Loˈˈo Asa Ubbay Saluwaa Bii?

AESUUSI hayqqanaappe kase ba kiittidoogeetuura wurssetta kahuwaa mi simmidi, saluwan eti demmana woytuwaa yootiis. I: “Ta Aawaa keettan daro sohoi de7⁠ees. Hegaa gidennaakko, taani intteyyo hegaa yootikke; taani intteyyo sohuwaa giigissanau bais” yaagiis. (Yohaannisa 14:2) Yesuusi etayyo saluwan sohuwaa giigissiyoy aybissee? Eti yan ay oottanee?

Yesuusi ba erissiyo ashkkaratuyyo dumma oosuwaa immanau qoppiis. He galla qammi, i: “Taani paacettiyo wode tana yeggibeennaageeta. . . . Araatatun uttana mala, ta Aawai tana sunttidoogaadan, taani inttena sunttais” yaagiis. (Luqaasa 22:28-30) Yesuusi asaa naatuyyo keehippe koshshiya, loˈˈo kawotettau Kawo gidanaagaa Xoossay qaalaa geliis. Yesuusi naaqettidaageeta ashshana; qassi eta naaqqiyaageeta xayssana. Yesuusau haarettiyaageeti “sa7aa gaxaa gakkanaassi” deˈiyaaba gidikkonne, a araatay saluwaana.—Mazamure 72:4, 8; Daaneela 7:13, 14.

Gidikkonne, Yesuusi haaranay barkka gidenna. Hegaa gishshau, Yesuusi ba kiittidoogeetuyyo saluwan sohoy deˈiyoogaa qaalaa geliis. “Eti sa7an haarana” mala koyro doorettidaageeta.—Ajjuutaa 5:10.

Saluwaa aappun asay bii? Issi Kawotettaa haaruwan deˈiya asaara geeddarssiyo wode, haariyaageeti guutta gidiyoogaadan, saluwan deˈiya Xoossaa Kawotettan haariyaageetikka guutta. Banaara haariyaageeta xeelliyaagan Yesuusi: “Amarida dorssa wudiyau, intte Aawai ba kawotettaa inttessi immanau ufaittiyo gishshau yayyoppite” yaagiis. (Luqaasa 12:32) ‘Amarida dorssa wudiyaa’ qooday 144,000. (Ajjuutaa 14:1) He Kawotettau ammanettidi haarettiya, merinau saˈan deˈana miilooniyan qoodettiya asaara gatti xeelliyo wode, he qooday guutta.—Ajjuutaa 21:4.

Yaatiyo gishshau, loˈˈo asa ubbay saluwaa beenna. Loˈˈo Kawuwaa Daawita xeelliyaagan kiitettida PHeexiroosi: “Daawiti ba huuphen saluwaa kiyibeenna” yaagiis. (Oosuwaa 2:34) Xammaqiya Yohaannisi loˈˈo asa. Gidikkonne, saluwan kawo gididi haariyo maataa i demmennaagaa Yesuusi yootiis. Yesuusi: “Aayee uluwaappe yelettida asa ubban Xammaqiya Yohaannisappe aadhdhiya ooninne de7⁠ibeenna; shin saluwaa kawotettan ubbaappe laafiyaageekka appe aadhdhana” yaagiis.—Maatiyoosa 11:11.

Loˈˈo Asau Giigida Woytuwaa Neeni Demmanee?

Saˈan merinau deˈiyo woytuwaa demmanau issi uri ay oottana bessii? Yesuusi: “Xoossaa Na7aa ammaniya ubbai merinaa de7⁠uwaa ekkanaappe attin, xayenna mala, Xoossai ha sa7aa keehi siiqido gishshau, ba mexi issi Na7aa immiis” yaagiis. (Yohaannisa 3:16) Xoossay alamiyaa siiqiyoogee ubbau merinaa deˈuwaa giigissanaadan oottidoogaa akeeka; shin ‘ammanuwaa’ oosuwan bessiyaageetu xallay he woytuwaa demmana.

Ammanoy tumu eran baasettana bessees. (Yohaannisa 17:3) Yihooway asaa naatuyyo halchidobaa xeelliyaagan darobaa tamaariyoogan, loˈˈo asa gidiyoogaa bessana danddayaasa. Neeni tamaariyoobaa ammanada oosuwan peeshsha. Merinaa deˈuwaa neeni demmiyo injjee deˈiyoogaa ammanetta.

 [Sinttaa 7n deʼiya saaxiniyaa]

Geeshsha Maxaafay Woygii?

Oyshaa:

Loˈˈo asay hayqqiyo wode waanii?

Zaaruwaa:

“Haiqqidaageeti aibanne erokkona.” —ERANCHCHAA 9:5.

Oyshaa:

Loˈˈa asau sinttappe ayba hidootay deˈii?

Zaaruwaa:

“Duufuwan de7⁠iyaageeti a [Yesuusa] cenggurssaa siyiyo wodee yees. Siyidi eti duufuwaappe gaxi kiyana.”—YOHAANNISA 5:28, 29.

Oyshaa:

Loˈˈo asaappe dariya baggay awan deˈanee?

Zaaruwaa:

“Xilloti biittaa laattananne yan merinau de7ana.”—MAZAMURE 37:29.