Hagai 1:1-15
1 Ha ikaduha ka tuig ni Hadi Dario, ha ikaunom ka bulan, ha siyahan nga adlaw han bulan, an pulong ni Jehova inabot pinaagi kan Hagai*+ nga propeta ngadto kan Zerubabel+ nga gobernador han Juda nga anak nga lalaki ni Sealtiel, ngan ngadto kan Josue nga hitaas nga saserdote nga anak nga lalaki ni Jehozadak, nga nasiring:
2 “Ini an siring ni Jehova han mga hugpo, ‘Ini nga katawohan nasiring, “Diri pa panahon ha pagtukod* han balay* ni Jehova.”’”+
3 Ngan an pulong ni Jehova inabot utro pinaagi kan Hagai+ nga propeta, nga nasiring:
4 “Panahon ba ini nga umukoy kamo ha iyo mag-opay nga mga balay, samtang ini nga balay guba?+
5 Yana, ini an siring ni Jehova han mga hugpo, ‘Tagi niyo hin atensyon* an iyo ginbubuhat.
6 Damu nga binhi an iyo iginsabwag, pero gutiay la an iyo ani.+ Nakaon kamo, pero diri kamo nabubusog. Nainom kamo, pero diri kamo nakukontento. Nagsusul-ot kamo hin bado, pero waray bisan usa nga naabat hin kapaso. An usa nga sinuholan nga trabahador nagbubutang han iya suhol ha supot nga buho-buho.’”
7 “Ini an siring ni Jehova han mga hugpo, ‘Tagi niyo hin atensyon* an iyo ginbubuhat.’
8 “‘Sagka kamo ha bukid ngan pagdara tikang didto hin mga kahoy.+ Ngan tukora an balay,+ basi malipay ako hito ngan mahimaya ako,’+ nasiring hi Jehova.”
9 “‘Naglalaom kamo hin damu pero gutiay la an iyo nakakarawat; ngan han gindara niyo ito ngadto ha balay, ginhuyop ko ito.+ Ha ano nga rason?’ nasiring hi Jehova han mga hugpo. ‘Tungod kay an akon balay guba, samtang an tagsa ha iyo sagipo ha pagpanginano han iya kalugaringon nga balay.+
10 Salit ginpugngan han langit ha bawbaw niyo an tun-og hito, ngan an tuna waray maghatag hin bunga.
11 Ngan nagpahinabo ako hin huraw nga nakaapekto ha tuna, ha kabukiran, ha mga lugas,* ha bag-o nga bino, ha lana, ha mga natubo ha tuna, ha mga tawo ngan mga hayop, ngan ha ngatanan nga iyo gintatrabaho.’”
12 Hi Zerubabel+ nga anak ni Sealtiel+ ngan hi Josue nga hitaas nga saserdote nga anak ni Jehozadak,+ ngan an ngatanan nga iba pa han katawohan namati ha tingog ni Jehova nga ira Dios ngan ha ginsiring ni Hagai nga propeta, kay ginsugo hiya ni Jehova nga ira Dios; ngan an katawohan nagkaada hin kahadlok kan Jehova.
13 Katapos, hi Hagai nga mensahero ni Jehova, nagsumat hini nga mensahe ha katawohan uyon ha sugo ha iya ni Jehova: “‘Kaupod ako niyo,’+ nasiring hi Jehova.”
14 Salit ginpagios ni Jehova an espiritu+ ni Zerubabel nga gobernador han Juda+ nga anak ni Sealtiel, ngan an espiritu ni Josue+ nga hitaas nga saserdote nga anak ni Jehozadak, ngan an espiritu han ngatanan nga iba pa han katawohan; ngan nagkaabot hira ngan nagtikang pagtrabaho han balay ni Jehova han mga hugpo, nga ira Dios.+
15 Nahitabo ini han ika-24 ka adlaw han ikaunom ka bulan ha ikaduha ka tuig ni Hadi Dario.+
Mga footnote
^ Nangangahulogan nga “Natawo han Piyesta.”
^ O “pagtukod utro.”
^ O “templo.”
^ O “Hunahunaa hin maopay.”
^ O “Hunahunaa hin maopay.”
