An Ikaduha nga Surat kan Timoteo 4:1-22
4 Seryoso nga ginsusugo ko ikaw ha atubangan han Dios ngan ni Kristo Jesus, nga maghuhukom+ han mga buhi ngan han mga patay,+ ngan pinaagi han iya pagpadayag+ ngan han iya Ginhadian:+
2 Isangyaw an pulong;+ ayaw paglangan ha pagbuhat hini ha mag-opay nga mga panahon ngan ha magkuri nga mga panahon; pagsaway,+ pagbadlong, pagsagdon, nga may pagkapasensyoso ngan arte ha pagtutdo.+
3 Kay maabot an usa ka peryodo han panahon nga an mga tawo diri mamamati han maopay* nga katutdoan,+ kondi uyon ha ira mga hingyap, papalibotan nira an ira kalugaringon hin mga magturutdo nga maggigiritikgitik* han ira mga talinga.*+
4 Diri hira mamamati han kamatuoran, ngan maghahatag hin atensyon ha buwa nga mga istorya.
5 Pero ikaw, tipigi an imo maopay nga panhunahuna ha ngatanan nga butang, iloba an kakurian,+ buhata an buruhaton han usa nga ebanghelisador,* bug-os nga tumana an imo ministeryo.*+
6 Kay iginhuhuwad na ako pariho hin halad nga irimnon,+ ngan hirani na an panahon han akon kagawasan.+
7 Nakig-away ako han maopay nga pakig-away,+ natapos ko an rumba,+ natipigan ko an pagtoo.
8 Tikang yana, nakareserba na ha akon an korona han pagkamatadong+ nga ihahatag ha akon han Ginoo, an matadong nga hukom,+ sugad nga premyo hito nga adlaw,+ pero diri la ha akon, kondi pati ha ngatanan nga naghihingyap han iya pagpadayag.
9 Pangalimbasog gud nga makakadi ka dayon ha akon.
10 Kay ginbayaan ako ni Demas+ tungod kay nahigugma hiya ha presente nga sistema han mga butang,* ngan kinadto hiya ha Tesalonica; hi Cresente kinadto ha Galacia, hi Tito kinadto ha Dalmacia.
11 Hi Lucas la an akon kaupod. Iupod hi Marcos kay makakabulig hiya ha akon ha ministeryo.
12 Pero ginpakadto ko hi Tiquico+ ha Efeso.
13 Pagkadi mo, dad-a an kurigmos nga ginbilin ko kan Carpo ha Troas, ngan an mga linukot nga basahon, labi na an mga pergamino.*
14 Hi Alejandro nga panday hin tumbaga* nagbuhat hin damu nga karaotan ha akon. Mabulos ha iya hi Jehova* uyon ha iya mga buhat.+
15 Pag-ikmat liwat ha iya, kay nakontra gud hiya ha aton mensahe.
16 Ha akon siyahan nga pagdepensa waray dinapig ha akon, lugod ginbayaan ako nira ngatanan—hinaot diri hira magkaada baratunon.
17 Pero an Ginoo tinindog hirani ha akon ngan gintagan ako hin gahum, basi pinaagi ha akon bug-os nga matuman an pagsangyaw ngan makabati hito an ngatanan nga nasud;+ ngan gintalwas ako tikang ha baba han leon.+
18 An Ginoo magsasalbar ha akon tikang ha ngatanan nga karaotan ngan magtatalwas ha akon para ha iya Ginhadian ha langit.+ Iya an himaya ha kadayonan, oo ha kadayonan. Amen.
19 Ipaabot an akon pangumusta kanda Prisca ngan Aquila+ ngan ha panimalay ni Onesiforo.+
20 Hi Erasto+ nagpabilin ha Corinto, pero ginbilin ko hi Trofimo+ ha Mileto kay may sakit hiya.
21 Pangalimbasog gud nga makaabot ka antes an kathagkot.
Nangungumusta ha imo hi Eubulo, sugad man hira Pudente ngan Lino ngan Claudia ngan an ngatanan nga kabugtoan.
22 An Ginoo maada unta ha maopay nga disposisyon nga imo iginpapakita. Hinaot makarawat niyo an iya diri matupngan nga pagkabuotan.
Mga footnote
^ O “magguguyok.”
^ O “magsusumat ha ira han karuyag nira mabatian.”
^ O “makapahimsog; mapulsanon.”
^ O “padayon nga isangyaw an maopay nga sumat.”
^ Karuyag sidngon, an anit nga mga linukot nga basahon.
^ Ha Ingles, copper.
