Nabbabiyaageeti Oychiyo Oyshaa

Taani Ay Keena Miishshaa Immana Koshshii?

‘Xoossay ufayssan immiya uraa siiqees.’ (2 Qoronttoosa 9:7) Ha qaalata alame yuushuwan deˈiya miilooniyan qoodettiya asay erees. Gidoppe attin, haymaanootiyaa kaalliya issi issi asaayyo ba abbiyaappe aadhiyaagaa immana koshshiyaabadan siyettana danddayees. Issi issi haymaanooteti asay immana koshshiyoy ay keenakko yootoosona. Hegee asirataa kessiyoogaa geetettees; hegee issi uri demmiyoogaappe 10ppe issi kushiyaa woosa keettau immiyoogaa.

Geeshsha Maxaafay nuuni immana koshshiyay ay keenakko tumuppe yootii? Taani ay keena immana koshshii? giidi issi uri oychana danddayees.

Beni Wode Immanau Koyettiyaabatanne Dosan Immiyoobata

Israaˈeela asay ay keenaa immanaadan Xoossay koyiyaakko Geeshsha Maxaafay qoncce azazuwaa oyqqiis. (Wogaabaa 27:30-32; Qoodaabaa 18:21, 24; Zaarettido Wogaa 12:4-7, 11, 17, 18; 14:22-27) He koyettiyaabay eti immanau danddayennaba gidenna. Ba higgiyaa azazettikko, Yihooway eta ‘darissidi anjjanaagaa’ qaalaa geliis.—Zaarettido Wogaa 28:1, 2, 11, 12.

Hara hanotatun, Israaˈeeleti daro gidin guutta gidin, koyidoogaa keenaa bantta dosan immana danddayoosona. Leemisuwau, Kawuwaa Daawiti Yihoowa beeta maqidasiyaa keexxanau halchido wode, asay “issi xeetanne laappun tammu sha7u kilo giraame deexxiya worqqaa” immiis. * (1 Hanidabaa Odiya 29:7) Hegaa Yesuusi saˈan deˈido wode beˈidobaara geeddarssa. Beeta maqidasiyan muxuwaataa yeggiyo saaxiniyan, “issi daro hiyyeesa am77iyaa naa77u bakkannaa hegan yeggiyoogaa” beˈiis. A yeggido miishshay ay keenee? A immido miishshay, keraa oosanchay issi gallassi demmiyo miishshau xeetu kushiyaappe issuwaanne bagga. Gidikkokka, he guutta imotan Yesuusi ufayttidoogaa yootiis.—Luqaasa 21:1-4.

Kiristtaaneti Immana Koshshiyoy Ay Keenakko Odettidee?

Kiristtaaneti Israaˈeelatuyyo imettida Higgiyaa garssan deˈokkona. Yaatiyo gishshau, Xoossaayyo hanni keena immana koshshees geetettidi etassi odettibeenna. Gidikkokka, tumu Kiristtaane gubaaˈiyan, immiyoogee keehippe ufayttanaadan oottiyaaba. Yesuus Kiristtoosi ba huuphe: “Ekkiyaagaappe immiyaagee anjjettidaagaa” yaagiis.—Oosuwaa 20:35.

Yihoowa Markkati bantta dosan immiyoogan saˈa yuushuwan oottiyo sabbakiyo oosuwaa kaafoosona. Neeni nabbabaydda deˈiyoogaa mala xuufeta attamanau, qassi Kawotettaa Addaraashaa geetettiya bantta goynuwaa sohuwaa keexxanaunne loytti oyqqanau ha imotaa goˈettoosona. SHiiqiya miishshaappe oossinne damoozi qanxxettenna. Erissiyo ashkkara oottiyo oosuwaa bantta dosan kumetta wodiyaa oottiya issoti issoti transporttiyaunne banttassi koshshiyaabau kessido wociyau miishshay imettees. SHin ooninne hegaa mala miishshay tau imettana bessees giidi oychenna. Yihoowa Markkatuppe daroti bantta sabbakiyo oosuwau miishsha maado aybanne demmokkona. Hegaappe dumma ogiyan, etappe daroti PHauloosi bana danddayidi deˈanau dunkkaaniyaa sikkidoogaadan, miishsha demmanau oottoosona.—2 Qoronttoosa 11:9; 1 Tasalonqqe 2:9.

Issi uri Yihoowa Markkati oottiyo oosuwaa kaafanau miishsha immanau koyikko, ay keenaa immana koshshii? Kiitettida PHauloosi: “Xoossai ufaissan immiya uraa siiqiyo gishshau, qarettiiddi woi dosennan immiyoogaa gidennan, immiya urai huuphen huuphen ba wozanan qoppidobaa immo” yaagidi xaafiis.—2 Qoronttoosa 8:12; 9:7.

[Tohossa qofata]