YELIDAAGEETA MAADDIYAABAA
8: Leemiso Gidiyoogaa
HEGEE AYBEE?
Leemiso gidiya aawatinne aayoti bantta tamaarissiyoogaadan oottoosona. Leemisuwawu, inttena koyida uraara gayttana koyibeenna gishshawu son deˈiiddi intte, “Son baawa ga” giishin siyiya intte naˈay tumanchcha gidana giidi naagana danddayekketa.
“Yelidaageeti bantta yootiyoogaadan oottennan deˈiiddi, bantta naati hegaa oottanaadan naagana danddayokkona. Ispponjjee heeran deˈiyaabaa xunxxiyoogaadan, naati nu giyoonne oottiyo ubbabaa akeekoosona; qassi nuuni eta tamaarissiyoogaadan oottennaba gidikko hegaa nuuyyo yootoosona.”—Devida.
GEESHSHA MAXAAFAY YOOTIYO MAARAA: “Neeni, ‘Wuuqqoppa’ yaagada qaalaa yootaasa; shin neeni ne huuphen wuuqqaiyye?”—Roome 2:21.
LEEMISO GIDIYOOGEE KOSHSHIYO GAASUWAA
Guutta naati, ubba yelagatikka bantta laggeta gujjin, hara ay asappekka aaruwan banttana yelidaageetu leemisuwaa kaalloosona. Yaatiyo gishshawu, intte naata ooppekka aaruwan suure kaalettana danddayiyay inttena; yaatanawu intte tamaarissiyoogaadan oottana bessees.
“Nuuni zaari zaaridi yootiyoobaa nu naˈay akeekidaakkonne erennan aggana danddayoos; shin geelladan nuuni giidoogaadan issitoo oottennaba gidikko, naˈay hegaa akeekana. Naati nu oottiyo ubbabaa, ubba eti erokkona giidi nuuni qoppiyo wodiyankka hegaa akeekoosona.”—Nikolo.
GEESHSHA MAXAAFAY YOOTIYO MAARAA: “Bollappe yiya aadhdhida eratettai . . . lo77o milatiya iitatetti bainnaagaa.”—Yaaqooba 3:17.
NEENI OOTTANABAA
Intte kaalliyo maarata yiggite. Neeni wodiyaa aattanawu beˈiyoobay aybee? Neeni ne aqo laggiyaanne ne naata waata oyqqay? Ne laggeti ay mala asee? Neeni haratuyyo qoppiya asee? Qanttan, ne eeshshay sinttappe ne naatuyyo deˈanaadan neeni koyiyoogaa malee?
“Taaninne ta azinay nuuni kaallenna maaraa nu naati kaallanaadan koyokko.”— Kiristtiino.
Mooriyo wode maarotaa oychchite. Intte naati intte balana danddayiyaageeta gidiyoogaa eroosona. Intte mooriyo wode, intte aqo laggiyawunne intte naatuyyo “Taani mooraas” giyo wode, tumanchcha gidiyoogaaranne bana ziqqi oottiyoogaara gayttidaagan naati gitabaa tamaaroosona.
“Nuuni nu balaa ammaniyaageetanne mooriyo wode maarotaa oychchiyaageeta gidiyoogaa naati erana koshshees. Nuuni yaatana xayikko, eti bantta balaa genttiyaageeta gidana.”—Robino.
“Nu naati ooppenne aaruwan nuna qulloosona; qassi eti nu hanotaa ubbatoo beˈiyo gishshawu nuuni leemiso gidiyoogee eta keehi maaddees. Naati aawatunne aayotu hanotaa beˈidi ubbatoo tamaaroosona.”—Wendela.
