•  Kay ano nga kinahanglan ko mag-exercise?

•  Ano an nakakaulang ha akon?

•  Paonan-o ako makakag-exercise basi magin mahimsog ako?

•  Magin balanse

•  An ginsisiring han iba nga batan-on

 Ha iba nga nasud, diri masyado aktibo ha pisikal an mga batan-on, ngan makakaraot ito ha ira kahimsog. Salit may maopay nga rason an Biblia ha pagsiring nga “an pagbansay ha lawas may . . . kapulsanan.” (1 Timoteo 4:8) Tagda an masunod:

•   An pag-exercise makakapaopay han imo pag-abat. Kon nagbubuhat ka hin pisikal nga aktibidad, nagpapagawas an imo utok hin mga kemikal nga gintatawag nga endorphin, nga nakakaparelaks ngan nakakapalipay ha imo. Para ha iba, an pag-exercise natural nga pangontra ha depresyon.

   “Kon nagjo-jogging ako temprano ha aga, nagigin mas produktibo ngan malipayon an akon bug-os nga adlaw. An pag-jogging nakakaopay han akon mood.”​—Regina.

•   An pag-exercise makakaopay han imo hitsura. An balanse nga exercise makakabulig ha imo nga magin mas makusog, mas mahimsog, ngan magkaada kompyansa ha kalugaringon.

   “Nalilipay gud ako kay nakakanapulo na ako nga chin-up​—han naglabay nga tuig, diri ko kaya an bisan usa la! An pinakaimportante, maaram ako nga gin-aataman ko an akon lawas.”​—Olivia.

•   An pag-exercise makakapahilaba han imo kinabuhi. An pagin aktibo makakabulig ha imo cardiovascular ngan respiratory system. An pag-aerobics makakabulig liwat nga malikyan an sakit ha kasingkasing​—usa han nangunguna nga hinungdan han kamatayon han kalalakin-an ngan kababayin-an.

   “Kon may-ada kita eskedyol ha pag-exercise, iginpapakita naton ha aton Maglalarang nga gin-aapresyar naton an lawas nga iya iginhatag ha aton.”​—Jessica.

 Hinumdumi: An pag-exercise may daku gud nga benepisyo ha aton kahimsog yana ngan pati ha maabot nga panahon. “Diri ka gud masiring, ‘Unta waray ako mag-hiking o mag-jogging,’” siring han batan-on nga babaye nga hi Tonya. “Kon nangangalimbasog ako nga mag-exercise ngan diri naghihimo hin mga pasangil, diri ko gud ito ginbabasolan.”

 Ini an pipira han posible nga mga ulang:

•   Waray rason nga mag-exercise. “Pagkita ko, ginhuhunahuna han mga batan-on nga diri hira magkakasakit. Diri mo naiimadyin nga maabot an panahon nga magkakasakit ka. Para ha imo, problema la ito han mga lagas.”​—Sophia.

•   Waray panahon. “Tungod kay busy ako, kinahanglan ko mag-eskedyol hin panahon ha pagkaon ngan ha pagkaturog, pero an pagkaada panahon ha pag-exercise pirme gud mas makuri.”​—Clarissa.

•   Waray membership ha gym. “Magastos an pag-maintain hin maopay nga lawas​—kinahanglan mo magbayad kon karuyag mo mag-gym.”​—Gina.

 Hunahunaa ini:

 Ano an nakakaulang gud ha imo ha pag-exercise? Kinahanglan an pangalimbasog basi malamposan ito nga ulang, pero maopay gud an mga resulta hito.

 Iini an pipira nga suhestyon:

•   Magin responsable ha imo kahimsog.​—Galacia 6:5.

•   Ayaw paghimo hin mga pasangil. (Eclesiastes 11:4) Pananglitan, diri mo kinahanglan kumadto ha gym para la makag-exercise. Pamiling hin buruhaton nga mai-enjoy mo ngan himoa ito nga imo rutina.

•   Basi magkaada ka ideya, pakianhi an iba kon ano an ira exercise.​—Proberbios 20:18.

•   Magkaada eskedyol. Paghimo hin mga goal, ngan irekord an mag-opay nga resulta basi pirme ka ganahan nga mag-exercise.​—Proberbios 21:5.

•   Pamiling hin makakaupod ha pag-exercise. Kon makakabiling ka hin pirme mo makakaupod ha pag-exercise, maaaghat ngan mabubuligan ka niya nga ipadayon an imo rutina.​—Eclesiastes 4:9, 10.

•   Laumi nga usahay bangin diri ka makag-exercise, pero kon mahitabo ito, ayaw pag-undang.​—Proberbios 24:10.

 An Biblia nag-aaghat ha kalalakin-an ngan kababayin-an nga magin “kontrolado an pamatasan.” (1 Timoteo 3:2, 11) Salit magin balanse ha pag-exercise. Kaurogan nga diri maopay an resulta han sobra nga pag-exercise. “Kon mas importante ha usa nga lalaki an iya pisikal nga hitsura kay han pagkaada kahibaro, diri ako naa-attract ha iya,” siring han batan-on nga babaye nga hi Julia.

 Paghirot ha mga sagdon nga magduduso ha imo nga buhaton an mga butang nga diri makakaopay ha imo. An sugad nga sagdon makakadaot ha imo ha pisikal ngan mahimo magin hinungdan nga mawara an imo pokus ha “mas importante nga mga butang.”​—Filipos 1:10.

 Dugang pa, an mga butang nga gindisenyo basi mag-aghat ha imo nga mag-exercise, ha pagkamatuod, mahimo makagwara han imo gana. An batan-on nga babaye nga hi Vera nagsiring: “Damu nga daraga an nangungolekta hin mga piktyur han mga tawo nga karuyag nira subaron an lawas, ngan ginkikinitaan nira ito nga mga piktyur kon diri hira gin-gaganahan nga mag-exercise. Pero ginkukompara la lugod nira an ira kalugaringon hito nga mga tawo ngan nasusubo hira. Mas okey kon magigin goal mo nga magin mas maopay an imo kahimsog, diri la an imo hitsura.”