TIMIRTTE 10
Yihoowa Markkatu SHiiqoti Nena Waati Maaddana Danddayiyoonaa?
Yihoowa Markkati nena bantta shiiquwaa shoobbi eriyoonaa? Neeni etaara shiiqa erennaba gidikko, shiiqiyoogaa doommanawu guuttaa yayyana danddayaasa. Neeni hagaadan qoppana danddayaasa: ‘Eti he shiiqotun waatiyoonaa? He shiiqoti keehi koshshiyoy aybissee? Taani shiiqana koshshiyoy aybissee?’ Haratuura shiiqiyoogee neeni Xoossaara dabbotaa minttanaadan, qassi nena ne huuphenkka waati maaddiyaakko ha timirttiyan ne akeekana.
1. Yihoowa Markkati issippe shiiqiyoy aybissee?
Geeshsha Maxaafaa xaafidaageetuppe issoy nuuni haratuura shiiqana koshshiyo waanna gaasuwaa waati qonccissidaakko beꞌa: “Taani kunttida yaa7an GODAA galatana.” (Mazamure 26:12) Hegaadankka, Yihoowa Markkati issippe shiiqiyoogan keehi ufayttoosona. Eti Xoossawu goynnanawu, yettan A sabbanawunne woossanawu kumetta saꞌan saaminttan saaminttan shiiqoosona. Eti layttan layttan issi issitoo gita shiiquwaakka issippe shiiqoosona.
2. Neeni nu shiiqotun ay tamaaranee?
Nuuni Xoossaa Qaalay ‘woygiyaakko birshshi qonccissidi,’ shiiqotun appe tamaarissoos. (Nahimiyaa 8:8 nabbaba.) Nu shiiqotun neeni Yihoowabaanne ufayssiya A eeshshatubaa tamaarana. I nena siiqiyoogaa loytta akeekiyo wode, ne aara dabbotaa minttana. Ufayssiya deꞌo deꞌanaadan I nena waati maaddana danddayiyaakkokka ne akeekana.—Isiyaasa 48:17, 18.
3. Nu shiiqotun nenaara haasayiya asati nena waati maaddana danddayiyoonaa?
“Issoi issuwaara waani siiqettanaakkonne qassi lo77o oosuwaa waati oottanaakko, issoi issuwau” qoppanaadan Yihooway nuna azaziis. (Ibraawe 10:24, 25) Neeni issoy issuwaara wozanappe siiqettiyaanne neegaadan Xoossaabaa loytti eranawu koyiya asatuura nu shiiqotun gayttana. Eti minttettiyaabaa Geeshsha Maxaafaappe yootishin neeni siyana. (Roome 1:11, 12 nabbaba.) Darobay metishin ufayttiya haraatuurakka neeni erettana. Nuuni ubbatoo shiiqanaadan Yihooway koyiyo gaasotuppe hageeti amaridaageetu xalla!
LOYTTA AKEEKA
Yihoowa Markkatu shiiqoti ay malakko, qassi he shiiqota shiiqanawu baaxetiyoogee nuna maaddiyaaba gidiyoy aybissakko akeeka.
4. Yihoowa Markkatu shiiqota
Kiristtaaneti Yihoowawu goynnanawu beni wode ubbatoo issippe shiiqoosona. (Roome 16:3-5) Qolasiyaasa 3:16 nabbabite; yaatidi ha oyshaa tobbite:
-
Beni wode Kiristtaaneti Yihoowawu waati goynnidonaa?
Yihoowa Markkatikka bantta SHiiquwaa Addaraashan ha wodiyan ubbatoo shiiqoosona. Eta shiiqoti ay malakko beꞌanawu, BIIDUWAA beꞌite. Yaatidi galchchaa shiiquwaa bessiya pootuwaa beꞌidi, kaallidi deꞌiya oyshata tobbite.
-
Yihoowa Markkati bantta SHiiquwaa Addaraashan oottiyoobay Qolasiyaasa 3:16n neeni nabbabiyoobaara aybin issi mala gidiyoogaa akeekadii?
-
Biiduwaappe woy pootuwaappe ha shiiqotuban nena ufayssiya harabaa ay akeekadii?
Naaꞌꞌantto Qoronttoosa 9:7 nabbabite; yaatidi ha oyshaa tobbite:
-
Yihoowa Markkati bantta shiiquwan miishshaa oychchennay aybissee?
Ha saaminttan shiiqiyo shiiqotuppe issuwan tamaaranabaa nena xannaꞌissiya uraara beꞌite.
-
He shiiquwan nena keehi ufayssana woy maaddana gaada ne qoppiyoy aybee?
Hagaa eray?
Kumetta saꞌan shiiqota shiiqiyo sohuwaanne wodiyaa jw.org saytiyan beꞌana danddayaasa.
-
Nu shiiqotun haasayati, ootti-besotinne biidoti deꞌoosona. SHiiqota doommiyo wodenne wurssiyo wode mazamuriyaa yexxoosinne woossoos
-
Ezggiyaageeti bantta qofaa yootanaadan shiiquwaa kaalettiyaagee issi issitoo oychchees
-
So asaa, aqo oyqqibeennaageeta, cimidaageetanne naata ubbaa ufayssan mokkoos
-
Nu shiiquwawu miishsha qanxxissokko. Yihoowa Markkati miishsha oychchokkona.
5. SHiiqota shiiqanawu baaxetana koshshees
Yesuusantta soo asaabaa qoppa. Eti layttan layttan Naazireeteppe Yerusalaamen deꞌiya beeta maqidasiyaa gakkanawu deretiya heeraara kanttidi amarida gallassaa hemettoosona. Luqaasa 2:39-42 nabbabite; yaatidi ha oyshata tobbite:
-
Eti Yerusalaame baanawu baaxetana koshshiis gaada qoppay?
-
Neeni geella shiiqota shiiqanawu baaxetana koshshiyoy aybissee?
-
Nena metikkokka, shiiqota shiiqiyoogee maaddees gaada qoppay? Aybissi?
Yihoowawu goynnanawu issippe shiiqiyoogee keehi koshshiyoogaa Geeshsha Maxaafay yootees. Ibraawe 10:24, 25 nabbabite; yaatidi ha oyshaa tobbite:
-
Nuuni shiiqota ubbatoo shiiqana koshshiyoy aybissee?
ISSI ISSI ASAY HAGAADAN GEES: “Neeni asaara shiiqana koshshenna. Geeshsha Maxaafaa ne son xannaꞌiyoogee gidees.”
-
Geeshsha Maxaafan deꞌiya ay xiqisee woy ay qofay Yihooway koyiyoobaa qonccissii?
AY AKEEKADII?
Yihoowabaa loytta eranawu, aara dabbotaa minttanawunne haraatuura ayyo goynnanawu, shiiqota shiiqiyoogee nena maaddana.
Zaaretuwaa
-
Nuuni issippe shiiqanaadan Yihooway nuna minttettiyoy aybissee?
-
Yihoowa Markkatu shiiquwan neeni ay tamaaranee?
-
SHiiqoti nena hara ogiyan maaddana danddayoosona gaada qoppay?
PILGGA
SHiiqota shiiqanawu neeni yayyiyaaba gidikko shin? Hegaadan yayyiya issi bitanee shiiquwaa waani dosidaakko akeeka.
SHiiqoy issi yelagaa waati ufayssidaakkonne, qassi I ubbatoo shiiqanawu ay oottidaakko akeeka.
SHiiqota shiiqiyoogaa harati waati xeelliyaakko akeeka.
“SHiiquwaa Addaraashan SHiiqana Koshshiyoy Aybissee?” (Nu websaytiyan deꞌiyaaba)
Makkalanchcha panggatuppe issoy Yihoowa Markkatu shiiquwaa shiiqin A deꞌoy laamettiis.
“SHugguxiya Oyqqennan Awanne Biikke” (Wochchiyo Keelaa huuphe yohuwaa)
Hageeta Beꞌadii?
ASAY DAROTOO OYCHIYO OYSHATA
Yihoowa Markkati Geeshsha Maxaafaa Xannaꞌissiyoy Ayba Ogiyaanee?
Yihoowa Markkati miishsha qanxxissennan xannaꞌissiyo prograamiyan, Geeshsha Maxaafaa birshshettaa awugaakka goꞌettana danddayaasa. Ne so asa ubbaynne ne laggetikka nenaara xannaꞌanaadan shoobbana danddayaasa.
