PAKIANA HAN MGA BATAN-ON
Okey La ba an Akon Hitsura?
Kay ano nga dapat mo pilion an imo iginsusul-ot? Kay an imo pamado nagsusumat hin mensahe. Ano nga mensahe an iginsusumat han imo pamado?
Tulo nga dagku nga sayop ha pamado ngan kon paonan-o ito malilikyan
Sayop #1: An pagpaimpluwensya ha media kon paonan-o ka mamamado.
“Danay naiengganyo ako nga sumunod ha uso kay damu nga adbertisment an akon nakikita parte hito,” siring han tin-edyer nga hi Theresa. “Kon pirme ka nakakakita hin mga tawo nga nakasul-ot hin usa nga partikular nga bado, naaaghat ka liwat nga magsul-ot hito.”
Diri la an kababayin-an an naaapektohan han mga adbertisment. “Naiimpluwensyahan liwat an kalalakin-an ha mga uso nga estilo han pamado,” siring han libro nga The Everything Guide to Raising Adolescent Boys. “Bisan mga bata pa hira, may mga adbertisment na nga gindisenyo para impluwensyahan hira.”
An mas maopay buhaton: An Biblia nasiring: “An tawo nga waray eksperyensya natoo ha tagsa nga pulong, pero an maaramon nga tawo naghuhunahuna hin maopay han iya tagsa nga pitad.” (Proberbios 14:15) Uyon hini nga prinsipyo, batasana an pag-usisa anay ha kon ano an iginpapakita ha imo han mga adbertisment. Pananglitan, kon an usa nga bado iginpapatalastas sugad nga “moderno an estilo” o magigin “seksi” ka kitaon kon isusul-ot mo ito, pakianhi an imo kalugaringon:
‘Hin-o gud ba an makakaganansya kon susundon ko ito nga uso?’
‘Ano an magigin pagkita ha akon han iba kon ito nga bado an akon isusul-ot?’
‘Iginpapakita ba hito kon ano gud ako ngan an akon gintotoohan?’
Tip ha pagpili hin bado: Ha sulod hin usa ka semana, kon makakita ka hin mga adbertisment parte hin mga bado, pakianhi an imo kalugaringon: ‘Ano nga klase hin pagkinabuhi an ira igin-aaghat? Ginkukombinse ba ako hito nga kinahanglan ko paliton ito basi makasunod ha uso?’ “Makusog gud an presyur nga magin perfect ka pagkit-on, magin perfect an imo pamado, ngan ipakita an imo ‘perfect’ nga lawas,” siring han tin-edyer nga hi Karen. “Maaram an mga negosyante nga ito an inaabat han mga batan-on, salit ginsasalingabot nira ito.”
Sayop #2: Pagsubad ha popular nga estilo basi la magin pariho ha kadam-an.
“Kon popular an usa nga partikular nga estilo han bado,” siring han tin-edyer nga hi Manuel, “ginsusubad ito han ngatanan. Kon diri mo ito susubdon, diri ka magigin popular.” Nauyon hito an tin-edyer nga hi Anna. “Diri na an estilo han pamado an nagigin importante, kondi kon kakarawaton ka ba han iba,” siring niya.
An mas maopay buhaton: An Biblia nasiring: “Ayaw na kamo pagpamolde hini nga sistema han mga butang.” (Roma 12:2) Uyon hini nga sagdon, usisaha an imo mga bado ngan pakianhi an imo kalugaringon:
‘Ano an nakakaimpluwensya ha akon ha akon pagpili hin bado?’
‘Ano kaimportante ha akon an pagkaada hin bado nga may tatak?’
‘Karuyag ko ba maimpres an mga tawo ha akon pamado?’
Tip ha pagpili hin bado: Imbes nga duha la an pagpilian—uso (ngan naruruyagan) o diri uso (ngan diri naruruyagan)—hunahunaa an ikatulo nga opsyon: pagkaada kompyansa ngan pagin komportable ha kalugaringon. Kon sugad ka hito, diri ka mababaraka kon ano an huhunahunaon ha imo han iba.
Sayop #3: An panhunahuna nga kon ‘mas seksi, mas maopay.’
“Ha tinuod la, danay baga’n karuyag ko magsul-ot hin bado nga diri angayan, iton sobra kahalipot o sobra ka-fitting,” siring han batan-on nga hi Jennifer.
An mas maopay buhaton: An Biblia nasiring: “An iyo pagpahusay diri sadang magin ha gawas la . . . lugod pahusaya an sulod nga pagkatawo han kasingkasing.” (1 Pedro 3:3, 4) Uyon hini nga sagdon, hunahunaa kon ano an mas importante—an pagin maopay pagkit-on o pagin maopay nga tawo.
Tip ha pagpili hin bado: An nakakahimo gud ha usa nga magin makaruruyag amo an pagin desente. Oo, ito nga pulong diri popular yana. Pero hunahunaa ini:
May nakaistorya ka na ba nga mayakan hinduro ngan parte la ha iya kalugaringon an iya igin-iinistorya? Makasurubo, posible nga diri nahuhunahuna hito nga tawo nga diri ka na naayon ha iya!
An pamado, pariho ha pakig-istorya, mahimo magpakita nga makikalugaringon ka, salit diri naayon ha imo an iba
Kon diri desente an imo pamado, nagigin pariho ka hito nga tawo. An imo pamado sugad hin nasiring ‘kitaa ako,’ ngan mahimo hunahunaon han iba nga insecure ka o an imo la kalugaringon an imo ginhuhunahuna. Mahimo liwat ito magpasabot nga desperado ka nga makuha an atensyon han iba—bisan an diri angayan nga atensyon.
Kon diri mo karuyag an sugad nga klase hin atensyon, pagbado hin desente. “An desente nga pamado diri nagpapasabot nga kinahanglan mo subaron an pamado han imo lola,” siring han tin-edyer nga hi Monica. “Nagpapasabot la ito nga ginrirespeto mo an imo kalugaringon ngan an iba.”
