Ooratta Inggilizetto Wochiyo Keelaa Erissiyoogaa

AKEEKANAU metenna Inggilizetto Wochiyo Keelay ha aginaappe doommidi kiyiyoogaa erissiyoogan keehippe ufayttoos. Ha ooratta maxeetiyaa issi layttau mali beˈidi, goˈˈiyaaba gidikko ubbatoo attamana. Ha maxeetiyan xannaˈiyo huuphe yohoynne sohoy palahiyaaba gidikko, hara huuphe yohoykka kiyana. Hagee daro Yihoowa Markkata ayyaanaaban keehippe maaddanaagaa ammanettoos. Hegee koshshidoy aybissee?

Alame yuushuwan daro biittatun deˈiya Yihoowa Markkati Inggilizettuwaa haasayoosona. He biittatun deˈiya Yihoowa Markkati he biittan deˈiya hara qaalaa haasayiyaaba gidikkokka, gubaaˈiyaa shiiquwaaninne haggaazuwan ubbatoo Inggilizettuwaa goˈettoosona. Gidikkokka, nu xuufiyan goˈettiyo Inggilizettuwaa eti akeekanau metootoosona. Qassi, Inggilizettuwaa loyttidi haasayenna Yihoowa Markkati, Inggilizettuwaa haasayiyo biitta biidi deˈoosona. Hegaa bollikka, bantta qaalan shiiqiyo gubaaˈe shiiqotun beettana danddayokkona.

Nuuni saaminttan saaminttan xannaˈiyo Wochiyo Keelaa huuphe yohoti, koshshiyo wodiyan giigiya ayyaana qumaa nuuni miyo waanna oge. Yaatiyo gishshau, shiiquwan beettida ubbay xannaˈiyoobaappe kumetta hanotan goˈettanau maaddana mala, akeekanau metenna ogiyan Inggilizetto Wochiyo Keelaa giigissana koshshiis. Ha ooratta Wochiyo Keelau koyro sinttay haraagaappe dummatees. Xannaˈiyo huuphe yohotun deˈiya sima huuphe yohotu, menttotu, zaareto oyshatunne misiletu qofay hankkuwaagaara issi mala. Yaatiyo gishshau, Wochiyo Keelaa Xinaatiyaa wode naaˈˈaappe awugaanne oyqqidi kaallanaunne qofaa immanau danddayettees. Naaˈˈaa giddon deˈiya qaalaa dummatettaa akeekanau, ha maxeetiyan xannaˈiyo koyro huuphe yohuwaa mentto 2ppe ekettida leemisuwaa hagaappe garssan beˈite.

Ha ooratta giigissoy Yihoowa, “Ne azazuwaa taani tamaarana mala taayyo akeekaa imma” yaagidi woossida darotu woosaa zaaro gidanaagaa hidootoos. (Maz. 119:73) Inggilizettuwaa loyttidi erennaageetinne Inggilizettuwaa haasayiya issi issi yelaga naati ubba saaminttan Wochiyo Keelaa Xinaatiyau loyttidi giigettanau hegee maaddanaagaa ammanettoos. Yihooway alame yuushuwan deˈiya ‘ishantta siiqiyoogaappe’ denddidaagan ayyaanaabaa qumaa palahissidi immanau ‘ammanettida wozannaama ashkkaraa’ goˈettiyo gishshau nuuni a keehippe galatoos.—1 PHe. 2:17; Maa. 24:45.

Yihoowa Markkata Bollaara Heemmiyaagaa