Ammanuwan Minonne Kawotettay Koyiyoobaa Oottiya Asa Gidana Danddayiyo Ogiyaa

YESUUSA haggaazuwaa shaakki eranaadan maaddiyaabatuppe naaˈˈati aybee? Koyroy, Yesuusi polotika siraataa gidennan, asaa wozanaa laammanau koyiis. Leemisuwau, Deriyaa Bolla Timirttiyan Yesuusi minttidi yootidobaa akeeka. I yootiyoogaa siyiyaageeti maxine malanne pooˈo mala gidana koshshiyoogaa odanaappe kasetidi, “bantta ayyaanan hiyyeesa gididoogaa eriyaageeti” tumu ufayssaa demmiyoogaa yootiis. I gujjidikka, “ashkketi, . . . wozanaa geeshshati, . . . asa sigettiyaageeti anjjettidaageeta” woykko ufayttiyaageeta gidiyoogaa yootiis. (Maa. 5:1-11) Yesuusi bana kaalliyaageeti iitabaynne loˈˈobay aybakko Xoossay kessido maaraadan bantta qofaa laammiyoogeenne kumetta wozanaappe Xoossau oottiyoogee keehippe koshshiyoogaa akeekanaadan maaddiis.

Naaˈˈanttoy, Yesuusi asay tuggatiyoogaa beˈido wode, i asau qarettiyoogee he tuggaappe eta shemppissanaadan denttettiis. Gidikkokka, a halchoy tugga ubbaa xayssanaassa gidenna. (Maa. 20:30-34) I hargganchata pattiis, shin harggee xayibeenna. (Luq. 6:17-19) I huqqunnettidaageeta shemppissiis, shin pirdda pacan asay tuggatiyoogee attibeenna. I namisettidaageeta miziis, shin asaa naata koshay qohiyoogee attibeenna.—Mar. 6:41-44.

Asaa Wozanaa Laammiyoogaanne Eta Tuggaappe Woppissiyoogaa

Yesuusi polotikaa siraataa laammiyoogaappe woy tuggaa xayssiyoogaappe, asay wozanaa laammanaadaaninne tuggaappe shemppanaadan maaddidoy aybissee? Yesuusi Xoossay Ba Kawotettaa goˈettidi sinttappe tugga ubbaa gaasuwaanne asa kawotetta ubbaa xayssanaagaa erees. (Luq. 4:43; 8:1) Hegaa gishshau, erissiyo ashkkarati issi wode asaa pattiiddi takkanaadan Yesuusa oychido wode, i, “Hegaa heeran de7iya hara katamata hinddite; taani hegankka qaalaa yootanau bessees; aissi giikko, taani yiidoogee hegaassa” yaagiis. (Mar. 1:32-38) Yesuusi darota harggiyaappe pattidaba gidikkokka, Xoossaa qaalaa sabbakiyoogaanne tamaarissiyoogaa kaseyiis.

Ha wodiyan Yihoowa Markkati bantta sabbakiyo oosuwan Yesuusa leemisuwaa kaallanau baaxetoosona. Eti metootidaageeta koshshiyaaban maaddiyoogan tuggaappe shemppissanau maloosona. SHin Yihoowa Markkati alamiyaappe pirdda pacaa xayssanau baaxetokkona. Eti Xoossaa Kawotettay tugga ubbaa gaasuwaa xayssanaagaa ammanoosona. (Maa. 6:10) Yesuusaagaadan, eti polotikaa siraataa laammanaassi gidennan, asay ba wozanaa laammanaadan maaddanau baaxetoosona. Asaa naatu waanna metoy polotikaa gidennan, kandduwaa gidiyo gishshau, hegaadan oottiyoogee bessiyaaba.

Kawotettay Koyiyoobaa Oottiyaageeta

Hegaadankka Yihoowa Markkati, kawotettay koyiyoobaa oottiyoogee Kiristtaaneti oottana bessiyaaba gidiyoogaa ammanoosona. Yaatiyo gishshau, kawotettan maatay deˈiyoogeeta bonchoosona, qassi etau azazettoosona. Eti bantta haggaazuwaaninne bantta xuufetun asay higgiyau azazettanaadan minttettoosona. Gidikkokka, Xoossaa azazuwaappe phalqqettiyaabaa kawotettay azaziyo wode, Yihoowa Markkati hegaa polokkona. Eti “asau azazettanaappe Xoossau” azazettoosona.—Oos. 5:29; Roo. 13:1-7.

Yihoowa Markkati bantta heeran deˈiya ubbay miishsha qanxxennan Geeshsha Maxaafaa xannaˈanaadan shoobboosona. He  timirttiyaappe denddidaagan miilooniyan qoodettiyaageetu wozanay laamettiis. Eti layttan layttan xeetu shaˈan qoodettiya asay sijaaraa uyiyoogaa, mattottiyoogaa, jallissiya xaliyaa bessenna ogiyan goˈettiyoogaa, ceeriyaa kaaˈiyoogaanne shori baynna asho gaytotettaa mala qohiyaabaa oottiyoogaa agganaadan maaddidosona. Eti Geeshsha Maxaafaa baaso siraataa bantta deˈuwan oosuwan peeshshiyo gishshau, loˈˈo kanddoy deˈiyoogeetanne kawotettau azazettiyaageeta gididosona.

Hegaa bollikka, Geeshsha Maxaafaa timirttee so asay issoy issuwaa wozanappe bonchanaadaaninne aqo laggeti, naati, qassi yelidaageetinne naati issoy issuwaara ufayssiya ogiyan haasayanaadan maaddees. Hegaa mala ogiyan haasayiyoogee so asaa issippetettaa minttees. So asaa issippetettay minniyoogee deretettaa issippetettaykka minnanaadan oottees.

Ha huuphe yohotun deˈiya qofaa akeeka simmada, Haymaanootiyaanne polotikaa walakkiyoogee Geeshsha Maxaafay tamaarissiyoobaara moggees gaada qoppay? Neeni moggenna gaada zaaranaagee qoncce. SHin, tumu Kiristtaaneti kawotettay koyiyoobaa oottiyaageeta gidana koshshii? Ee, koshshees. Eti hegaadan oottana danddayiyoy ayba ogiyaanee? Yesuusi azazidoogaadan saˈaassi maxine malanne pooˈo mala gidiyoogaana.

Kiristtoosi azazido ha goˈˈiya azazuwaa oosuwan peeshshiyaageeti banttau maadettoosona, qassi bantta soo asaanne bantta deˈiyo deretettaakka maaddoosona. Ne heeran deˈiya Yihoowa Markkati he heeran Geeshsha Maxaafaa tamaarissiyo prograamiyaabaa neeyyo gujji yootanau ufayttoosona. *

[Tohossa qofaa]

[Sinttaa 7n deʼiya misiliyaa qonccissuwaa]

Yesuusi polotika siraataa gidennan, asaa wozanaa laammanau koyiis

[Sinttaa 8n deʼiya misiliyaa qonccissuwaa]

Yihoowa Markkati, kawotettay koyiyoobaa oottiyoogee eti oottana bessiyaaba gidiyoogaa ammanoosona