Isaias 20:1-6
-
Tigaman kontra ha Ehipto ngan Etiopia (1-6)
20 Han tuig nga ginsugo ni Hadi Sargon han Asirya an Tartan* ngadto ha Asdod,+ nakiggirra hiya ha Asdod ngan ginsakop ito.+
2 Hito nga panahon hi Jehova nagyakan pinaagi kan Isaias+ nga anak ni Amoz, nga nasiring: “Lakat, huboa an sako nga panapton ha imo mga baliatang, ngan hukasa an imo sandalyas.” Ngan ginbuhat niya ito, nga naglalakat-lakat nga hubo* ngan waray sapin an tiil.
3 Katapos, hi Jehova nagsiring: “Sugad la nga an akon surugoon nga hi Isaias naglalakat-lakat nga hubo ngan waray sapin an tiil ha sulod hin tulo ka tuig sugad nga tigaman+ ngan pahamangno kontra ha Ehipto+ ngan Etiopia,+
4 dadad-on liwat han hadi han Asirya an mga bihag nga tikang ha Ehipto+ ngan an mga distyero nga tikang ha Etiopia, mga bata nga lalaki ngan mga lagas nga lalaki, nga mga hubo ngan waray sapin an tiil ngan nakikita an mga bubot, an pagin hubo* han Ehipto.
5 Ngan mahahadlok gud hira ngan ikakaawod nira an Etiopia nga ira ginlalaoman ngan an Ehipto nga ira iginrarakudaku.*
6 Hito nga adlaw an mga umurukoy hini nga lugar ha baybayon masiring, ‘Kitaa an nahitabo ha aton paglaom, nga aton gindangpan basi mangaro hin bulig ngan matalwas tikang ha hadi han Asirya! Paonan-o kita makakapalagiw yana?’”
Mga footnote
^ O “an kumander.”
^ O “karsonsilyo la an sul-ot.”
^ O “ha kaarawdan.”
^ O “nga an pagkamatahom ira naruruyagan.”
