Zaaruwaa Koyiyoogaa

“[Yesuusa] oonatettaa xeelliyaagan daro asau dumma dumma qofay deˈees gaana danddayettees. Nuuni ay keena ammaniyaaba woy siriyaaba gidinkka, ‘Ha bitanee oonee?’ yaagidi qoppoos.”—XAAFIYAA STAN GATIRA.

ASAY Yesuusabaa erana koyees. Daro asay abaa yootiya maxaafata nabbabanau ufayttees. Abaa bessiya pilimeta daro asay dosees. SHin, asay haˈˈikka Yesuusabaa oychees. Yesuusi oonakko asau dumma dumma qofay deˈees.

Amarida layttaappe kase, odo xaafi giigissiya naaˈˈu asati “Yesuusi oonee?” yaagiya oyshaa intternneetiyan zaaranaadan asaa shoobbidosona. Asay zaarido zaaruwaappe amaridaageeti kaallidi deˈiyaageeta:

● “Tau i qarettiyoogan leemiso gidiya deˈo deˈida rabii (tamaarissiyaagaa) milatees.”

● “I keehi dumma deˈo deˈida coo asa.”

● “Yesuusi deˈon deˈidoogau naqaashi baawa.”

● “Yesuusi Xoossaa Naˈaa; qassi i nu nagaraappe nuna ashshanau yelettiis, hayqqiisinne hayquwaappe denddiis. I ha wodiyankka deˈees, qassi zaarettidi saˈaa yaana.”

● “I Xoossaa naˈaa issuwaa, qassi polo asanne polo Xoossanne gidiyoogaa ammanays.”

● “Yesuusabaa odoy gita naatuyyo yootiyo hayse.”

Hegaa mala dumma dumma qofay ubbay likke gidana danddayennaagee qoncce. Yesuusa xeelliyaagan nuuni oychiyo oyshau ammanttiya zaaro yootiyaabi deˈii? Ha maxeetiyaa giigissiyaageeti Geeshsha Maxaafay Xoossaa Qaala gidiyoogaanne Yesuusa xeelliyaagan tuma ubbaa yootiyay he maxaafaa xalla gidiyoogaa ammanoosona. *—2 Xim. 3:16.

Kaalliya huuphe yohuwan, Yesuusa xeelliyaagan denddiya, meeze gidida issi issi oyshatu zaaruwaa Geeshsha Maxaafaappe beˈana. Yesuusi ba huuphe, bana “ammaniya ubbai” attana danddayiyoogaa yootiis. (Yoh. 3:16) Neeni zaarota pilggada, Yesuusabaanne an ammaniyoogaa oosuwan bessiyo ogiyaabaa gujjada tamaarana koshshiyaakkonne ne huuphe kuuyanaadan shoobboos.

[Tohossa qofaa]