He harggiyawu gaasodan qoppiyo dumma dummabay deˈikkokka, tumu gaasuwaa ooninne erana danddayibeenna. Hayqqiyaageetu qoodaa guuttanawu baaxetidobay ubbay hada attiis. Daro aayeti keehi waayettidi hayqqiyoogaa beˈiyo gishshawu, Zemalvisi he harggiyaa gaasuwaa eranawunne teqqanawu qofaa qachiis.

Zemalvisi oottiyo hosppitaaliyan maccaasay yeliyo naaˈˈu kiliniketi deˈoosona; koyro kilinikiyan hayqqiya aayetu qooday naaˈˈantto kilinikiyan hayqqiya aayetu qoodaappe keehi darees. He naaˈˈu kilinikiyan deˈiya dummatettay koyroogan, dottore gidanaageeti tamaaroosona; qassi naaˈˈanttoogan, maaretissiyoogaa loohiyaageeti tamaaroosona. Yaatin, issuwan hayqqiya aayetu qooday haraagaappe keehi dummatidoy aybissee? Zemalvisi he harggiyawu gaaso gidana giidi qoppiyo ubbabaa teqqanawu maliis; shin he ubbabaykka maaddibeenna.

Zemalvisi 1847 doomettaa heeran he harggiyaa gaasuwaa eranawu maaddiyaabaa akeekiis. Aara issippe oottiya a laggee, Yakob Kolechiki anhaa maramariiddi masunxxido gaasuwan suuttay hambbalaashettin hayqqiis. Haakimeti Kolechika anhaa maramaridi xaafidobaa Zemalvisi beˈidi, a harggiyaa malaataynne chayldbed fiver giyo gacinotu harggiyan sahettiyaageetu malaatay amarida hanotan issi mala gidiyoogaa akeekiis. Hegaa gishshawu, Zemalvisi anhaara gayttidaagan  hambbalaashiyaabay shahaara maccaasay chayldbed fiver giyo gacinotu harggiyan oyqqettanaadan oottana danddayiyoogaa qoppiis. Dottoretinne dottore gidanawu tamaariyaageeti, yeliya maccaasay deˈiyo kifiliyaa gelanaappe kase darotoo anhaa maramariyo gishshawu, eti shahaara maccaasaa maramariyo wode woy maaretissiyo wode akeekennan eta he harggiyan oyttoosona! Naaˈˈantto kifiliyan hayqqiyaageetu qooday guutta gididoy, maaretissiyoogaa tamaariyaageeti anhaa maramarenna gishshataassa.

SHahaara maccaasaa maramaranaappe kase kushiyaa hegawu giigida kemikaliyan meecettana bessiyoogaa Zemalvisi sohuwaara yootiis. Hegee hayqqiyaageetu qooday keehi guuxxanaadan oottiis: Hosppuniyan xeetaappe 18.27 asay hayqqikkokka, he layttaa wurssettan xeetaappe 0.19 asa xallay hayqqiis.

Zemalvisi oottidoban ufayttiday ubba asa gidenna. I gacinotu hayquwawu gaaso gididabaara gayttidaagan oottidobay a halaqay qoppiyoogaappe dumma gidiyo gishshawu, Zemalvisi hegaa xeelliyaagan yootiyooban a halaqay yiillotiis. Guyyeppe Zemalvisi Viyenan oottiyoogaa aggidi, Hangaare simmiis. I yan Pest giyoosan deˈiya hosppitaaliyan maccaasaa maaretissiyo kifiliyaa halaafe gididi oottiis; i oottidobay gacinotu sahuwan hayqqiyaageetu qooday xeetaappe 1kka gakkennaadan oottiis.

Zemalvisi ba deˈuwan oottidobaa xeelliyaagan, Ze Kowuz, Konsept, end Profileksis of CHayldbed Fiver giyo maxaafaa 1861n attamissiis. SHin i pilggidi akeekidobaa goˈˈay amarida layttay aadhanaashin erettibeenna. He wodetun, attana danddayiya daroti hayqqidosona.

Zemalvisi harggiyan oyttiya jarmetuppe naagettana danddayiyo ogiyaa akeekida koyro asatuppe issuwaa gidiyoogee guyyeppe erettiis. A oosoy ayfiyan beettennabati harggiyawu gaaso gidiyoogaa eranawu maaddiis. Harggee Jarme gaasuwan oyqqiyoogaa kasetidi akeekida asatuppe issoy a; qassi i oottidobay akkamuwaa saynisiyaaranne oosuwaara gayttidaagan keehi maaddiyaaba gidiis. SHin 3,000 layttappe kase, Muuse Higgiyan anhaara gayttidaagan oottana bessiya kaaletoy odettiis; guyyeppe hegee Geeshsha Maxaafan xaafettiis.