Ano ha imo paghunahuna?

•   May peligro ba an pagkonsulta ha horoscope, Ouija board, o mga saykik?

•   An mga istorya ba may kalabotan ha okultismo mga susmatanon la​—usa nga simboliko nga away butnga han kaopayan ngan karaotan—​o tinuod ngan peligroso ito?

 Hihisgotan hini nga artikulo kon kay ano nga an espiritismo baga hin makapainteres ngan kon kay ano nga kinahanglan ka magin mabinantayon.

•  Kay ano nga makapainteres ito?

•  Kay ano nga kinahanglan magin mabinantayon?

•  An puydi mo himoon

•  An ginsisiring han iba nga batan-on

 An industriya han kaliawan nagkakaada daku nga kità tungod han okultismo nga tema, nagpokus hira ha paghimo hin mga pelikula, salida ha TV, video game, ngan mga libro nga nakasentro hito. Sugad nga resulta, damu nga batan-on an nagkaada interes ha mga butang sugad han astrolohiya, demonyo, bampira, ngan pamarang. Kay ano? Ini an pipira nga rason:

•   Pagkamausisa: Basi mahibaroan kon may-ada gud ba espiritu nga mga persona

•   Kabaraka: Basi mahibaroan kon ano an mahitatabo ha tiarabot nga panahon

•   Relasyon: Basi makaistorya an namatay na nga hinigugma

 Diri man sayop ini nga mga rason. Pananglitan, natural la ha aton nga hunahunaon kon ano an mahitatabo ha tiarabot o mingawon ha usa nga namatay nga hinigugma. Pero may mga peligro nga kinahanglan mo mahibaroan.

 An Biblia marig-on nga nagpapahamangno kontra ha bisan ano nga konektado ha espiritismo. Pananglitan, ito nasiring:

 “Kinahanglan waray maagian dida ha iyo nga . . . bisan hin-o nga nagbubuhat hin panigo, bisan hin-o nga nagbubuhat hin madyik, bisan hin-o nga namimiling hin mga tigaman, barangan, bisan hin-o nga paralumay, bisan hin-o nga nakonsulta hin espiritista o hin parapanigo, o bisan hin-o nga napakiana ha patay. Kay an bisan hin-o nga nagbubuhat hini nga mga butang mangil-ad kan Jehova.”​—Deuteronomio 18:10-12.

 Kay ano nga marig-on nga igindidiri han Biblia an espiritismo?

•   An espiritismo nag-aaghat hin pakigsangkay ha mga demonyo. Igintututdo han Biblia nga an pipira nga anghel nagrebelde ha Dios ngan nagin iya mga kaaway. (Genesis 6:2; Judas 6) Inin magraot nga anghel nga gintatawag nga mga demonyo, nanlilimbong ha mga tawo pinaagi ha mga espiritista, parapanigo, ngan ha mga nagbubuhat hin madyik ngan astrolohiya. Kon nagbubuhat kita hini, nagigin sangkay kita han mga kaaway han Dios.

•   An espiritismo nag-aaghat han buwa nga katutdoan nga may partikular nga mga tawo nga kaya mahibaro han tiarabot. Pero, an Dios la an makakasiring: “Tikang ha tinikangan akon igintatagna an magigin resulta, ngan tikang ha kadaan nga panahon an mga butang nga waray pa buhata.”​—Isaias 46:10; Santiago 4:13, 14.

•   An espiritismo nag-aaghat han buwa nga katutdoan nga an mga patay puydi makiistorya ha mga buhi. Pero, an Biblia nasiring: “An mga patay diri maaram han bisan ano . . . Waray buruhaton o pagplano o kahibaro o kinaadman ha Lubnganan.”​—Eclesiastes 9:5, 10.

 Tungod hito nga mga rason, ginsasalikway han mga Saksi ni Jehova an mga buruhaton nga konektado ha espiritismo. Ginlilikyan liwat nira an mga kaliawan nga nag-uupod han mga butang sugad han zombie, bampira, ngan ingkanto. “Kon may-ada ito bisan ano nga bahin han espiritismo,” siring han usa nga batan-on nga hi Maria, “diri ako angay magkita hito.” a

•   Magin determinado nga “magkaada limpyo nga konsensya” ha atubangan ni Jehova pinaagi ha paglikay ha bisan ano nga buhat o kaliawan nga konektado ha okultismo.​—Buhat 24:16.

•   Idispatsar an bisan ano nga butang nga konektado ha okultismo nga may-ada ka. Basaha an Buhat 19:19, 20, ngan tigamni an maopay nga ehemplo han siyahan-siglo nga mga Kristiano may kalabotan hini.

 Hinumdumi ini: Kon ginsasalikway mo an mga buhat ngan kaliawan nga konektado ha okultismo, iginpapakita mo nga nadapig ka kan Jehova. Ngan nakakapalipay ito ha iya!​—Proberbios 27:11.