“Wurssettai” Aybee?

“. . . hegaappe guyyiyan, wurssettai gakkana.”—MAA. 24:14.

MATA wodeppe haa simmin wurssettaabaa odoy dariis. Asaa miichanau giigissiyoobatuppe biidi saynisiyaabaa yootiyaageeta gakkanaassi, maxaafati, pilimetinne maxeeteti wolqqaama bashsha gallassaabaa yootoosona. Hegeeti niyukileere olan, xoolintte malatiyaabati saˈaara domˈˈettiyoogan, woriya bayresiyan, teqqana danddayettenna hanotan carkkoy laamettiyoogan woykko saluwaappe yiidi nuna oliyaabatun gakkiya bashshaabaa yootoosona.

Haymaanooteti tamaarissiyoobaykka dumma dumma; daroti “wurssettai” saˈan deˈon deˈiya ubbabaa xayssees giidi tamaarissoosona. Haymaanootiyaa erancha issoy, Maatiyoosa 24:14 xeelliyaagan ba qofaa hagaadan yootiis: “Ha xiqisee Xoossaa Qaalan keehippe koshshiya qofaappe issuwaa . . . Nu yeletaa ubbaa keehi wolqqaama bashshay naagees; nu giddoppe hegee kaalettiyo wolqqaamabaa kasetidi qoppana danddayiyaageeti guutta.”

Hegaa mala qofay darotoo keehi koshshiya issibaa xaasayi xeelliyoogaa bessiyaaba: Xoossaa Yihooway, ‘biittaa giigissidi medhiis’; i “asi de7anaadaanappe attin, biittaa coo medhdhibeenna.” (Isi. 45:18) Yaatiyo gishshau, Yesuusi ‘wurssettaabaa’ yootiyoode, saˈaa xayuwaabaa woykko asa zerettay mulxxu giidi xayanaagaa yootibeenna. I iitati, giishin Yihoowa siiqo kaaletuwaara moggiya ogiyan deˈanau ixxis giyaageeti xayanaagaa yootiis.

Issi leemisuwaa qoppa. Neeyyo deˈiya issi loˈˈo keettan asay miishsha qanxxennan deˈanaadan paqqadidabadan qoppa. He asatuppe amaridaageeti issoy issuwaara saro deˈoosona; qassi ne keettaa loytti oyqqidosona. SHin harati keehi metoosona, issoy issuwaara kobabaa hanoosona, qassi loˈˈo asata qohoosona. Eti ne keettaa mooridosona; qassi neeni yootin siyennan ixxidosona.

 He hanotaa giigissanau ay oottuutii? Ne keettaa qoluutii? Qolakka. Ha iita asati sooppe kiyanaadan oottada moorettidabaa giigissanaagee erettidaagaa.

Yihooway oottanabay hegaa malaba. Mazamuraawee hagaadan xaafanaadan ba ayyaanan denttettiis: “Iitaa oottiyaageeti xoqollettidi xayana; shin GODAN ufaissaa oottiyaageeti biittaa laattana. Iitaa oottiyaageeti guutta wodiyaappe guyyiyan de7okkona; neeni eta koyiyaakkokka eti beettokkona. SHin ashkketi biittaa laattana; eti sarotettaaninne duretettaani ufaittidi daana.”—Maz. 37:9-11.

Kiitettida PHeexiroosi he qofaa xeelliyaagan ayyaanaa kaaletuwan hagaadan giidi xaafiis: “Daro wodiyaappe kase Xoossai haasayin, saloinne sa7ai [merettiis]. . . . Sa7ai haattaappenne haattan merettiis. Qassi hegaa gaasuwan, he wode de7iya sa7ai he haattan meetetti xayiis.” (2 PHe. 3:5, 6) PHeexiroosi ha sohuwan Nohe wode Bashshaa Haattaabaa yootiis. He wode deˈida, Xoossaappe haakkida asay xayiis; shin saˈay xayibeenna. Kumetta saˈan gakkida he bashshay “nagaranchcha gidiyaageeta gakkanabau leemiso” gidiis.—2 PHe. 2:6.

PHeexiroosi gujjidi, “Ha77i de7iya saloinne sa7ai,. . . tamaa naagoosona” yaagiis. Nuuni hagaa xallaa nabbabikko, bala ogiyan qoppana danddayoos. SHin he xiqisee, ‘Xoossau goynnenna asati xayoosona’ giyoogaakka akeeka. Xayiyay saˈaa gidennan, Xoossau goynnennaageeta. Hegaappe simmin hananabay aybee? PHeexiroosi, “Nuuni Xoossai immana giido ooratta saluwaanne [Xoossay essido Masiyaa Kawotettaa] ooratta sa7aa [geeshsha gidida asaa] xilloi de7anasaa naagoos” yaagidi xaafiis.—2 PHe. 3:7, 13.

“Wurssettai” gakkiyo wodee matidoogaakka Geeshsha Maxaafaa hiraagay qonccissees. Hegaa qonccissiyaabaa beˈanau Maatiyoosa 24:3-14nne 2 Ximootiyoosa 3:1-5 nabbaba. *

Guutta naˈi akeekana danddayiyo Maatiyoosa 24:14y daro asau kirqqi giidoogan garamettay? Hegaadan hanido gaasoy dees. Xoossaa Qaalaa giddon deˈiya alˈˈo tumaa akeekennaadan Seexaanay asaa qofaa gooziis. (2 Qor. 4:4) Qassi Xoossay ba halchuwaa otorettiyaageetuppe genttidi, ashkketussi qonccissiis. Yesuusi hegaa xeelliyaagan hagaadan giis: “Ta Aawau, saluwaa sa7aa Godau, neeni hagaa aadhdhida eranchchatuppenne akeekanchchatuppe genttada, erenna naatussi qonccissido gishshau, nena galatais.” (Maa. 11:25) Xoossaa Kawotettay aybakko akeekiyaanne he Kawotettau haarettiyaageetussi Kawotettay ehaana anjjuwaa hidootan naagiya ashkketuppe issuwaa gidiyoogee gita maata!

[Tohossa qofaa]

[Sinttaa 9n deʼiya misiliyaa qonccissuwaa]

Xoossaa Kawotettay iitatetta ubbaa saˈaappe xayssana