An Ikaduha nga Surat ha mga Taga-Corinto 9:1-15
9 Yana mahitungod han ministeryo* nga para ha mga baraan,+ diri na gud kinahanglan nga magsurat pa ako ha iyo,
2 kay maaram ako han iyo pagin disidido nga akon iginhahambog ha mga taga-Macedonia, nga an Acaya usa ka tuig na nga andam, ngan an iyo kadasig nakaaghat ha kadam-an ha ira.
3 Pero ginpapakada ko an kabugtoan, basi an amon paghambog mahitungod ha iyo diri magin waray pulos may kalabotan hini ngan basi magin andam gud kamo, sugad la han akon ginsiring nga andam na kamo.
4 Kay kon diri, kon umupod ha akon an mga taga-Macedonia ngan makita nga diri kamo andam, mahibubutang kami ha kaarawdan, diri la kamo, tungod han amon pagsarig ha iyo.
5 Salit naghunahuna ako nga kinahanglan aghaton an kabugtoan nga mag-una pagkada ha iyo ngan iandam nga daan an iyo iginsaad nga regalo, basi maiandam ito sugad nga regalo tungod han pagin mahinatagon, ngan diri sugad nga butang nga ginpangilkil.*
6 Pero mahitungod hini, an bisan hin-o nga nagsasabwag hin gutiay mag-aani liwat hin gutiay, ngan an bisan hin-o nga nagsasabwag hin damu mag-aani liwat hin damu.+
7 Buhaton han kada tagsa an uyon ha nagin desisyon han iya kasingkasing, nga diri kontra-gusto* o napipiritan,+ kay an Dios nahigugma ha malipayon nga nahatag.+
8 Dugang pa, mahihimo han Dios nga an ngatanan niya nga diri matupngan nga pagkabuotan mahura ha iyo basi pirme kamo magin supisyente ha ngatanan nga butang, sugad man mahura kamo para ha tagsa nga maopay nga buhat.+
9 (Sugad la han nahisurat: “Nahatag hiya hin damu gud;* nahatag hiya ha mga pobre. An iya pagkamatadong nagpapadayon ha waray kataposan.”+
10 Yana an Dios nga hura nga nagsusuplay hin binhi ha paragsabwag ngan tinapay nga kakaunon magsusuplay ngan magpapadamu han binhi para mahisabwag niyo, ngan dudugangan niya an ani han iyo pagkamatadong.)
11 Ha ngatanan nga butang hura nga ginbibendisyonan kamo basi magin mahinatagon kamo ha ngatanan nga paagi, nga pinaagi ha amon an sugad nga pagkamahinatagon nagriresulta hin kapahayagan han pagpasalamat ha Dios;
12 tungod kay an ministeryo hini nga pagserbi ha publiko diri la para hura nga magtagana han panginahanglan han mga baraan+ kondi basi magin hura liwat hin damu nga kapahayagan han pagpasalamat ha Dios.
13 Pinaagi han pamatuod nga iginhahatag hini nga ministeryo ha pagbulig, ginhihimaya nira an Dios tungod kay mapinasakupon kamo ha maopay nga sumat mahitungod han Kristo, sugad han iyo iginpapasamwak ha publiko, ngan tungod kay mahinatagon kamo ha iyo paghatag hin kontribusyon para ha ira ngan ha ngatanan.+
14 Ngan upod an pangamuyo para ha iyo, iginpapahayag nira an pagpalangga ha iyo tungod han diri matupngan nga pagkabuotan han Dios ha iyo.
15 Salamat ha Dios tungod han iya diri maihulagway nga regalo nga waray bayad.
