Hananabaa yootiya Muusee nuuni Xoossaa azazota azazettikko, Xoossay nuna anjjanaagaa yootiis. (Zaarettido Wogaa 10:13; 11:27) Nuuni Xoossawu azazettiyoy I qaxxayennaadan yayyiyo gishshataassa gidenna. Nuuni A siiqiyoonne A azanttana danddayiyaabaappe naagettanawu koyiyo gishshawu, Xoossawu deˈiya ufayssiya eeshshati nuna denttettin ayyo azazettoos. “Nuuni Xoossaa siiqiyoogee a azazuwaa naagiyoogaa.”—1 Yohaannisa 5:3.

SHin Xoossawu azazettiyoogee anjjuwaa waati demissii? Ane naaˈˈu ogeta beˈoos.

“Taani GODAI, ne Xoossai, nena maaddiyaabaa tamaarissiyaagaa. Neeni baanau bessiya ogiyankka nena kaalettiyai tana.”—ISIYAASA 48:17.

Nuna Medhdhida Xoossay Yihooway nuna erees; qassi nuussi koshshiya kaaletuwaa immees. Nuuni akeekan kuuyana mala Xoossaa timirttee nuna maaddanaadan koyikko, Xoossay nuuni ay oottana mala koyiyaakko A qaalaappe tamaarananne hegeeta oosuwan peeshshana koshshees.

“Anjjettidaageeti Xoossaa qaalaa siyidi, he qaalai azaziyoogaadan oottiyaageeta.”—LUQAASA 11:28.

Ha wodiyan, miilooniyan qoodettiyaageeti Xoossaa Qaalaa azazettiyoogan tumu ufayssaa demmidosona. Leemisuwawu, elle hanqqettiyaanne ba machchiyo gujjin harata kehatetti baynna ogiyan oyqqiya Isppeenen deˈiya bitaniyaabaa qoppa. Issi galla I Yaaqooba naˈay Yooseefi bessido loˈˈo eeshshaa xeelliyaagan hananabaa yootiya Muusee xaafidobaa nabbabiis. Yooseefi aylle gididi bayzettiis; qassi wordduwan mootin qashettiis; gidikkokka, I yiillotenna, sarotettaa koyiyaanne atto giya asa gididi deˈiis. (Doomettaabaa, shemppo 37-45) Isppeenen deˈiya he bitanee hagaadan giis: “Yooseefa taarikiyaa wotta dentta qoppidoogee taani woppu gaanaadan, keha gidanaadaaninne elle hanqqettennaadan denttettiis. Hegaappe denddidaagan taani haˈˈi ufayttada deˈays.”

Nuuni harata waati oyqqana bessiyaakko hara kaaletuwaa Xoossaa Qaalay yootees. Kaalliya huuphe yohuwan hegaabaa loyttada akeeka.