A BITANEE ba maayuwaa ayssi pooshshiyaakko eray? Hegaadan i oottana mala Yihooway yootiis. He bitanee Akiiya geetettiya Xoossay kiittin hananabaa yootiyaagaa. Hananabaa yootiyaagee aybakko eray? I sinttappe hanana deˈiyaabaa kasetidi Xoossay assi yootiyo asa.

Hagan Akiiyi Iyorbbaamassi odiiddi deˈees. Iyorbbaami, Solomoni ba keexxiyo oosotuppe amaridaageetu bolli sunttido asa. Akiiyi hagan ogiyan Iyorbbaamaara gayttidi, issi oorattabaa oottiis. I ba maayido ooratta maayuwaa qaaridi, 12 kessidi pooshshiis. I Iyorbbaama: ‘Tammu pooshota neeyyo ekka’ yaagiis. Akiiyi Iyorbbaamassi 10u pooshota aybissi immidaakko eray?

Yihooway Solomonappe a kawotettaa ekkanaagaa Akiiyi qonccissiis. Yihooway 10u zareta Iyorbbaamassi immanaagaa Akiiyi yootiis. Hegaa giyoogee, Solomona naˈaa Robiˈaami haaranau naaˈˈu zaretu xallay attees yaagiyoogaa.

Akiiyi Iyorbbaamassi yootidobaa Solomoni siyidi, keehippe yiillotiis. I Iyorbbaama woranau koyiis. SHin Iyorbbaami Gibxxe biitti baqatiis. Guutta wodeppe guyyiyan Solomoni hayqqiis. I 40u layttaa kawotiis; shin haˈˈi a naˈaa Robiˈaami kawo gidiis. Iyorbbaami Gibxxen deˈiiddi Solomoni hayqqidoogaa siyidi, Israaˈeele biitti simmidi yiis.

Robiˈaami loˈˈo kawo gidenna. I ubba ba aawaa Solomonappekka aadhdhidi asaassi iitiis. Iyorbbaaminne amarida hara erettida asati Kawuwaa Robiˈaamakko biidi, asaassi kehanaadan a oychchidosona. SHin Robiˈaami siyennan ixxiis. Ubba i kaseegaappekka aattidi yaa iitiis. Yaatiyo gishshau, asay Iyorbbaama 10u zaretu bolli kawoyidosona; shin Biniyaamanne Yihudaa zareti naaˈˈay Robiˈaami bantta kawo gididi takkanaadan oottidosona.

Iyorbbaami ba asay Yerusalaame Yihoowa beeta maqidasiyaa biidi goynnanaadan koyibeenna. Hegaa gishshau, naaˈˈu marata worqqaappe medhdhidi, 10u zaretu kawotettaa asay he maratussi goynnanaadan oottiis. Gamˈˈennan biittay danuwaaninne makkalan kumiis.

Naaˈˈu zaretu kawotettankka metoy deˈees. Robiˈaami kawotoosappe ichchashu laytta kumennan, Gibxxe kawoy Yerusalaame olanau yiis. I Yihoowa beeta maqidasiyaappe daro buquraa ekki efiis. Yaatiyo gishshau, beeta maqidasee keexettido wodeegaadan takkidoy guutta wode xalaalaassa.