Deˈoy Hada Milatiyoy Aybissee?

KAWUWAA SOLOMONI giidoogaadan, deˈoy “kuwaadan coo aadhdhiya guutta laittaa” xalla gidennaagaa neeni ammanana koshshiyoy aybissee? (Era. 6:12) Ubbatoo tuma gididabaa yootiya Geeshsha Maxaafay, sinttappe deˈoy tumuppe ufayssiyaagaa gidanaagaa yootees.—2 Xim. 3:16, 17.

Geeshsha Maxaafay, koyro Xoossay saˈau halchidobaa yootees. Alamee pirddaa pacan, naaquwaaninne metuwan kumidoy aybissakkokka qonccissees. Nuuni hegaa akeekana koshshiyoy aybissee? Deˈoy hada giidi qoppiya asati hegaadan qoppiyo waana gaasoy, Xoossay ha saˈaunne asaa naatuyyo halchidobaa erenna, woykko eranau koyenna gishshataassa gidiyoogaa akeekoos.

Xoossay Saˈau Halchidobay Aybee?

Xoossaa Yihooway * saˈaa, asaa naati deˈiyo gannate, giishin asay polo gididi merinau ufayssan deˈiyo soho gidanaadan medhiis. Geeshsha Maxaafay kaafennaba gidikkokka, daro asay ammaniyoobay ha tumaara moggenna. Eti, Xoossay saˈaa medhidoy, asay  saluwan ufayssiya deˈuwaa demmanau bessiya bessennaakko paacettiyo soho gidanaadaana giidi ammanoosona.—Sinttaa 6n deˈiya, “Ufayssiya Deˈuwau Saˈaappe Harasaa Baana Bessii?” giya saaxiniyaa xeella.

Xoossay koyro bitaniyaanne maccaasiyo Ba maalaalissiya eeshshata qonccissiyaageeta oottidi Ba leemisuwan medhiis. (Doo. 1:26, 27) I eta polo asa ootti medhiis. Merinau ufayssiya deˈuwaa deˈanau koshshiya ubbabay etau deˈees. Hegee, corattidi saˈaa kumiyoogaa, a haariyoogaa, Edene ataakiltte sohuwaadan kumetta saˈaa gannate oottiyoogaa gujjees.—Doo. 1:28-31; 2:8, 9.

Ayba Metoy Merettidee?

Issi wolqqaama metoy merettidoogee qoncce. Xaaxi waaxi xeelliyo wode, asaa naati Xoossaa eeshshaa qonccissana danddayibookkona. Saˈaykka gannate gidenna. Ayba metoy merettidee? Koyro asati, Addaameenne Hewaana koyidobaa dooriyo bantta maataa bessenna ogiyan goˈettidosona. Eti “lo77uwaanne iitaa Xoossaadan” banttau kuuyanau koyidosona. Hegaadan oottiyoogan, Seexaanaa Dabloosa leemisuwaa kaallidi, etikka makkalidosona.—Doo. 3:1-6.

Hegaa gishshau, iitatettay, Xoossay kasetidi halchido xuura yoho gidenna. Iitatettay doommidoy Seexaanay, qassi guyyeppe Addaameenne Hewaana Xoossaa haaruwan makkalido wode. Eti makkalidoogaa gaasuwan, koyro bitaneenne maccaasiyaa Gannatiyaappe yedetettidosona, qassi eti polo gidiyoogee attiis; eti nagaranchanne hayqqiyaageeta gididosona; qassi hegaa bantta zerettatussi, giishin asaa naatu ubbaassi laatissidosona. (Doo. 3:17-19; Roo. 5:12) Deˈoy hada milatanaadan oottida hanotay hegaa.

Xoossay Iitatettaa Sohuwaara Xayssibeennay Aybissee?

Issoti issoti, ‘Xoossay Seexaanaanne aara makkalida harata sohuwaara xayssidi, ubbabaa wodhi eqqi doommibeennay aybissee?’ giidi oychoosona. Hegaadan oottiyoogee eratettee? Ba maataa eqettida uraa sohuwaara xayssida wolqqaama kawuwaabaa siyidabadan qoppa; hegan neeyyo aybi siyettii? Hegaadan oottiyoogee, loˈˈo qofaa qoppiya asi deˈennaadaaninne he haaroy haratuyyo kandduwaara gayttidaagan loˈˈo leemiso gidennaadan oottennee?

Xoossay he makkalanchata sohuwaara xayssanau koyibeenna. A haaruwaara gayttidaagan Edenen denddida oyshay, naaˈˈantto zaarettennan ubba wodiyau zaaruwaa demmana gakkanaashin, ba aadhida eratettan amarida wodee aadhana mala paqqadiis.

Iitatetta Ubbay Xayana

Nuuni erana koshshiya waannabay, Xoossay iitatettay deˈanaadan paqqadidoy amarida wode xallaassa gidiyoogaa. I hegaadan paqqadidoy, a haaruwaara gayttidaagan makkalanchay denttido wolqqaama oyshay zaaruwaa demmi simmin, iitatettay kaalettido azzanttiyaabaa muleera xayssanaagaa eriyo gishshataassa.

Xoossay saˈaunne asaa naatuyyo halchidobaa aggibeenna. Yihooway saˈaa Medhidaagaa, qassi an “asi de7anaadaanappe attin, biittaa coo” medhibeennaagaa gidiyoogaa hananabaa yootiya Isiyaasa baggaara qonccissiis. (Isi. 45:18) Mata wode, i koyro halchidoogaadan zaarettidi saˈaa polo gidida hanotau  laammana. I ba haaroy suure gidiyoogaa ubbay akeekanaadan oottoogaappe guyyiyan, ba gita wolqqaa goˈettidi ba sheniyaa polanaunne iitatetta ubbaa muleera xayssanau danddayees. (Isi. 55:10, 11) Yesuus Kiristtoosi tamaarissido woosan, Xoossay hegaadan oottana mala woossanaadan yootiis. Yesuusi, “Ne shenee saluwan hanidoogaadan, sa7ankka hano” giidi nuuni woossanaadan tamaarissiis. (Maa. 6:9, 10) Hegee ay gujjii?

Xoossay Saˈau Halchidobaa

A sheniyaappe issoy, ‘ashkketi biittaa laattiyoogaa.’ (Maz. 37:9-11, 29; Lee. 2:21, 22) Yesuus Kiristtoosi bana “xeesiya hiyyeesata, naaqettidaageetanne maaddiyaabi bainnaageeta” ashshana. I “eta naaquwaappenne makkalaappe” wozana. (Maz. 72:12-14) Olay, hayqoy, azzanoy, sahoynne waayee xayana. (Maz. 46:9; Ajj. 21:1-4) Xoossay iitatettay deˈanaadan  paqqadido wodiyan hayqqida daroti ha saˈan deˈanau denddana; denddidi, hageetanne hara anjjota demmana danddayoosona.—Yoh. 5:28, 29.

Seexaanay makkalidoogaa gaasuwan gakkida qohuwaa Yihooway xayssana. I he qohuwaa muleera xayssiyo gishshau, “kase metoti [ha wodiyan azzanoynne sahoy deˈanaadan oottida ubbabay] dogettidosona.” (Isi. 65:16-19) He hidootay ammanttiyaagaa. Xoossay worddotenna. I qaalaa gelido ubbabay polettana. Hegaappe guyyiyan, deˈoy “hada; carkkuwaa oiqqanau yedettiyoogaa mala” gidenna. (Era. 2:17) Ubba deˈoy keehi ufayssiyaagaa gidana.

Ha wodiyan shin? Geeshsha Maxaafay tamaarissiyoobaanne Xoossay saˈau halchidobaa eriyoogee, ha wodiyan ne deˈoy ufayssiyaagaa gidanaadan oottana danddayii? Kaalliya huuphe yohoy ha oyshaa zaarees.

[Tohossa qofaa]

[Sinttaa 6n deʼiya saaxiniyaa]

Ufayssiya Deˈuwau Saˈaappe Harasaa Baana Bessii?

Xoossay saˈau halchidobaa erenna asay, nuuni tumuppe ufayssiya deˈuwaa demmanau saˈaappe harasaa baana bessees giidi daro wodiyau tamaarissiiddi takkiis.

Issoti issoti shemppoy “asho giddo gelanaappe kase xoqqa hanotan deˈiis” yaagoosona. (Niwu Dikishineri of Tiˈoloji) Haraati qassi, shemppoy “asho giddo gelidoy saluwan deˈiiddi oottido nagaraa gishshau qaxxayettanaassa” yaagoosona.—Saykiloppidiya of Bayblikal, Tiˈolojikal, end Eklesiyasttikal Litirecher.

Soqiraaxisanne Pilaato mala Giriike paalasppati kaallidi deˈiyaagaadan tamaarissidosona: SHemppoy “bichaariyoogaappe, hada deˈuwaappe, yashshaappe, iita amuwaappenne asaa naata tuggayiya hara iitabaappe” naxa kiyiyoy, wolqqi baynna asaa naatu ashuwaappe kiyidi, “ubba wode xoossatuura issippe” deˈiyo wode xallaana.—Pilaatos Faado, 81, A.

Guyyeppe, Kiristtaane haymaanootiyaa kaalettiyaageeta geetettiyaageeti Giriike paalasppati tamaarissiyo, “shemppoy hayqqenna giyo qofaa bantta timirttiyan gujjidosona.—Kiristtiyaniti—A Giloobal Histtiri.

He qofaa kaallidi deˈiya, Geeshsha Maxaafay yootiyo heezzu tumaara geeddarssa:

1. Saˈaa xeelliyaagan Xoossaa halchoy, saluwaa efiidi banaara wottana bessiyoy oonakko eranau guutta wodiyau paacciyo soho gidennan, asaa naati merinau deˈiyo soho gidanaadaana. Addaameenne Hewaana Xoossaa higgiyaa azazettidaba gidiyaakko, eti hanno gakkanaashin ha saˈan gannatiyan deˈana shin.—Doo. 1:27, 28; Maz. 115:16.

2. Daro haymaanooteti asau shemppoy, giishin ayfen beettennabay deˈees giidi tamaarissoosona; shin Geeshsha Maxaafay tamaarissiyoobay qoncce. Asi “biittaa baanaappe” merettida, “paxa de7iya” shemppo. (Doo. 2:7) Geeshsha Maxaafay, shemppoy hayqqennaba giidi mule tamaarissenna. SHin, shemppoy hayqqananne xayana danddayiyaaba gidiyoogaa tamaarissees. (Maz. 146:4; Era. 9:5, 10; Hiz. 18:4, 20) Koyro shemppo woy asa gidida Addaamee hayqqidi, kase merettido baanau simmiis. I paxa deˈenna hanotau simmiis.—Doo. 2:17; 3:19.

3. Asaa naatu sinttanaa hidootay baasettidoy, ashuwaappe shaahettidi ayyaana alamiyau biya, hayqqenna shemppoy deˈiyoogeeta gidiyoogaana gidennan, hayquwaappe denddidi gannate saˈan deˈanaadan Xoossay gelido qaalaana.—Dane. 12:13; Yoh. 11:24-26; Oos. 24:15.