Surat ha mga Taga-Colosas 2:1-23
2 Kay karuyag ko nga masantop niyo an akon duro nga pangalimbasog para ha iyo ngan para ha mga taga-Laodicea+ ngan para ha ngatanan nga waray makakita hin personal ha akon.*
2 Ginbubuhat ko ini basi an ira kasingkasing maliaw+ ngan magkaurosa hira ha gugma+ ngan magkaada han ngatanan nga karikohan nga resulta han bug-os nga kasiguradohan han ira pagsabot, basi magkaada husto nga kahibaro han sagrado nga tinago han Dios, nga amo an Kristo.+
3 Nakatago hin maopay ha iya an ngatanan nga bahandi han kinaadman ngan han kahibaro.+
4 Ginsisiring ko ini basi waray bisan hin-o nga makaglimbong ha iyo pinaagi hin makakombinse nga mga argumento.
5 Bisan kon waray ako dida, aada ha iyo an akon hunahuna,* nagrarayhak ako nga makita an iyo pagkaorganisado+ ngan an karig-on han iyo pagtoo ha Kristo.+
6 Salit, sugad la nga ginkarawat niyo an Ginoo nga hi Kristo Jesus, padayon nga maglakat kamo nga kahiusa niya,
7 nga nakagamot hin marig-on ngan nakatukod ha iya+ ngan marig-on an pagtoo,+ sugad la han igintutdo ha iyo, ngan nagsasap-ay hin pagpasalamat.+
8 Pag-ikmat nga waray magbihag ha iyo* pinaagi han pilosopiya ngan waray pulos nga panlimbong+ nga uyon ha tradisyon han tawo, uyon ha basihan nga mga prinsipyo han kalibotan ngan diri uyon ha Kristo;
9 kay an ngatanan han kabug-osan nga kalidad han Dios naukoy ha iya.+
10 Salit nagkaada kamo hin kabug-osan pinaagi ha iya, nga amo an ulo han ngatanan nga gobyerno ngan awtoridad.+
11 Pinaagi han iyo relasyon ha iya, ginturi liwat kamo pinaagi han pagturi nga ginhimo diri han mga kamot kondi pinaagi han pagkuha han unudnon nga lawas,+ pinaagi han pagturi nga kanan Kristo.+
12 Kay iginlubong kamo upod niya ha iya bawtismo,+ ngan pinaagi han iyo relasyon ha iya ginbuhi liwat+ kamo nga magkaupod pinaagi han iyo pagtoo ha gamhanan nga buhat han Dios, nga nagbuhi ha iya tikang ha mga patay.+
13 Dugang pa, bisan kon patay kamo tungod han iyo mga pagtalapas ngan han pagin diri turi han iyo unod, ginbuhi kamo han Dios basi makaupod an Kristo.+ May pagkabuotan nga ginpasaylo niya an ngatanan naton nga pagtalapas+
14 ngan ginpara an sinurat nga dokumento+ nga ginkukompwesto hin mga sugo+ ngan nakontra ha aton.+ Ginkuha niya ito pinaagi ha pagraysang hito ha pasakitan nga kahoy.*+
15 Ginhuboan niya an mga gobyerno ngan an mga awtoridad ngan iginpakita hira ha publiko sugad nga napirde,+ gindadara hira dida ha martsa han kadaogan pinaagi hito.*
16 Salit ayaw niyo pasagdi nga hukman kamo han bisan hin-o mahitungod han iyo ginkakaon ngan gin-iinom+ o mahitungod han pagsaurog hin piyesta o han dulom+ o hin sabbath.+
17 Ito nga mga butang lambong* han tiarabot nga mga butang,+ pero an reyalidad kanan Kristo.+
18 Ayaw tuguti nga may tawo nga magpugong ha iyo nga makarawat an premyo,+ nga nalilipay ha diri tinuod nga pagkamapainubsanon ngan ha paagi han pagsingba ha mga anghel, nga “gin-iinsister niya”* an mga butang nga iya nakita. Ha pagkamatuod, nagpapahitaas hiya nga waray husto nga hinungdan pinaagi han iya unudnon nga panhunahuna,
19 ngan diri hiya nagpapabilin ha ulo,+ ha usa nga pinaagi ha iya an bug-os nga lawas nasusuplayan ngan ginturugkop hin maopay pinaagi han mga kaluluthan ngan mga litid hito ngan natubo pinaagi han gahum han Dios.+
20 Kon namatay kamo kaupod han Kristo may kalabotan ha basihan nga mga prinsipyo han kalibotan,+ kay ano nga nagkikinabuhi kamo nga sugad hin bahin pa kamo han kalibotan pinaagi han iyo padayon nga pagsunod hini nga mga sugo:+
21 “Ayaw pagkuha, ayaw liwat pagtilaw, ayaw liwat pagkapot,”
22 nga nagtutudlok ha mga butang nga nawawara ngatanan katapos gamiton, uyon ha mga sugo ngan mga katutdoan han mga tawo?+
23 Bisan kon ito nga mga butang baga hin maaramon pagkit-on ha paagi han pagsingba nga uyon ha kalugaringon nga kaburut-on ngan ha diri tinuod nga pagkamapainubsanon, usa nga duro nga pagpasakit ha lawas,+ waray ito pulos ha pag-ato ha mga hingyap han unod.
Mga footnote
^ Lit., “waray makakita han akon nawong ha unod.”
^ Lit., “kaupod ako niyo ha espiritu.”
^ O “magdara ha iyo sugad nga iya biktima.”
^ O posible nga “ha iya.”
^ Ha iba nga lugar, “dagaw.”
^ Ginkotar tikang ha pagano nga misteryo nga mga seremonya.
