan pagkamaunungon.” (Galasia 5:22, 23; Efeso 4:23, 24) An pag-aplikar hini nga sagdon samtang solo ka pa magigin pariho han pagdeposito hin salapi ha bangko—usa ka butang nga magigin birilhon hinduro ha tidaraon, kon mag-aasawa ka na.

⁹ Pananglitan, kon ikaw usa nga babaye, hibaroi an paghatag hin labaw nga atension ha “tago nga pagkatawo han kasingkasing” kay ha imo pisikal nga hitsura. (1 Pedro 3:3, 4) An pagkamahinhin ngan kalinaw ha hunahuna mabulig ha imo nga magkaada hin kinaadman, an totoo nga “korona han katahom.” (Proberbios 4:9; 31:10, 30; 1 Timoteo 2:9, 10) Kon ikaw usa nga lalaki, hibaroi an pagtagad ha kababayin-an ha maloloy-on ngan matinalahuron nga paagi. (1 Timoteo 5:1, 2) Samtang nahibabaro ha paghimo hin mga desisyon ngan pagpas-an han responsabilidad, hibaroi liwat an pagin mahinhin ngan mapainubsanon. An dominante nga paggios magtutugway ha kasamok ha pag-asawa.—Proberbios 29:23; Mika 6:8; Efeso 5:28, 29.

¹⁰ Bisan kon diri masayon an pagbag-o han hunahuna hini nga mga bahin, usa ka butang ito nga sadang pagbuhaton han ngatanan nga mga Kristiano. Ngan mabulig ito ha imo nga magin maoroopay nga padis ha pag-asawa.

11, 12. Paonan-o hibabaroan han duha nga tawo kon hira ba magkaangay o diri?

¹¹ Kustomre ba ha lugar nga imo inuukyan para ha  usa ka tawo nga pumili han iya kalugaringon nga padis ha pag-asawa? Kon amo, ano an imo pagbubuhaton kon nakaagi ka hin usa nga diri kasekso nga makaruruyag? Siyahan, pakianhi an imo kalugaringon, ‘Pag-asawa ba an tinuod nga akon tuyo?’ Maraot an pag-uyag ha emosyon han iba nga tawo pinaagi ha paghatag hin sayop nga mga pamumulaton. (Proberbios 13:12) Ngan, pakianhi an imo kalugaringon, ‘Andam na ba ako mag-asawa?’ Kon oo an baton hiton nga mga pakiana, an sunod nga imo pagbubuhaton nadepende ha lokal nga mga kustomre. Ha iba nga katunaan, katapos obserbahan an tawo ha pipira ka panahon, bangin dumaraon ka ha tawo ngan igpahayag an hingyap nga makilala hiya hin labaw pa. Kon diri an baton, ayaw pagpirit tubtob ha punto nga diri na maopay. Hinumdumi, an iba nga tawo mayada liwat katungod ha paghimo hin desisyon hito nga butang. Kondi, kon, oo an baton, mahimo ka maghikay hin panahon nga magkaupod kamo nga duha ha maopay nga mga buruhaton. Maghahatag ini ha imo han higayon nga makita kon an pag-asawa hini nga tawo magigin maaramon. a Ano an sadang pangitaon mo hini nga panahon?

¹² Basi mabaton iton nga pakiana, hunahunaa an duha nga instrumento ha musika, bangin usa nga piano ngan usa nga sista. Kon husto an pagkatuno hito, an kada usa makakahimo hin matahom solo nga musika. Kondi, ano an nahitatabo kon inin duha nga instrumento dungan nga ginpapatokar? Yana kinahanglan magkatuno hira ha usa kag usa. Pariho ito ha imo ngan ha usa nga magigin padis mo. An kada usa ha iyo bangin nangangalimbasog ha “pagtuno” o pagpahiuyon han iyo personalidad sugad nga mga indibiduwal. Kondi an pakiana yana amo ini: Magkauyon ba kamo ha usa kag usa? Ha iba nga mga pulong, magkaangay ba kamo?

13. Kay ano nga diri-maaramon gud an pakigkatrato ha usa nga diri-kapariho ha imo pagtoo?

 ¹³ Importante nga kamo nga duha mayada pariho nga mga tinotoohan ngan mga prinsipyo. Hi apostol Pablo nagsurat: “Diri kamo magpas-an han yugo upod han diri-kapariho ha pagtoo.” (2 Korinto 6:14; 1 Korinto 7:39) An pag-asawa ha usa nga diri-kapariho ha imo pagtoo ha Dios sigurado nga magkakaada diri pag-uruyon. Ha luyo nga bahin, an pariho nga debosyon kan Jehova nga Dios amo an pinaka marig-on nga basihanan han pagkaurosa. Karuyag ni Jehova nga magmalipayon ka ngan magpahimulos han pinaka duok nga bugkos ha tawo nga imo pinangasawa. Karuyag niya nga mabugkos ka ha Iya ngan ha usa kag usa pinaagi han tinulutulo nga bugkos han gugma.—Eklesiastes 4:12.

14, 15. An pagkaada ba pariho nga pagtoo amola an bahin han pagkaurosa ha pag-asawa? Isaysay.

¹⁴ Samtang an pagsingba ha Dios nga magkaupod amo an pinaka importante nga bahin han pagkaurosa, labaw pa an nahiuupod. Basi magkauyon ha usa kag usa, ikaw ngan an imo magigin padis sadang magkaada pariho nga mga tumong. Ano an iyo mga tumong? Pananglitan, mationan-o an inaabat niyo mahitungod han pagkaada kabataan? Ano nga mga butang an siyahan ha iyo kinabuhi? b (Mateo 6:33) Ha malampuson gud nga pag-asawa, an mag-asawa maopay nga magsangkay ngan nalilipay ha pakig-upod ha usa kag usa. (Proberbios 17:17) Para hini, kinahanglan magkaada hira pariho nga mga interes. Makuri an pagpabilin ha duok nga pakigsangkay—labaw nga makuri an pagpabilin ha pag-asawa—kon diri pariho an ira mga intereses. Ha gihapon, kon an imo magigin padis nalilipay ha usa ka partikular nga buruhaton, sugad han paglakat, ngan ikaw diri, nangangahulogan ba iton nga  kamo nga duha diri sadang mag-asawa? Diri. Bangin magkapariho kamo ha iba, mas importante nga mga interes. Dugang pa, bangin maihatag mo an kalipayan ha imo magigin padis pinaagi ha pakiambit ha maopay nga mga buruhaton tungod kay nalilipay hito an imo padis.—Buhat 20:35.

¹⁵ Tinuod, ha daku nga sukol, an pagkamagkaangay nasisiguro kon paonan-o nagpapauyon-uyon kamo nga duha imbes nga magin pariho kamo nga duha. Imbes nga magpakiana, “Nagkakauyon ba kami ha ngatanan nga butang?” an maoroopay nga mga pakiana bangin: “Ano an nahitatabo kon diri kami nagkakauyon? Mahimo ba namon paghisgutan an mga butang hin kalmado, sumala han pagtahod ngan dignidad han usa kag usa? O an mga paghisgot agsob nga nagigin mapaso nga mga argumento?” (Efeso 4:29, 31) Kon karuyag mo mag-asawa, pag-ikmat ha usa nga mapahitas-on ngan naghuhunahuna nga pirme hiya an husto, diri gud nagkokompromiso, o pirme nagkikinahanglan ngan nagpaplano basi makuha an iya karuyag.

16, 17. Ano an mahimo pangitaon ha usa nga lalaki o babaye kon nagbibiling hin magigin asawa o bana?

¹⁶ Ha Kristiano nga kongregasyon, adton tinatapuran han responsabilidad kinahanglan “sarihan anay may kalabutan ha pagin takos.” (1 Timoteo 3:10) Magagamit mo liwat ini nga prinsipyo. Pananglitan, an solo nga babaye mahimo magpakiana, “Ano nga klase hin reputasyon mayada ini nga lalaki? Hin-o an iya mga sangkay? Nagpapakita ba hiya hin pagpugong-ha-kalugaringon? Mationan-o niya gintatrato an mga lagas? Ano nga klase hin pamilya an iya gintikangan? Paonan-o hiya nakikig-upod ha iya pamilya? Ano an iya paggios ha salapi? Nag-aabuso ba hiya ha mga irinmon nga may alkohol? Masisinahon ba hiya, madarahog pa ngani? Ano an iya mga responsabilidad ha kongregasyon, ngan paonan-o niya gindudumara ito? Mahihimo  ko ba tahuron gud hiya?”—Lebitiko 19:32; Proberbios 22:29; 31:23; Efeso 5:3-5, 33; 1 Timoteo 5:8; 6:10; Tito 2:6, 7.

¹⁷ An solo nga lalaki mahimo magpakiana, “Ipinapakita ba hini nga babaye an gugma ngan pagtahod ha Dios? May kapas ba hiya ha pagmangno ha panimalay? Ano an lalaoman han iya pamilya ha amon? Maaramon ba hiya, mauyatom, diri-magastos? Ano an iya ginyayakan? Tinuod nga nababaraka ba hiya ha kaopayan han iba, o interesado la ha iya kalugaringon, o naghihilabot ha iba nga mga tawo? Masasarigan ba hiya? Disidido ba hiya ha pagpasakop ha pagkaulo, o matig-a hiya, bangin rebelyoso pa ngani?”—Proberbios 31:10-31; Lukas 6:45; Efeso 5:22, 23; 1 Timoteo 5:13; 1 Pedro 4:15.

18. Kon nakikita an gudtiay nga mga kaluyahan durante han pagkatrato, ano an sadang pagtagdon?

¹⁸ Ayaw hingalimti nga nakikig-upod ka ha diri-hingpit nga tulin ni Adan, diri ha gindadayaw nga bayani nga lalaki o babaye tikang ha usa ka romantiko nga nobela. An ngatanan mayada mga kaluyahan, ngan an iba hini sadang igbalewaray—an imo ngan han imo magigin padis. (Roma 3:23; Jakobo 3:2) Dugang pa, an nakikita nga kaluyahan mahimo maghatag hin higayon ha pagtubo ha espirituwal. Pananglitan, durante han iyo pagkatrato nagkaada kamo argumento. Tagda: Bisan an mga tawo nga nahigugma ngan natahod ha usa kag usa diri-nagkakauyon usahay. (Itanding an Genesis 30:2; Buhat 15:39.) Mahihimo ba niyo nga duha nga ‘pugngan an iyo espiritu’ hin gutiay pa ngan mahibaro ha pagsulbad ha mga butang nga labaw nga mamurayawon? (Proberbios 25:28) Ipinapakita ba han imo magigin padis an hingyap nga mag-uswag? Ipinapakita mo ba? Mahihimo mo ba hibaroan nga diri magin sensitibo hinduro, diri nasisina dayon? (Eklesiastes 7:9) An paghibaro ha pagsulbad ha mga problema makakagtukod hin usa nga susbaranan han tangkod nga komunikasyon nga importante kon kamo nga duha mag-asawa na.—Kolosas 3:13.

19. Ano an magigin maaramon nga kurso kon nabangon an mga problema durante han pagkatrato?

 ¹⁹ Kondi, ano man, kon nakikita mo an mga butang nga nakakaguol gud ha imo? An sugad nga mga pagruhaduha sadang hunahunaon hin maopay. Kondi mationan-o man karomantiko an inaabat mo o bisan kon karuyag mo na gud mag-asawa, ayaw igbalewaray an seryoso nga mga sayop. (Proberbios 22:3; Eklesiastes 2:14) Kon mayada ka relasyon ha usa nga mayada ka daku nga mga pagruhaduha, maaramon nga diri igpadayon an relasyon ngan likyan an paghimo hin nagpapabilin nga pagkilala han responsabilidad ngada hiton nga tawo.

20. Paonan-o matitipigan han magpadis an ira moral nga paggawi nga diri mapapasipara?

²⁰ Paonan-o niyo matitipigan an iyo pagkatrato nga dungganon? Siyahan, siguroha nga an iyo moral nga paggawi diri gud mapapasipara. Ha lugar nga iyo inuukyan, an pagkapot ha mga kamot, pagharok, o paghangkop gintatagad ba nga angayan nga paggawi para ha diri pa kasal nga magpadis? Bisan kon an sugad nga mga pagpahayag han gugma diri man igindidiri, sadang ito tugotan la kon an relasyon nakaabot na ha punto diin sigurado na nga ginplano an pag-asawa. Pag-ikmat nga an pagpakita hin gugma diri magtubo nga nagigin mahugaw nga paggawi o pakighilawas pa ngani. (Efeso 4:18, 19; itanding an Kanta ni Salomon 1:2; 2:6; 8:5, 9, 10.) Tungod kay an kasingkasing malimbong, magigin maaramon kamo nga duha kon lilikyan niyo nga kamo la nga duha ha usa nga balay, usa nga apartment, usa nga naparada nga sarakyan, o ha bisan diin nga maghahatag hin higayon para han sayop nga paggawi. (Jeremias 17:9) An pagtipig ha iyo pagkatrato nga limpyo ha moral matin-aw nga nagpapamatuod nga mayada kamo pagpugong-ha-kalugaringon ngan inuuna niyo an diri-hakugnon nga pagtagad para ha kaopayan han iba nga tawo kay ha iyo kalugaringon nga mga hingyap. Pinaka  importante, an limpyo nga pagkatrato magpapalipay kan Jehova nga Dios, nga nagsusugo ha iya mga surugoon nga maglikay ha kahugaw ngan pakighilawas.—Galasia 5:19-21.

21. Ano iton tangkod nga komunikasyon nga bangin ginkikinahanglan basi matipigan an pagkatrato nga dungganon?

²¹ Ikaduha, an dungganon nga pagkatrato nag-uupod liwat han tangkod nga komunikasyon. Samtang nagpapadayon an iyo pagkatrato ngadto ha pag-asawa, kinahanglan paghisgutan hin dayag an pipira nga mga butang. Diin kamo mag-uukoy? Magtatrabaho ba kamo nga duha? Karuyag ba niyo magkaada hin kabataan? Liwat, husto la nga isumat an mga butang, bangin an naglabay han usa, nga makakaapekto ha pag-asawa. Bangin mag-upod ini han dagku nga mga utang o mga obligasyon o mga butang may kalabutan ha kahimsog, sugad han grabe nga sakit o han kahimtang mo yana. Tungod kay damu nga mga tawo nga mayada HIV (virus nga nagreresulta hin AIDS) diri nagpapakita dayon han mga tigaman, diri sayop para ha indibiduwal o para ha nagtatagad nga mga ginikanan nga maghangyo hin pag-usisa ha dugo para ha AIDS han usa nga ha naglabay nagbuhat hin sayop nga relasyon ha sekso o usa nga nagamit hin droga nga ginpaagi ha ugat. Kon positibo an resulta, an may sakit nga tawo diri sadang magpirit ha magigin padis nga igpadayon an relasyon kon karuyag hiton nga usa nga tapuson na ito. Tinuod, bisan hin-o nga nagbubuhat ha peligroso nga estilo-han-kinabuhi maopay nga magpausisa han dugo para ha AIDS antes magtikang an pagkatrato.

22, 23. (a) Paonan-o mawawara han usa an timbang nga panhunahuna kon nag-aandam han kasal? (b) Ano iton timbang nga panhunahuna an sadang igpabilin kon nagpaplano han kasal ngan pag-asawa?

²² Durante han ultimo nga mga bulan antes han pag-asawa, kamo nga duha sigurado nga magigin sibot hinduro ha paghikay han kasal. Malilikyan niyo an daku nga kaguol pinaagi ha pagin kasadangan. An engrande nga  kasal bangin makapalipay ha mga paryente ngan ha komunidad, kondi bangin magbilin ito ha bag-o nga kinasal ngan ha ira mga pamilya nga kapoy ha pisikal ngan nahubsan ha pinansial. Makatadunganon an pagsunod ha pipira lokal nga mga kustomre, kondi an sobra ngan bangin nagpapalabawlabaw nga pagsunod hito makakatabon han kahulogan han okasyon ngan mahimo magwara han kalipay nga sadang magkaada kamo. Bisan kon an mga pagbati han iba kinahanglan pagtagdon, an nobyo amo an siyahan nga responsable ha pagdesisyon kon ano an mahitatabo ha panagtawo han kasal.—Juan 2:9.

²³ Hinumdumi nga an iyo kasal magpapadayon ha usa la ka adlaw, kondi an iyo pag-asawa magpapadayon ha bug-os nga kinabuhi. Likayi an duro nga pagsentro han atension dida ha adlaw han kasal. Lugod, paglaom kan Jehova nga Dios para ha giya, ngan pagplano ha unhan para ha kinabuhi sugad nga inasaw-an. Niyan mag-aandam kamo hin maopay para ha malampuson nga pag-asawa.