Roza, “Tumu metiyoogaappe aaruwan ta qofan metidabay tana ubbatoo hirggissees” yaagaasu. O maaddida xiqiseti awugeetee? Issoy Maatiyoosa 6:34. He xiqisee, “Wonttobau hirggoppite; aissi giikko, wonttoi bau hirggana; gallassa ubbaukka gidiya a huuphe waayee de7ees” yaagees. Roza Yesuusi yootido he qofay wontto hanana danddayiyaabawu hirggennaadan O maaddidoogaa yootawusu. A gujjadakka, “Biron hanibeennanne geella hanennan aggana danddayiyaabaa qoppennankka gidiya waayee tana gakkees” yaagaasu.

Yasminokka hirggay unˈˈettiis. A, “Taani saaminttaa giddon amarida gallassaa yeekkays; qassi issi issi qammi xiskkikke” yaagaasu. O maaddida xiqisee awugee? A, “I [Xoossay] intteyyo qoppiyo gishshau, inttena hirggissiya ubbabaa a bolli olite” giya, 1 PHeexiroosa 5:7y maaddidoogaa yootawusu. Yasmina hagaadan gaasu: “Wodee aadhdhishin, taani Yihoowa woossiyoogaa aggabeykke, qassi I ta woosaa zaariis. Ta hashiyaappe gita toohoy wodhdhidabadan tawu siyettiis. Issi issitoo ta iita qofaa qoqqays, shin haˈˈi he wode oottana bessiyaabaa erays.”

Izabelo giyo yelagiyaa hagaadan gaasu: “Hoonu giyoogee zariyan laattiyooba gaada qoppays; ayssi giikko, ta aawaykka hegaa mala. Allaxxanawu  woy televizhiniyaa beˈanawu gaada, oottana koshshiyaabaa wotta bayays. Hegee issi uri keehi unˈˈettanaadan oottiyo gishshawunne murutabaa oottennaadan diggiyo gishshawu, qohiya meeze.” O 2 Ximootiyoosa 2:15n deˈiya Geeshsha Maxaafaa maaray maaddiis. Xiqisee, ‘Oottiyooban yeellayenna oosanchcha gidada, Xoossan sabettada ne huuphiyaa ayyo immanawu minna’ yaagees. Izabela, “Taani hoonu giidoogaa gaasuwan Yihooway ta oosuwan yeellatanaadan koyabeykke” yaagaasu. A kaseegaappe keehi laamettaasu.

Hegaadankka Kelsa, “Taani ootta sheedhdhana bessiyaabaa wodee wurana gakkanaashin wottaagays. Hegee tana yeessiyo, xiskkuwaa diggiyoonne keehi qofissiyo gishshawu, tana qohiis” yaagaasu. Leemiso 13:16n deˈiya, “Cincca asai ubbai eran oottees; shin eeyyai ba eeyyatettaa qonccissees” giya qofay Kelso maaddiis. Ha xiqisiyaa wotta dentta qoppada akeekidobaa A hagaadan gaasu: “Haniyaabaa qoppiyoogeenne kasetidi halchchiyoogee eratetta. Oottanabaa xaafada xaraphpheezan wottays; hegee qassi wodee wurana gakkanaashin wottabayiyoogaappe wodiyaa bazza oottanaadan tana maaddees.”

Kirstena, “Ta azinay tana oyddu guutta naatuura aggidi, nu aqo deˈuwaa laalidi biis” gaasu. O maaddida Geeshsha Maxafaa maaray awugee? Leemiso 17:17y, “Laggee mule wodekka siiqees; ishaikka metuwaa wode maaddanaassi yelettees” gees. Kirstena baagaadan Yihoowawu oottiyaageeti bana maaddanaadan oychchaasu. A demmido maadoy aybee? A hagaadan gaasu: “Ta laggeti tana daro ogiyan maaddidosona! Issoti issoti tawu koshshiyaabaanne ciishshaa shammidi ta penggen wottoosona. Taaninne ta naati keettaa laammiyo wode amaridaageeti heezzutoo maaddidosona. Issi laggee taani oosuwaa demmanaadan maaddiis. Ta laggeti ubbatoo tawu miyye gididosona.”

Hagaappe kase ibaa denttido Delfiinokka boorasee hegaadan baaxeyiis. Ibay ubbay xayi simmin A, “Issippe ufayttidi deˈiya asaappe dumma tarkka deˈiyaabadan qoppaas. Taani keehi boorasaas” yaagaasu. O maaddida issi xiqisee Mazamure 68:6n deˈiya, “Xoossai barkka de7iyaageetussi keettaa asaa [woykko keettaa] immees” yaagiyaagaa. A hagaadan gaasu: “He xiqisee deˈiyo keettaabaa yootennaagaa haˈˈi eraas. Xoossay tumu laggetanne Yihoowa siiqiya haratuura siiqettiyoonne woppu giidi deˈiyo ayyaanaabaa keettaa nuuyyo immiyoogaa akeekaas. SHin Yihoowaara dabbotaa minttennan haratuura dabbotaa minttana danddayennaagaakka akeekaas. Mazamure 37:4y hegawu tana maaddiis. Xiqisee, ‘GODAN ufaitta; i neeyyo ne wozanaa amuwaa immana’ yaagees.”

A hagaadan gaasu: “Taani Yihoowaara dabbotaa yaa minttana koshshiyoogaa akeekaas. I ooppenne aadhdhiya loˈˈo. Hegaa gishshawu, tanadan Yihoowa siiqiyaageetuura laggetanawu etaara oottana danddayiyoobaa xaafaas. Haratu balaa xeellennan aggada, eta loˈˈo eeshshaa qoppiyoogaa doommaas.”

Xoossawu oottiya laggeti nagaranchcha. Hara ubba asaagaadan, Yihoowa Markkatakka metoy baaxeyees. SHin Geeshsha Maxaafaappe tamaariyoobay danddayettiyo wode ubban harata maaddanaadan asaa denttettees. Hegaa mala asaara laggetiyoogee loˈˈoba. SHin caddi oyqqiya harggiyaa woy kayyuwaa mala, ha wodiyan qaarettenna metuwawukka Geeshsha Maxaafaa maaray maaddii?