Job 14:1-22
14 “An tawo, nga igin-anak han babaye,Halipot an kinabuhi+ ngan damu an problema.*+
2 Nabuklad hiya sugad hin bukad, katapos nalalaya;*+
Napalagiw hiya sugad hin lambong ngan nawawara.+
3 Oo, an imo mata iginsentro mo ha iya,Ngan gindadara mo hiya* basi hukman.*+
4 May-ada ba diri malimpyo nga tawo nga makakag-anak hin malimpyo nga tawo?+
Waray!
5 Kon an iya mga adlaw gindesisyonan na,An kadamu han iya mga bulan nakadepende ha imo;Nagbutang ka hin limitasyon para ha iya basi diri hiya makalahos hito.+
6 Lingiw tikang ha pagkinita ha iya basi makapahuway hiya,Tubtob nga matapos niya an iya adlaw+ pariho hin sinuholan nga trabahador.
7 Kay bisan an kahoy may paglaom.
Kon ginpupulod ito, masaringsing ito utro,Ngan an gudtiay nga mga sanga hito padayon nga matubo.
8 Kon an gamot hito nagigin gurang na ha tuna
Ngan an tuod hito namamatay ha tuna,
9 Makahamot la ito hin tubig mananaringsing ito;Ngan magkakaada ito mga sanga pariho hin bag-o nga tanom.
10 Kondi an tawo namamatay ngan waray na nahihimo;Kon an usa nga tawo nauutdan hin gininhawa, hain na hiya?+
11 An katubigan nawawara tikang ha dagat,Ngan an salog nahubas ngan nagmamara.
12 An tawo nahigda liwat ngan diri nabuhát.+
Diri hira magmamata tubtob nga diri pa nawawara an langit,Ngan diri hira mapupukaw tikang ha ira pagkaturog.+
13 O itago mo unta ako ha Lubnganan,*+
Itago mo unta ako tubtob nga lumabay an imo kasina,Magtanda ka unta hin tubtoban han panahon para ha akon ngan hinumdoman ako!+
14 Kon mamatay an usa nga tawo, mabubuhi pa ba hiya utro?+
Maghuhulat ako ha ngatanan nga adlaw han akon pagin uripon*
Tubtob nga umabot an akon katalwasan.+
15 Matawag ka, ngan mabaton ako ha imo.+
Maghihingyap* ka han buhat han imo mga kamot.
16 Pero yana, gin-iinihap mo an tagsa ko nga pitad;An akon la sala an imo ginbibinantayan.
17 An akon pagtalapas imo iginbutang ha surudlan ngan ginsadhan,Ngan an akon sayop imo ginsadhan pinaagi hin pandukót.
18 Sugad la nga an usa nga bukid natitimpag ngan naaanas
Ngan an usa nga bato natatanggal ha hinmumutangan hito,
19 Sugad la nga ginpapanipis han tubig an mga bato
Ngan gin-aanas han mga sulog hito an tuna,Imo ginbubungkag an paglaom han mortal nga tawo.
20 Padayon nga ginpipirde mo hiya tubtob nga mamatay hiya;+Ginbabag-o mo an iya hitsura, ngan ginpapabaya mo hiya.
21 An iya mga anak ginpapasidunggan, pero diri hiya maaram hito;Nagigin minos hira, pero diri niya ito hinbabaroan.+
22 Inaabat niya an kasakit han iya kalugaringon nga lawas;*
Naabat la hiya* hin kabido samtang buhi pa hiya.”
Mga footnote
^ O “puno hin kasamok.”
^ O posible nga “ngan gin-uutod.”
^ Lit., “ako.”
^ O “gindadara mo hiya ha korte basi magin imo kakontra.”
^ Simboliko nga nagtutudlok ha pagin uripon ha kamatayon.
^ O “Mahihidlaw.”
^ O “samtang aada pa ha iya an iya unod.”
^ O “an iya kalag.”
