Sinttayanabaa era. Geeshsha Maxaafay ‘keehi koshshiyaabaa shaakki eranaadan’ zorees. (Piliphphisiyuusa 1:10, NW) Neeni oottanawu koyiyo keehi koshshiyaabaa woy eesoyiyaabaa woy naaˈˈakka xaafa oyqqa; kahuwawu kattanaabaa shammiyoogaa mala keehi koshshiyaabay eesoyiyaaba gidennan aggana danddayees. Qassi neeni dosiyo televizhine prograamee doommishin beˈiyoogaa mala eesoyiyaabay keehi koshshiyaaba waayi gidana. *

Kasetada qoppa. Eranchchaa 10:10y hagaadan gees: “Tunida kalttaa poshennan coo qerikko, daro wolqqaa wurssees; shin aadhdhida eran oottiyoogee oosuwaa purissees.” Hegaappe tamaariyoobay aybee? Kalttaa poshiyoogaadan oottanabaa kasetada halchchiyoogan ne wodiyaa loytta goˈettana danddayaasa. Ne wodiyaanne wolqqaa wurssiyaaba gidikkonne darin maaddennabaa haroode oottanawu wottashsha, woy muleera agga baya. Neeni qoppidobaa ootta simmin neeyyo wodee deˈikko, simmada oottanawu halchchidobaa doommaagana danddayaasa. Kasetada halchchikko, ba kalttaa poshida cincca oosanchchaagaadan neeni oottiyoobay purana.

Sima deˈuwaa deˈa. Koshshennabaa woy coo wode wurssiyaabaa agga baya. Oottiyoobaynne keeriyoobay keehi darikko, neeni koshshennaban unˈˈettananne ufayttakka.

Haganaa sugiyoogaanne qofaa qachchennaagaa. “Carkkuwaa hanotaa naagiya ooninne kattaa zerenna; qassi shaarai denddanaashin naagiya ooninne ba kattaa cakkenna.” (Eranchchaa 11:4) Hegaappe tamaariyoobay aybee? Haganaa sugiyoogee wodiyaa coo xaysseesinne murutabaa oottennaadan diggees. Ubbabay giigana gakkanaashin naagiya goshshanchchay mule zerennan woy kattaa cakkennan aggana danddayees. Hegaadan, nuunikka deˈuwan gakkanabaa erenna gishshawu, qofaa qachchennan aggana danddayoos. Woykko issibaa kuuyanaappe kase hegaara gayttida ubbabaa wurssi eriichchana koshshees giidi qoppana danddayoos. Nu deˈuwan gitabaa kuuyanawu loytti qorananne pilggana bessees. Leemiso 14:15y, “Cinccai akeekidi tanggees” yaagees. SHin nuuni kuuyana bessiyo darobaa xeelliyaagan ubbabaa wurssi erana danddayennaagee qoncce.—Eranchchaa 11:6.

Bali baynnaagaa gidanawu koyiyoogaa. Yaaqooba 3:17y, “Bollappe [Xoossaa matappe] yiya aadhdhida eratettai . . . ashkke,” woykko bessiyaagaadan haniyaagaa gees. Issibaa loytti oottanawu halchchiyoogee keehi loˈˈoba! SHin issi issitoo, nuuni oottana danddayennaagaa keenaa nuuppe naagiyoogee nuuni azananaadaaninne hidootaa qanxxanaadan oottana danddayees. Leemisuwawu, hara doonaa tamaariya uri baliyoobaappe tamaarana danddayiyoogaa akeekidi, balanaagaa naagana bessees. SHin bali baynna ura gidanawu koyiya uri issibaa xeegaydda balanaakko gi hirggana danddayees; hegee qassi I diccennaadan oottees. Yaatiyo gishshawu, nuuppe naagiyooban ashkke gidiyoogee keehi loˈˈoba! Leemiso 11:2y, “Ashkketettaara aadhdhida eratettai yees” yaagees. Ashkke asati banttana xoqqu oottokkonanne otorettokkona; ubba issi issitoo eti bantta balan miiccoosona.

Oosuwaanne wodiyaa aattiyoobaa bessiyaagaadan yigga. “Daafuraaninne carkkuwaa oiqqanau yedettiyoogaa mala jaaman daafuridi demmiyo naa77u kushebaappe, woppan demmiyo issi kushebai darees.” (Eranchchaa 4:6) Darotoo, bessiyaagaappe aaruwaa oottiyaageeti bantta oosuwaa ayfiyan ufayttokkona. Eti bantta wodiyaanne wolqqaa ooso xallan wurssoosona. Hara baggaara, azalla asi darotoo xiskko dariyo gishshawu, ba alˈˈo wodiyaa coo xayssees. SHin Geeshsha Maxaafay nuuni bessiyaabaa qoppanaadan, hegeekka minnidi oottanaadan, qassi nu oosuwaa ayfiyan ufayttanaadan zorees. Hegee ‘Xoossaappe imettiya imota.’—Eranchchaa 5:19.

Xiskko xayoppa. Geeshsha Maxaafaa xaafidaageetuppe issoy, “Taani zin77ada sarotettan xiskkais” yaagiis. (Mazamure 4:8) Gasttati loytti shemppanawu ubba galla qammi hosppun saate gidiyaagaa xiskkana bessees. Bessiyaagaa keenaa xiskkikko, hegee nuuni oottiyooban qofaa wottanaadaaninne oorattabaa tamaarana mala loytti hassayanaadan maaddiyo gishshawu, nu wodiyaa maara goˈettoos. SHin, issi uri gidiyaagaa keenaa xiskkana xayikko, eesuwan tamaarenna gishshawu, daafaaban gelees, baleesinne yiillotees.

Polana danddayiyoobaa halchcha. “Aifiyan be7iyoobai amottiyoobaappe keha.” (Eranchchaa 6:9) Hegee woygiyoogee? Aadhdhida eranchcha uri ba amottiyoobaa xallawu deˈana geenna; ubba qassi he amottiyoobaa demmennaba gidikko, hegaa aggi bayees. Yaatiyo gishshawu, hegaa mala asi cinccatu erissuwan woy metootennan talˈˈiyooban cimettenna. Yaatiyoogaappe, I ‘ba ayfiyan beˈiyooban,’ hegeekka bawu deˈiyaaban woppu giidi deˈees.

Neessi keehi koshshiyaabaa qoppa. Neessi keehi koshshiyaabay loˈˈobay, gitabaynne keehi maaddiyaabay aybakko yigganawu nena maaddees. Neessi keehi koshshiyaabay aybakko qoppa. Neessi keehi koshshiyaabay likkebaa gidikko, hegee neeni loˈˈobaa kuuyanaadaaninne ne wodiyaa maara goˈettanaadan maaddees. Aybi keehi koshshiyaakko kuuyanawu nena maaddana danddayiyaabay aybee? Hegawu daroti Geeshsha Maxaafaa pilggoosona; an gita aadhdhida eratettay deˈiyoogaa eti akeekoosona.—Leemiso 2:6, 7.

Neessi aybippenne aaruwan koshshiyaabay siiqo gido. Qolasiyaasa 3:14y ‘siiqoy ubbabaa issippe shiishshi qahchiyoogaa’ yootees. Nuuni siiqoy baynnan, ubba qassi so asaara woppu giidi saruwan deˈana danddayokko. Duretanawu woy oosuwawu bichchaariiddi hegaa sheneho giyaageeti mulekka ufayttokkona. Geeshsha Maxaafay siiquwaabaa darotoo yootiyoogan hegee aybippenne aaruwan koshshiyaaba gidiyoogaa qonccissiyoy hegaassa.—1 Qoronttoosa 13:1-3; 1 Yohaannisa 4:8.

Xoossaa loytta eranawu wodiyaa bazza. Jeefayyo siiqiya machchiyaanne ufayttiya naaˈˈu naati deˈoosona; qassi I aakime gididi loˈˈo oosuwaa oottees. SHin ba oosuwan darotoo, keehi sahettiyaanne hayqqana haniya asaara gayttees. Hegaappe denddidaagan I, “Deˈoy hagaa mala gidanaadan halchchettidee?” giidi oychchees. Yaatin, Yihoowa Markkati Geeshsha Maxaafaa amppidi giigissido xuufiyaa issi galla nabbabidi ba oyshawu aliya zaaruwaa demmiis.

Jeefi eridobaa ba machcheeyyoonne ba naatuyyo yootin, etikka eranawu koyidosona. Yaatin, eti ubbaykka Geeshsha Maxaafaa xannaˈiyoogaa doommidosona; hegee eti bantta deˈuwan ufayttanaadaaninne bantta wodiyaa maara goˈettanaadan oottiis. Eti Geeshsha Maxaafaa xannaˈidi eridobay hadabaynne waayee baynna alamiyan merinawu deˈanawu hidootanaadankka oottiis.—Ajjuutaa 21:3, 4.

Jeefabay Yesuusi, “Bantta ayyaanan hiyyeesa gididoogaa eriyaageeti anjjettidaageeta” giidoogaa hassayissees. (Maatiyoosa 5:3) Neenikka Xoossaa loytta eranawu wodiyaa bazzuutee? Yaatiyoogee, ne wodiyaa goˈettiyo oge ubbaappe aadhdhiyaaba.