Ane ne dichchaabaa yoota.

Taani 1979n Amarkkan yelettaas. Tawu layttay heezza gidiyo wode ta aawaynne aayyiyaa paraman shaahettidosona. Ta aayyiyaa tana Ayhuda wogan dichchaasu; qassi yeshivas giyo Ayhudatu timirtte keettan tana tamaarissaasu. Tawu layttay laappuna gidiyo wode issi layttawu Israaˈeela biitti biida; yan kibutiz giyo maabaraa timirtte keettan tamaaraas. Hegaappe simmidi ta aayeera Mekisiiko biida.

Yan Ayhudatu woosa keettay baynnaba gidikkokka, Ayhuda haymaanootiyaa wogaa kaalliyoogaa aggabeykke. Sambbata gallassi shaamaa eettays, Toora giyo maxaafaa nabbabays, qassi sidar giyo woosaa maxaafaa goˈettada woossays. Timirtte keettan, darotoo tanaara tamaariyaageetussi nu haymaanootee koyroogaa gidiyoogaa yootays. SHin Yesuus Kiristtoosa haggaazuwaanne timirttiyaa yootiya, Ooratta Maachchaa giyo maxaafaa nabbaba erikke. Ubba, taani he timirttiyan moorettenna mala hegaa nabbabennaadan ta aayyiyaa yootaasu.

Neeni Ooratta Maachchaa nabbabanawu kuuyidoy aybissee?

Tawu layttay 17 gidiyo wode, ta timirttiyaa wurssanawu zaarettada Amarkkaa baas. Taani yan aara erettido, bana Kiristtaane giya issi asi Yesuusi baynnan ta deˈoy kumetta gidana danddayennaagaa yootiis.

Yaatin taani awu, “Yesuusa ammaniya asay cimettiis” yaagaas.

Yaagin I, “Ooratta Maachchaa nabbaba eray?” yaagidi oychchiis.

Oychchin “Erikke” yaagada zaaraas.

“Yaatin erennaban qofaa immiyoogee eeyyatetta gidennee?” yaagiis.

Erennaban qofaa immiyoogee eeyyatetta gaada taani ubbatoo qoppiyo gishshawu, I giidobay tana ammanttiis. A qofaa maayada, I immido Geeshsha Maxaafaa soo efaada Ooratta Maachchaa nabbabiyoogaa doommaas.

Ne nabbabidobaappe ay akeekadii?

Ooratta Maachchaa xaafida asati Ayhuda asata gidiyoogaa erada garamettaas. Qassi daruwaa nabbabido payduwan, Yesuusi asaa naaqqiya ura gidennan, kehanne asaa maaddana koyiya ashkke ura gidiyoogaa akeekaas. Ubba laybreeriyaa baada abaa yootiya maxaafata garxxaas. SHin hegaappe issoynne I Mase gidiyoogaa tana ammanttibeenna. Ubba issoti issoti A Xoossadan qonccissoosona; hegee qassi tawu mule mitettenna qofa. Yaatin Yesuusi ookko woossidee, baakko woossidee? Harabay qassi Yesuusi hayqqiis. Geeshsha Maxaafay qassi Xoossaabaa yootiiddi, “Neeni hayqqakka” yaagees. *

Yaatin ha oyshatu zaaruwaa waata demmadii?

Tumay bari huuphe phalqqettenna gishshawu, tumaa eranawu murttaas. Hegaa gishshawu, sidar giyo woosaa maxaafaa goˈettennan, koyro wodiyawu Xoossaakko yeekkaydda wozanappe woossaas. Taani woosaa wurssa simmin takkennan, karee qoxettiis. Kariyaa qoxxidaageeti naaˈˈu Yihoowa Markkata. Geeshsha Maxaafaa xannaˈanawu maaddiya issi xuufiyaa eti tawu immidosona. He xuufeenne etaara darotoo haasayidobay, taani Yihoowa Markkatu ammanoy Geeshsha Maxaafan baasettidoogaa ammananaadan oottiis. Leemisuwawu, Yihoowa Markkati Yesuusi Sillaasiyaa shaaho gidennan, “Xoossaa Na7aa” * gidiyoogaanne ‘Xoossay medhdhidobawu koyro’ * gidiyoogaa ammanoosona.

Hegaappe takkennan, Mekisiiko baas; baada, Masiyaa xeelliyaagan odettida hiraagatubaa Yihoowa Markkatuura gujjadakka xannaˈaas. Hegaara gayttidaagan odettida daro hiraagay deˈiyoogaa erada garamettaas! SHin haˈˈikka siriyoogaa aggabeykke. ‘Ha hiraagati Yesuusa xallan polettidonaa?’ qassi ‘I asaa cimmanawu hegaa polidaba milatissikko shin?’ gaada qoppaas.

Yaatin nena ammanttidabay aybee?

Yihoowa Markkati ooninne polidaba milatissanawu danddayenna hiraagata tana bessidosona. Leemisuwawu, 700 layttappe kase, hananabaa yootiya Mikiyaasi Masee Yihudan, Beetaliheeme kataman yelettanaagaa yootiis. * Ba koyidosan yelettana danddayiya asi oonee? Qassi Isiyaasi Masee danobaa oottiya ixettida asadan hayqqanaagaa yootiis; gidikkokka I dureti moogettiyo sohuwan moogettanaagaa xaafiis. * Ha ubba hiraagati Yesuusa bolli polettidosona.

Wurssetta naqaashay qassi, Yesuusa mayzzatuura gayttidaagaa. Masee Kawuwaa Daawita * zare gidanaagaa Geeshsha Maxaafay yootees. Beni Ayhudati asaa qoodaanne yeletaa taarikiyaa mazggafi oyqqiyo gishshawu, Yesuusi Daawita zare gidennaakko, A morkketi hegaa awaajjuwan erissana! SHin Yesuusi Daawita zare gidiyoogee aynne sirissenna gishshawu, eti hegaadan oottibookkona. Ubba daro asay A ‘Daawita naˈaa’ * yaagidi xeegiis.

Yesuusi hayqqoosappe 37 layttay aadhdhi simmin, 70 M.Ln, Rooma wotaaddarati Yerusalaame xayssido wode, asaa yeletaabaa yootiya mazggafay xayiis woykko moorettiis. Yaatiyo gishshawu, Masee O zarekko shaakki eranawu, 70 M.Lppe kase I qonccana bessees.

Hegaa akeekidoogee nena waati maaddidee?

Zaarettido Wogaa 18:18, 19n, Xoossay Israaˈeelan Muuse mala hananabaa yootiyaagaa denttanaagee kasetidi odettiis. Xoossay, “I ta sunttan yootiyo ta qaalaa siyenna oossinne haluwaa taani kiyana” yaagiis. Taani kumetta Geeshsha Maxaafaa loytta xannaˈidoogee, he hananabaa yootiyaagee Naazireeta Yesuusa gidiyoogaa ammananaadan oottiis.