Watuminpen dun pauwaꞌa zii pidian kadyz daꞌy, pauwaꞌu nii zii wa aichipan ydaꞌy. Naꞌapaꞌu idiaꞌanaꞌu nii waminhaydaꞌychipan maꞌuzaka wyryy pidian tym. Naꞌap kapam, watuminpen dun pauwaꞌa zii Yewah daꞌy, pauwaꞌu nii zii wa aichipan ykadyz kid daꞌy, naꞌik wamaꞌuzakadan nii waminhaydaꞌychipan yryy. Kainhaꞌa dirib Tuminkery kadyz kid, mazan paminhaꞌytamkid puwaꞌaꞌu zii ymanawynyn — Ymaꞌuzkan, yaichipaban, sakichipaꞌu yxaꞌapatinhan naꞌik ykamarainpenyn.

“Ymanawynyꞌuraz Yewah Tuminkery! Pygary tumaꞌuraz aukaz naꞌik imiꞌi baara pymaꞌuzkan idiaꞌan.” — JEREMIAH (JEREMIAS) 32:17.

Ipei aimeakan Tuminkery tumini aidyan maꞌuzkaꞌu manawyn yryy. Kanum piabat pymada diꞌit pykudichan dun panib it wakandan pyꞌy? Kamuu wichan. Yryy idiaꞌan piabat Tuminkery maꞌuzkan pymada diꞌit. Naꞌapauram kamuu tumkau? Kamuu nazu ii pauwaꞌa zii ywichan 15 milhões de graus Celsius ai. Ipei segundo, kamuu kudichi kidian pamaꞌuzkan, ikudazuꞌu centenas de milhões ydary kidiaꞌu bombas nucleares kawanyꞌu.

Mazan wyryy kamuu kaikesudiꞌu bauran ydary kidiaꞌu wiznhau ai, trilhões ydiriben Universo idiaꞌa. Pabiꞌi kid wiz ydary kidiaꞌu manawyn, kainhaꞌa baydap wiz ydakutkau UY Scuti. Cientistanau kian yidaryn 1.700  pauwaꞌa zii kamuu ai. Wyryy wiz UY Scuti ydaryꞌu manawyn, ymyydkau dun man kamuu wadayn nii, imiꞌi baara naꞌik ipei mynap kidiaꞌu planetas, Marte naꞌik Júpiter kawynyꞌu, y yidaryn wazuutan nii inhau. Yryy idiaꞌan tyryy wa aichipan kaimenaimen naꞌapauram profeta Jeremias kiaꞌazun, ykian dun Yewah Tuminkery ymanawynyꞌu, pamaꞌuzkan idiaꞌan ytuman aukaz naꞌik imiꞌi baara, wyryy Universo.

Naꞌap dii wakaminkeꞌytkau Tuminkery maꞌuzkan idiaꞌan? Tuminkery tuminii kid idiaꞌanaꞌu wakakypan, ytumini kamuu naꞌik ipei kaimen kidiaꞌu aimeakan waikudaniaz imiꞌi baara idiaꞌa. Naꞌik Tuminkery pamaꞌuzkan idiaꞌan ykaminkeꞌyt pidiannau baydap baydap kid. Naꞌapam? Disu maxaapankan dun imiꞌi baaraꞌa, Tuminkery taanii pamaꞌuzkan yꞌat yxaꞌapat kinha nii ymanawyn kidiaꞌu aimeakan. Tuminkery Karichian kian: “Ixaawynyꞌu, tyryy ytykpan, machiꞌik kaꞌu, chiꞌik, kabixuꞌu kichanaꞌik kiaꞌu bixui  id, kaimen ybixu manakan, makinhaꞌu abat, maukaꞌu, kakydkau puwaa it.” (Matthew [Mateus] 11:5) Mazan kanum Tuminkery xaꞌapat waꞌat aizii? Tuminkery Karichian kian “ytaa maꞌuzakary mizainhaꞌu at”. Naꞌik ykian kapam: “Mixidiainhawyz Yewah maꞌuzakadkau nii pauwaꞌa it.” (Isaiah [Isaías] 40:29, 31) Tuminkery taan nii “maꞌuzakary” kaminkeꞌytaꞌu nii waynau wadubtan dun kaxaꞌapannaa kidiaꞌu. (2 Corinthians [2 Coríntios] 4:7) Naꞌapam piꞌitiimen, pidian kaminhaydaꞌytinpen dun kamarainpenyꞌu Tuminkery tym, kaimenaꞌu man wyryy?

“Yewah, dirib pytumini kid. Piaichipaban idiaꞌan pytuman ipei inhau.” — PSALM (SALMO) 104:24.

Watuminpen dun pauwaꞌa zii Tuminkery tumini kid daꞌy, pauwaꞌu nii zii wa aichipan naꞌapam yryy aichipabaꞌu manawyn. Kainhaꞌa tuminhap kinhei dakutkau biomimética. Cientistanau tuminpeꞌuraz biomimética daꞌy, intuminpen Tuminkery tumini kid daꞌy patum kinha nii aimeakan kid, naꞌapaꞌu idiaꞌanaꞌu inkaꞌichian patuman kamichi taannaa kid zíper kadyz kid kawynyꞌu atii avião kid.

Wananaa tumkau kadyz idiaꞌan, watykap naꞌapam Tuminkery yryy aichipabaꞌu manawyn. Pidiꞌichap naꞌapauram kuraidiaunaa sud tuminhan padaru tuba nazuu ii. Kiwiin célula daunaiura diꞌikiꞌu ikudinhan célula zyna tuba nazuꞌu ii, inbaydaptinhan, célula nazuꞌu kainhaꞌa ipei ykadyz kid. Yryy daynaꞌan inbyytinhan kid naꞌap kid in ydaryn. Yryy daynaꞌan células panadinhan, intuminhan pabinaꞌakaꞌu nii, centenas inhau, indakutkau células sanguíneas, nervosas naꞌik ósseas. Yryy daynaꞌan, ynanaa xaꞌapayz kid tuminhan, ynhikynyy sakadan naa pakaydinhan. Yryy naa, 9 kayz daynaꞌan, tawyryy baydapaꞌu célula tuminhan kuraidiaunaa sud nii, ytuminhan bilhões células diꞌik. Ynaꞌapan id, dirib pidiannau naydap naꞌapam Tuminkery Paradan kian: “Unkunaykikid pygary, yxaꞌapanym kayꞌan untumkau kaimenaimen.” — Psalm (Salmo) 139:14.

Naꞌap dii wakaminkeꞌytkau Tuminkery aichipaban idiaꞌan? Watumiki aichiap kanum wa aiapnii wamaxaap kinha nii kunaykii. Yaichipaban idiaꞌan ytaa kakinhaurii waꞌat paKarichian idiaꞌan. Tuminkery Paradan kakinhautan waynau: “Ymarinhaꞌataꞌa naa kaxaꞌur kidiaꞌu aimeakan xaꞌapatayzkariweiz yꞌat.” (Colossians [Colossenses] 3:13) Kaimenaꞌu man wyryy kakinhaurii? Uu kaimenaꞌu wyryy! Kainhaꞌa pesquisa aidyan pidian marinhaꞌatan dun uii kidiaꞌu xaꞌapatkariweiz paꞌat kaimenaꞌu nii ydaꞌawyn, aunaꞌu nii pressão alta yidiaꞌa, naꞌik aunaꞌu nii ynhikynyy kaxaꞌurtinhan naꞌik bauran kaimen kidiaꞌu aimeakan xaꞌapan nii ynanaa at. Tuminkery yryy aichipabaꞌu minhaydaꞌyi ykaminkeꞌytan ipei waynau, yryy id ytaa kaimen kidiaꞌu kakinhaurii waꞌat. (2 Timothy [2 Timóteo] 3:16, 17) Piaiap man naꞌapaꞌu pyminhaydaꞌy nii?

“Yewah marainhap aimeakan sakichipaꞌu.” — PSALM (SALMO) 37:28.

Karikeunan Tuminkery xaꞌapat sakichipaꞌu aimeakan. Tuminkery Karichian kian: “Aunaa naꞌapainim Tuminkery xaꞌaptan dikeydaꞌu, aunaa naꞌapainim nii Maꞌuzkaꞌuraz Tuminkery xaꞌaptan panaꞌitiꞌu.” (Job [Jó] 34:10) Sakichipaꞌu wyryy Yewah xaꞌaptnii kaimenainhau at naꞌik uinheinhau at, yryy id, salmo  karichian kian: “Sakichipaꞌu idiaꞌanaꞌu nii Tuminkery kawinipinatan pidiannau inxaꞌapatnii kid kawan at.” (Psalm [Salmo] 67:4) Aunaa tyryy pidian maridinhan uu dizan aimeakan Yewah ai, yxaꞌapanym kayꞌan “ytykap pidian nhikynyy”. (1 Samuel 16:7) Karikeunan Yewah aichiap naꞌiauram mixiꞌuraz naꞌik karikeunan yxaꞌaptan sakichipaꞌu aimeakan. Naꞌik, Tuminkery awynyytap ipei dikeyd kidiaꞌu xaꞌapaꞌuraz diuraz amazada idiaꞌa, ykian atazunaa ipei wyryy dikeydainhau “mainhaabatkau nii imiꞌi baara idiaꞌa”. — Proverbs (Provérbios) 2:22.

Aunaa antamik man Yewah, aunaa yaipen pa antamikchan pidiannau. Mazan ykamynynkid pidiannau. Tuminkery Karichian kian “Yewah yryy kamynynbaꞌu naꞌik yaichiap naꞌapam pidian abatinpen” ykamynynkid dikeydainhau pidiannau, intanautinhan dun pauian ai. Yxaꞌapanym kayꞌan sakichipaꞌu naꞌik kaimenaꞌu manawyn yryy. — Psalm (Salmo) 103:8; 2 Peter (2 Pedro) 3:9.

Naꞌap dii wakaminkeꞌytkau Tuminkery xaꞌapatinhan id sakichipaꞌu idiaꞌan? Tyryy waikudan kaimen kidiaꞌu, yxaꞌapanym kayꞌan aunaa Tuminkery zamtan suu baydap kadyz pidiannau. Apóstolo Pedro kian: “Aunaa Tuminkery manaydapkan xaꞌapauran kadyz pidian, ymarainhap ipei pidiannau patymaka. Yzamat xaꞌapauran kadyz pidian, in izuꞌutin dun yryy, naꞌik inmaxaapan id kaimen yaipen kawan at.” (Acts [Atos] 10:34, 35) Ykayꞌan, aunaa yxaꞌapan xaꞌapauran wamada, wawiiz, mapyraatanyꞌu uu aunaa, tyryy waminhaydaꞌychipan Tuminkery naꞌik wapuchurichap kidinhan yꞌat.

Tuminkery aipen ipei waynau aichipan naꞌapam yxaꞌapatinhan sakichipaꞌu idiaꞌan naꞌik waikudan kaimen kidiaꞌu yidiaꞌan. Yryy id, ytaa waꞌat wa aichap kinha nii naꞌiauram aimeakan kaimenaꞌu naꞌik uiaꞌu. Tuminkery Karichian kuwad kainhaꞌaꞌu kawanyꞌu Tuminkery kakinhauri ‘saadinpen wanhikynyy ii’, wanhikynyy ‘kuwad waꞌat’ waxaꞌaptan dun kaimenaꞌu aimeakan uu uiaꞌu aimeakan. (Romans [Romanos] 2:15) Naꞌap dii wyryy kakinhaurii saadinpen wanhikynyy ii kaminkeꞌytan waynau? Watuminpen dun kaimenaimen Tuminkery Paradan daꞌy, wa aichipan nii xaꞌapauran uii kidiaꞌu aimeakan aunaa kiz waxaꞌaptan. Waxaꞌaptan dun uiaꞌu, wyryy aichiapkinhei Tuminkery taaniaz waꞌat kaminkeꞌytan nii watanautin kiz wa uian ai. Wa aichipan dun naꞌapam Tuminkery xaꞌaptan ipei aimeakan sakichipaꞌu idiaꞌan ykaminkeꞌyt wamaunapadinhan pauwaꞌa zii ydiꞌit!

“Tuminkery yryy kamarainpenyꞌu.” — 1 JOHN (1 JOÃO) 4:8.

Tuminkery aidikid pamaꞌuzkan, pa aichipaban naꞌik sakichipaꞌu yxaꞌapatinhan, mazan Ykarichian kian kainhaꞌa ykadyz puwaꞌaꞌu ymanawynyn: yryy kamarainpenyꞌu. Kandii nii? Tuminkery tuman aimeakan kid yxaꞌapanym kayꞌan yryy maꞌuzkaꞌu manawyn, yxaꞌapatinhan sakichipaꞌu idiaꞌan yxaꞌapanym kayꞌan yryy aichipabaꞌu, mazan pakamarainpenyn idiaꞌan yxaꞌapat ipei aimeakan. Aizii watuminpen nii pauwaꞌa zii ykadyz kid daꞌy.

Pakamarainpenyn idiꞌu Yewah tuman anjonau aukaz ii naꞌik pidiannau imiꞌi baaraꞌa, Yewah marainhap naꞌik ytaap ipei inhau. Aunaa Yewah tuman inhau pa abatinpen id man pabaurantin. Yewah aidyan pakamarainpenyn kapam yminziu kidian dun imiꞌi baara pidiannau maxaap kiz nii. Naꞌik Tuminkery aidyan pakamarainpenyn ipei pidiannau at ‘ykanad kidian id kamuu kaimenainhau naꞌik dikeydainhau at. Naꞌikim ykaaukid wyn kaimenainhau naꞌik dikeydainhau at’. — Matthew (Mateus) 5:45.

Yewah yryy ‘kamynynbaꞌu naꞌik kamarainpenyꞌu manawyn’. (James [Tiago] 5:11) Ymarainhap ipei pidiannau tiweitinhenhawyz pa aichipan yryy naꞌik pamaunapadinhan ydiꞌit. Tuminkery awynyytap ipei pidiannau baydap baydap kid. Ykayꞌan ‘ytaapnii wyryy pygaryz’. — 1 Peter (1 Pedro) 5:7.

Naꞌap dii wakaminkeꞌytkau Tuminkery kamarainpenyn idiaꞌan? Kunaynymaꞌu watykpan dun kamuu tipichan naꞌik kunaynymaꞌu wa abatan dun kuraidiaunaa sud xazutan. Naꞌik kunaykii waynau, wairibennau marainpen dun waynau. Wa aiap man naꞌap kidiaꞌu aimeakan wakakyp kinha nii? Aunaa. Mazan ykunaykikid wanhikynyy, yryy idiaꞌan watykpan Tuminkery kamarainpenyn waꞌat.

Mazan kainhaꞌa bauran aimeakan Tuminkery taanii waꞌat yaidi kinha nii pakamarainpenyn, ytaanii turinhapkary waꞌat. Tuminkery Karichian kian: “Aunaa kiz ydupiidinhan kanum sud kid dayꞌat karikeunan. Mixiꞌuraimen ykuwad Tuminkery at kaziwedpaꞌuraz ynhikynyy naꞌik ypixaa yꞌat aimeakan yaiapnii. Naꞌik karikeunan “kaimen”, ykii yꞌat ykamynanyn id ynau at.” Tuminkery yryy kamarainpenyꞌu darii yaipen wadurutan paygary naꞌik wapixaan yryy ykaminkeꞌyt kinha nii waynau, yaipen wakuwadan paꞌat ipei aimeakan kimidaytaꞌu wanhikynyy, atii aimeakan aunaꞌuraz wakuwadayzun aunaa kanum at. Waxaꞌaptan dun naꞌap, Yewah ‘kazannaatan nii wanhikynyy naꞌik wadiꞌitinpen dupiikery ai’. — Philippians (Filipenses) 4:6, 7.

Diuraz karichi kuwad ymanawyn kidiaꞌuraz Tuminkery kadyz daꞌy — ymaꞌuzkan, yaichipaban, ysakichipan naꞌik ykamarainpenyn — tyykii wa aipen piaichipan kaimenaimen naꞌapauram Tuminkery kadyz kid. Bauran aimeakan kaminkeꞌytaꞌu nii pygary piaichipan pauwaꞌa zii Tuminkery daꞌy, pytuminpen dun kanum yxaꞌapatnii naa pyꞌat naꞌikim kanumaꞌu nii zii yxaꞌapat. Yryy daꞌyaꞌu nii watuminpen.