An Surat ni Santiago 5:1-20
5 Yana kadi, kamo nga riko nga mga tawo, pagtangis ngan pagnguyngoy tungod han mga kasakitan nga tiabot ha iyo.+
2 An iyo karikohan nadunot, ngan an iyo mga bado ginkutkot han mga insekto.+
3 An iyo bulawan ngan silber gintaoy, ngan an taoy* hito magigin pamatuod kontra ha iyo ngan mag-uubos han iyo unod. An iyo gintirok magigin sugad hin kalayo ha kataposan nga mga adlaw.+
4 Kitaa! An mga suhol nga waray niyo ihatag ha mga trabahador nga nag-ani ha iyo mga uma padayon nga naguliat, ngan an mga pangaraba para hin bulig han mga mag-arani nakaabot ha mga talinga ni Jehova* han mga hugpo.+
5 Nagkinabuhi kamo ha tuna ha kahimyang ngan pagpatakas ha kalugaringon. Ginpatambok niyo an iyo kasingkasing para ha adlaw han pamatay.+
6 Ginhukman niyo; ginpatay niyo an matadong. Diri ba ginkukontra niya kamo?
7 Salit mga kabugtoan, magin mapailubon kamo tubtob ha presensya han Ginoo.+ Kitaa! An parag-uma padayon nga naghuhulat han presyoso nga bunga han tuna, nga nagpapailob tungod hito tubtob nga umabot an temprano nga uran ngan an urhi nga uran.+
8 Magpailob liwat kamo;+ rig-ona an iyo kasingkasing, kay an presensya han Ginoo hirani na.+
9 Mga kabugtoan, ayaw kamo pagngurutob* kontra ha usa kag usa, basi diri kamo paghukman.+ Kitaa! An Hukom natindog ha atubangan han mga purtahan.
10 Mga kabugtoan, himoa niyo nga susbaranan an pag-antos ha maraot+ ngan an pagpailob+ han mga propeta nga nagyakan ha ngaran ni Jehova.*+
11 Kitaa! Gintatagad naton nga malipayon* adton nagpailob.+ Hinbatian niyo an mahitungod han pagpailob ni Job+ ngan hinbaroan niyo an bendisyon nga iginhatag ni Jehova,*+ nga hi Jehova* malumo hinduro magpalangga* ngan maloloy-on.+
12 Labaw ha ngatanan, mga kabugtoan ko, ayaw na kamo panumpa pinaagi man han langit o pinaagi han tuna o pinaagi han bisan ano nga iba pa nga panumpa. Lugod, an iyo “Oo” sadang mangahulogan hin oo ngan an iyo “Diri,” diri,+ basi diri kamo paghukman.
13 May-ada ba bisan hin-o ha iyo nga nag-aantos hin kakurian? Padayon hiya nga mag-ampo.+ May-ada ba bisan hin-o nga malipayon? Magkanta hiya hin mga salmo.+
14 May-ada ba bisan hin-o ha iyo nga may sakit? Tawagon niya an mga tigurang+ han kongregasyon, ngan paampoon hira para ha iya, nga ginbubutangan hiya hin lana+ ha ngaran ni Jehova.*
15 Ngan an pag-ampo nga may pagtoo makakapaopay ha may sakit,* ngan ibabangon hiya ni Jehova.* Sugad man, kon nakabuhat hiya hin mga sala, papasayloon hiya.
16 Salit bug-os nga igsumat niyo ha usa kag usa an iyo mga sala+ ngan ig-ampo an usa kag usa, basi kamo mag-opay. An pangamuyo han tawo nga matadong may daku gud nga epekto.*+
17 Hi Elias usa nga tawo nga may mga pagbati nga pariho han aton, pero han sinsero nga nag-ampo hiya nga diri umuran, waray umuran ha tuna ha sulod hin tulo ka tuig ngan unom ka bulan.+
18 Katapos, nag-ampo hiya utro, ngan an langit naghatag hin uran ngan an tuna naghatag hin bunga.+
19 Mga kabugtoan ko, kon may bisan hin-o ha iyo nga maisimang tikang ha kamatuoran ngan may usa nga makapabalik ha iya,
20 hibaroi nga an bisan hin-o nga makapabalik ha usa nga makasasala tikang ha iya sayop+ nga dalan magtatalwas ha iya* tikang ha kamatayon ngan magtatabon hin damu nga sala.+
Mga footnote
^ Ha iba nga lugar, “bagà.”
^ O “pagharoy; pagreklamo.” Lit., “panhayhay.”
^ O “mapinairon hinduro.”
^ O “binendisyonan.”
^ O posible nga “ha ginkakapoy.”
^ Lit., “may makusog gud nga pwersa kon nagana ito.”
^ O “iya kalag.”
