MAARAM ka ba kon hin-o ini nga kalalakin-an ngan kon ano an ira ginbubuhat? Tikadto hira ha girra, ngan nagkakanta an kalalakin-an ha unahan. Kondi bangin magpakiana ka: ‘Kay ano nga waray mga espada ngan bangkaw an mga paragkanta?’ Aton kitaon.

Hi Jehosapat an hadi han duha-ka-tribo nga ginhadian han Israel. Nabuhi hiya ha panahon ni Hadi Ahab ngan ni Jesebel han 10-ka-tribo nga ginhadian ha norte. Kondi maopay nga hadi hi Jehosapat, ngan maopay liwat nga hadi an iya tatay nga hi Asa. Salit ha damu nga katuigan, maopay an kahimtang han katawohan ha duha-ka-tribo nga ginhadian ha sur.

Kondi hito nga panahon, may-ada nahitatabo nga tungod hito nahadlok an katawohan. An mga mensahero nagsumat kan Jehosapat: ‘Damu nga kasundalohan tikang ha mga nasud han Moab, Amon, ngan Bukid Seir an tiabot ha pag-atake ha iyo.’ Nagkatirok an damu nga Israelita ha Jerusalem basi mangaro hin bulig kan Jehova. Kinadto hira ha templo, ngan didto nag-ampo hi Jehosapat: ‘O Jehova nga amon Dios, diri kami maaram han amon pagbubuhaton. Waray kami kapas kontra hinin damu nga kasundalohan. Nanginginyupo kami han imo bulig.’

Namati hi Jehova, ngan pinaagi han usa han Iya mga surugoon, nagsiring Hiya ha katawohan: ‘An pakig-away diri iyo, kondi kanan Dios. Diri kamo kinahanglan makig-away. Pagkita la kamo, ngan kitaa kon paonan-o kamo luluwason ni Jehova.’

Salit kinabuwasan, ginsidngan ni Jehosapat an katawohan: ‘Sarig kamo kan Jehova!’ Katapos, nagbutang hiya hin magkaranta ha unahan han mga sundalo, ngan samtang nagmamartsa, nagkakanta hira hin mga pagdayaw kan Jehova. Maaram ka ba kon ano an nahitabo han hirani na hira ha arawayan? Ginpahinabo ni Jehova nga mag-aragway mismo an kaaway nga kasundalohan. Ngan han nagkaabot an mga Israelita, patay na an ngatanan nga kaaway!

Diri ba maaramon hi Jehosapat ha pagsarig kan Jehova? Maaramon kita kon sumarig liwat kita ha Iya.