1. So asay shaahettanaadan oottana danddayiya issi issibati aybee?

 SIIQOY, issippetettaynne sarotettay deꞌiyo keettan deꞌiya asay ufayttees. Intte soo asaykka hegaa mala gidana giidi qoppoos. Keehi daro keettaa asay hegaa mala gidennaageenne dumma dumma gaasuwan shaahettiyoogee azzanttiyaaba. So asay shaahettanaadan oottiyaabay aybee? Ha shemppuwan heezzubata beꞌana. Issi issi keettan deꞌiya asay dumma dumma haymaanootiyaa kaallees. Qassi issi issi keettan deꞌiya naati issi aawaa woy issi aayee naata gidennan aggana danddayoosona. Hara keettan qassi deꞌuwaassi koshshiyaabaa kunttanau baaxetiyoogee woy daro aquwaa amottiyoogee so asay shaahettanaadan oottiyaaba milatees. SHin issi keettaa asay shaahettanaadan oottiyaabay hara keettaa asay shaahettanaadan oottennan aggana danddayees. Hegaadan haniyoy aybissee?

2. So asaa deꞌuwaara gayttidaagan issi issi asay awuppe kaaletuwaa koyii, shin ubbaappe aadhiya kaaletuwaa awuppe demmiyoo?

² Issi gaasoy qoppiyo ogiyaa. Issi uraa qofaa wozanappe akeekanau maliyaaba gidikko, so asay issippetettay deꞌiyoogaa gidanaadan ay oottana koshshiyaakko loyttada akeekana danddayaasa. Hara gaasoy neeni kaaletodan goꞌettiyoobaa. Daro asay banttanaara oottiyaageetu zoriyaa, shoorotu zoriyaa, eraadooniyan odettiyaabaa woy hara kaaletuwaa kaalloosona. Gidikkokka, issi issi asay Xoossaa Qaalay bantta hanotaara gayttidabaa yootiyoogaa akeekidi, tamaaridobaa oosuwan peeshshoosona. Hegaadan oottiyoogee son sarotettay deꞌanaadan  maaddana danddayiyoy ayba ogiyaanee?—2 Ximootiyoosa 3:16, 17.

3. (a) Hara ammanuwaa kaalliya uraa ekkiyoogaa woy geliyoogaa xeelliyaagan Geeshsha Maxaafay woygii? (b) Aqo laggetuppe issoy ammaniyaagaa, hankkoy qassi ammanennaagaa gidiyo wode, oosuwan peeshshana koshshiyo issi issi baaso siraatati awugeetee?

³ Hara haymaanootiyaa kaalliya uraa ekkennaadan woy gelennaadan Geeshsha Maxaafay minttidi zorees. (Zaarettido Wogaa 7:3, 4; 1 Qoronttoosa 7:39) SHin neeni gela simmada, Geeshsha Maxaafaa tumaa tamaaridaaro gidana danddayaasa; qassi ne azinay tumaa koyennaagaa gidana danddayees. Yaatin waatana koshshii? Neeni geliyo wode maacettido maachaa birshshanaadan hegee gaaso gidennaagee qoncce. (1 Qoronttoosa 7:10) Geeshsha Maxaafay aqo deꞌoy laalettennaadan zorees, qassi aqo laggeti bantta giddon ooshshay merettiyo wode hegaa giigissanaadaaninne he metuwaappe baqatennaadan minttettees. (Efisoona 5:28-31; Tiitu 2:4, 5) SHin ne azinay neeni Geeshsha Maxaafaa ammanuwaa kaallennaadan eqettikko shin? Neeni gubaaꞌiyaa shiiquwaa beennaadan digganau malana danddayees woy ‘ta maccaasiyaa haymaanootiyaabaa yootanau sooppe soo baanaadan koyikke’ gaana danddayees. Yaatin waatuutii?

4. Azinaa ammanoy maccaaseegaappe dumma gidiyo wode, a ayyo ayba ogiyan qarettana danddayay?

⁴ ‘Ta azinay hegaadan qoppiyoy aybissee?’ gaada nena oycha. (Leemiso 16:20, 23) Neeni oottiyoobaa loyttidi erana xayikko, nebay a qofissana danddayees. Woy eti xoqqu ootti xeelliyo wogaa bonchiyoogaa neeni aggido gishshau, i nena naaqqanaadan a dabboti a denttettana danddayoosona. Issi azinay, “Taani son tarkka attaas” yaagiis. Ha bitanee haymaanootiyaa gaasuwan ba maccaasiyo xayidoogaadan qoppiis. SHin otoroy i he hanotaa ammanidi ekkennaadan diggiis. Neeni Yihoowa  siiqiyoogee ne azinaa kaseegaadan siiqiyoogaa diggennaagaa ayyo yootana koshshees. Aara wodiyaa issippe aatta.

5. Azinaa ammanoy dumma gidido maccaasiyaa bessiyaagaadan oottana koshshiyaabay aybee?

⁵ SHin neeni hanotata aadhida eratettan oyqqanau, keehippe koshshiyaabaa qoppana bessees. Xoossaa Qaalay maccaasaa, “Ammaniya asau bessiyaagaadan, intte azinatuyyo haarettite” yaagidi zorees. (Qolasiyaasa 3:18) Yaatiyo gishshau, eti bantta sheniyaadan hanana bessenna. Hegaa bollikka, ha xiqisee “ammaniya asau bessiyaagaadan” giyoogan, azinau haarettiyo wode Godaayyo haarettiyoogaa dogana bessennaagaa yootees. Azinaassinne Godaassi bessiyaagaadan haarettana koshshees.

6. Kiristtaane maccaasiyaa hassayana koshshiyo baaso siraatay awugee?

⁶ Issi Kiristtaanee gubaaꞌiyaa shiiqota shiiqiyoogeenne Geeshsha Maxaafan baasettida ba ammanuwaa  haratuyyo yootiyoogee tumu goynuwan keehippe koyettiyaabanne aggana bessennaba. (Roome 10:9, 10, 14; Ibraawe 10:24, 25) Xoossay neeppe koyiyoobaa neeni oottennaadan issi uri azaziyaaba gidikko shin waatuutii? Yesuus Kiristtoosi kiittidoogeeti, “Nuuni asau azazettanaappe Xoossau azazettanau bessees” yaagidosona. (Oosuwaa 5:29) Eta leemisoy deꞌuwaara gayttidaagan daro hanotan oosuwan peeꞌana danddayiyaaba. Yihoowa siiqiyoogee neeni ayyo oottana bessiyaabaa oottanaadan denttettennee? Qassi neeni ne azinaa siiqiyoogeenne a bonchiyoogee a hanqqetissennan neeni Yihoowayyo bessiyaagaadan goynnanaadan oottii?—Maatiyoosa 4:10; 1 Yohaannisa 5:3.

7. Issi Kiristtaane maccaasiyaa waatanau murttana koshshii?

⁷ Ubbatoo hegaadan oottiyoogee metana danddayiyoogaa Yesuusi yootiis. Ammanennaageeti tumu goynuwaa eqettiyoogan ammaniyaageeta ixxiyo gishshau, so asay issoy issuwaappe shaahettanaagaa Yesuusi kasetidi odiis. (Maatiyoosa 10:34-36) Jaappaanen deꞌiya issi maccaasiyo hegaa malabay gakkiis. I azinay o 11 layttau eqettiis. I o meqetti baynna ogiyan oyqqiis; qassi darotoo o sooppe kessidi kariyaa gorddees. SHin a genccaasu. Kiristtaane gubaaꞌiyan deꞌiya laggeti o maaddidosona. A aggennan woossaasu; qassi 1 PHeexiroosa 2:20⁠ppe minttettuwaa demmaasu. Ha Kiristtaane maccaasiyaa gencciyaaba gidikko, i azinay issi galla iira Yihoowayyo goynnanaagaa hidootaasu. I a hidootidoogaadan Yihoowayyo goynniyaagaa gidiis.

8, 9. Issi maccaasiyaa ba azinau xube gidana danddayiyaabaa oottenna mala waatana bessii?

⁸ Ne aqo laggiyaa xeelay laamettanaadan neeni oottana danddayiyo darobay deꞌees. Leemisuwau, ne azinay ne ammanuwaa eqettiyaaba gidikko, haraban nena i amassalissiyoobaa oottoppa. Keettaa ubbatoo geeshsha oyqqa. Nena loytta oyqqa. Siiqiyaaronne nashshiyaaro gida. A toochiyoogaappe maaddiyaaro gida. A aawatettaa  bonchiyoogaa bessa. Neeni qohettidabadan qoppiyo wodekka, haluwaa kiyoppa. (1 PHeexiroosa 2:21, 23) Polo gidennaagaa qoppada ooshshay merettiyo wode, maarana mala kasetada ashkketettan oycha.—Efisoona 4:26.

⁹ Neeni gubaaꞌiyaa shiiquwaa biyoogee ayyo qumay giigennaadan gaaso gidanaadan oottoppa. Issi issitoo ne azinay son baynna wode, haggaazuwaa kiyana danddayaasa. Kiristtaane maccaasiyaa ba azinay dosennaba gidikko, ayyo Geeshsha Maxaafaabaa yootiyoogee loꞌꞌo gidenna. A kiitettida PHeexiroosi hagaadan giido zoriyaa kaallawusu: “Maccaasatoo, intte azinatuppe Xoossaa qaalau azazettenna issooti issooti de7ikkokka, intte palamettennan, eti intte yashshatettaanne intte geeshsha de7uwaa be7idi ammanana mala, etau haarettite.” (1 PHeexiroosa 3:1, 2) Kiristtaane maccaasay Xoossaa ayyaanaa ayfiyaa macarata loytti ayfanau baaxetees.—Galaatiyaa 5:22, 23.

10. Kiristtaane azinay ba maccaasee ammanoy baagaappe dumma gidikko waatana koshshii?

¹⁰ Azinay Kiristtaane gidin maccaasiyaa gidana xayikko shin? Hegaa mala hanotau maaddiyaabaa Geeshsha Maxaafay, ‘Ammanenna machchiyaa deꞌiyo ammaniya asi, a machchiyaa aara issippe deꞌanau dosikko, o yeddoppo’ yaagidi zorees. (1 Qoronttoosa 7:12) Azinata, “Intte maccaasaa siiqite” yaagidi zorees.—Qolasiyaasa 3:19.

11. Issi azinay ba maccaasiyaa Kiristtaane gidana xayikko, ba aawatettaa maataa akeekaaninne hiillan goꞌettana danddayiyoy ayba ogiyaanee?

¹¹ Ne maccaasee ammanoy neegaappe dumma gidikko, ne maccaasiyo loyttada boncha; qassi i qofaa akeeka. Neeni maayennaba gidikkonne, a gastta asa gidiyo gishshau, ba ammanuwaara gayttida issi issibaa oottennaadan diggana bessenna. Iira ne ammanuwaabaa koyro haasayiyo wode, a daro wodiyau ammaniyoobaa aggada  oorattabaa doorawusu gaada qoppoppa. Anne eta soo asay daro wodiyau meezetidobay worddo gidiyoogaa hanqqetissiya ogiyan yootiyoogaappe, danddayan iyyo Geeshshaa Maxaafaappe yootanau baaxeta. Neeni gubaaꞌiyaa oosuwaa oottanau daro wodiyaa goꞌettiyaaba gidikko, o koyennabadan qoppana danddayawusu. Neeni Yihoowayyo oottiyoogaa a eqettana danddayawusu; shin hegee, “Neeni tanaara daro wodiyaa aattanaadan koyays!” giyoogaa gidana danddayees. Danddayancha gida. Neeni siiquwan iyyo qoppiyoogaappe denddidaagan, a wurssettan tumu goynuwaa kaallana danddayawusu.—Qolasiyaasa 3:12-14; 1 PHeexiroosa 3:8, 9.

12. Azinaa ammanoynne maccaasee ammanoy dumma gidikkokka, naata loohissiyoogaara gayttidaagan Geeshsha Maxaafay yootiyoobaa waatidi oosuwan peeshshana koshshii?

¹² So asay haymaanootiyan dumma gidido keettan, naata ammanuwaabaa tamaarissiyoogee issi issitoo palamissiyaaba gidana danddayees. Geeshsha Maxaafay yootiyoobaa waatidi oosuwan peeshshana koshshii? Waannatidi naata tamaarissana bessiyay aawaa gidiyoogaa Geeshsha Maxaafay yootees; shin aayyiyaakka oottana bessiyo keehi koshshiyaabay deꞌees. (Leemiso 1:8; Doomettaabaa 18:19⁠ranne Zaarettido Wogaa 11:18, 19⁠ra gatta xeella.) Aaway Kiristtoosi huuphe gidiyoogaa ammanennaagaa gidikkonne, so asau huuphe gidiyay aawaa.

13, 14. Azinay ba maccaasiyaa naata Kiristtaane shiiquwaa efeennaadan woy eta xannaꞌissennaadan diggiyaaba gidikko, waatana danddayay?

¹³ Ammanenna issi issi aawati aayyiyaa haymaanootiyaabaa naata tamaarissiyoogaa diggokkona. SHin harati diggoosona. Ne azinay neeni naata gubaaꞌiyaa shiiquwaa efiyoogaa diggiyaaba woy son eta Geeshsha Maxaafaa xannaꞌissennaadan diggiyaaba gidikko shin? Neeni Xoossaa Yihoowa aawatettaa, ne azinaa  aawatettaanne ne siiqiyo naatuura gayttida aawatettaa bessiyaagaadan xeellana koshshees. Nena hegau aybi maaddana danddayii?

¹⁴ Hegaa xeelliyaagan neeni woossiyoogee erettidaagaa. (Piliphphisiyuusa 4:6, 7; 1 Yohaannisa 5:14) SHin wurssettan, waatana bessiyaakko kuuyana koshshiyay nena. Neeni ne azinaa aawatettaa bessiyaagaadan xeelliyoogaa ayyo hiillan qonccissiyaaba gidikko, i nena eqettiyoogaa wurssettan aggana danddayees. Ne azinay neeni naata shiiquwaa efeennaadan woy eta Geeshsha Maxaafaa xannaꞌissennaadan diggiyaaba gidikkokka, eta tamaarissana danddayaasa. Naati Yihoowa siiqanaadan, a Qaalaa ammananaadan, bantta aawaa gujjin yelidaageeta bonchanaadan, hara asaa siiqanaadaaninne mino oosancha gidanaadan neeni galla galla etau yootiyoogan, qassi loꞌꞌo leemiso giyoogan eta loyttada tamaarissanau mala. Wurssettan, aaway loꞌꞌo ayfiyaa akeekidi neeni baaxetada oottidobaa nashshana danddayees.—Leemiso 23:24.

15. Naata tamaarissiyoogaara gayttidaagan ammaniya aawau deꞌiya aawatettay aybee?

¹⁵ Neeni Yihoowa ammaniyaagaa, qassi ne maccaasiyaa ammanennaaro gidikko, neeni naata “Godaa seeraaninne zoriyan” dichana bessees. (Efisoona 6:4) Hegaadan oottiyo wode, ne maccaasiyo kehatettan, siiquwaaninne bessiyaagaadan oyqqana koshshees.

16, 17. Naati banttana yelidaageetuugaappe dumma haymaanootiyaa kaalliyaaba gidikko, hassayana bessiyo Geeshsha Maxaafaa baaso siraatay aybee?

¹⁶ Naati banttana yelidaageetuugaappe dumma haymaanootiyaa kaalliyoogee oorattaba gidenna. Ne hanotay hegaa malee? Hegaa mala gidikko, Geeshsha Maxaafan neeyyo haniya zoree deꞌees.

 ¹⁷ Xoossaa Qaalay, “Inttena yelidaageetuyyo Godan azazettite; aissi giikko, hagee oottanau bessiyaabaa. . . . ‘Ne aawaanne ne aayyiyo bonchcha’” yaagees. (Efisoona 6:1, 2) Hegee yelidaageeta wozanappe bonchiyoogaa gujjees. SHin, yelidaageetussi azazettiyoogee koshshiyaaba gidikkonne, tumu Xoossaayyo goynniyoogaa diggiyaagaa gidana bessenna. Issi naꞌay gitaa gididi kuushshaa kuuyiyoogaa doommiyo wode, i oottiyoobaara gayttidaagan ayyo aawatettay kaseegaappe darees. Hagee kawuwaa higgiyaara gayttidaagaa xalla gidennan, Xoossaa higgiyaara gayttidaagankka tuma. Geeshsha Maxaafay, “Nuuni huuphiyan huuphiyan nubaa Xoossau yootana” yaagees.—Roome 14:12.

18, 19. Naati banttana yelidaageetuugaappe dumma haymaanootiyaa kaalliyaaba gidikko, bantta ammanuwaabaa yelidaageeti akeekanaadan waatana danddayiyoonaa?

¹⁸ Ne ammanoy neeni deꞌuwan issi issibaa laammanaadan oottiyaaba gidikko, nena yelidaageetu qofaa akeekanau mala. Neeni Geeshsha Maxaafay tamaarissiyoobaa erada oosuwan peeshshiyo gishshau, kaseegaappe aaruwan eta bonchiyaagaa, etau azazettiyaagaanne eti azaziyoobaa minnada oottiyoogaa akeekiyo wode, ufayttana danddayoosona. SHin, neeni kaalliyo ooratta ammanuwaa gaasuwan eti xoqqu oottidi xeelliyo ammanuwaanne wogaa kaallennan ixxikko, eti nena laatissanau koyiyoobaa neeni karidabadan qoppana danddayoosona. Neeni oottiyoobay heeran deꞌiya asay meezetidoogaappe dumma gidikko, woy nena ishalissees giidi eti qoppiyo deꞌuwaa neeni deꞌennaadan hegee diggiyaaba gidikko, ne hanotay eta hirggissana danddayees. Otoroykka xube gidana danddayees. Neeni, taagee likke intte balideta yaagiyaabadan qoppana danddayoosona.

¹⁹ Yaatiyo gishshau, danddayettiyaaba gidikko takkennan, nena yelidaageeti gubaaꞌiyaa cimatuura woy intte heeran deꞌiya hara gastta Yihoowa Markkatuura gayttanaadan ootta. Kawotettaa Addaraashan tamaariyoobaa  yiidi siyanaadaaninne Yihoowa Markkati ay mala asakko beꞌanaadan nena yelidaageeta minttetta. Nena yelidaageeti takkidi bantta qofaa laammana danddayoosona. Yelidaageeti keehippe eqettiyaaba, Geeshsha Maxaafaa baaso oottidi giigissido xuufeta xayssiyaabanne gubaaꞌiyaa shiiquwaa beennaadan diggiyaaba gidikkokka, darotoo harasan nabbabana, Kiristtaanetuura gayttananne haggaazuwau kiyennan markkattana danddayaasa. Qassi Yihoowakko woossana danddayaasa. Issi issi yelagati issi issibaa oottanaappe kase, gitatidi sooppe kiyidi banttarkka deꞌiyo wodee gakkanaashin naagoosona. SHin son deꞌiya hanotay ayba gidikkokka, “Ne aawaanne ne aayyiyo bonchcha” giyaagaa dogoppa. Son sarotettay deꞌanaadan neeppe koyettiyaabaa ootta. (Roome 12:17, 18) Ubbaappe aaruwan, Xoossaara saruwan deꞌa.

20. Dichiya aaway woy aayyiyaa eta yelibeennaageeta gidikko, naati waanana danddayiyoonaa?

²⁰ Daro keettan wolqqaama metoy merettiyoy haymaanootiyaara gayttidaagaana gidennan, balakko naatuura gayttidaagaana. Ha wodiyan daro keettan balakko naati deꞌoosona. Hegaa mala keettan, naati qanaatiyaageetanne lancciyaageeta woy ammanettennaagaappe denddidaagan ooyettiyaageeta gidana danddayoosona. Hegaa gishshau, banttana dichiyaageeti loꞌꞌo aawa woy aayo gidanau wozanappe oottiyoobaa kallennaageeta gidana danddayoosona. Balakko naati deꞌiyo keettay giiga gidanaadan aybi maaddana danddayii?

21. Eta hanotay dumma gidikkokka, balakko naata dichiyaageeti maaduwaa demmanau Geeshsha Maxaafaa baaso siraataa kaallana bessiyoy aybissee?

²¹ Hanotay dumma gidikkokka, keettaa asay giiga gidanaadan maaddiya Geeshsha Maxaafaa baaso siraatay hagaa mala keettaa asaukka hanees. Guutta wodiyau,  he baaso siraatata kaallennan aggiyoogee loꞌꞌo milatana danddayees; shin guyyeppe keehi azzanttiyaaba kaalettana danddayees. (Mazamure 127:1; Leemiso 29:15) Daro wodiyau maaddiya, Geeshsha Maxaafay yootiyoobaa oosuwan peeshshanau aadhida eratettay, qassi so asay issibaa haasayiyoynne oottiyoy aybissakko shaakki eranau akeekay deꞌiyoogeeta gidite. Qassi issoy issuwau qarettana koshshees.—Leemiso 16:21; 24:3; 1 PHeexiroosa 3:8.

22. Naati banttana dichiya aawaassi woy aayeessi haarettanau metootana danddayiyoy aybissee?

²² Neeni balakko naata dichiyaagaa gidikko, kase he soo asaara gayttiyo wode, naati nena ufayssan mokki ekkiyoogaa hassayana danddayaasa. SHin neeni eta dichiyaagaa gidiyo wode, eta xeelay laamettana danddayees. Naati banttappe shaahettida aawaa woy aayyiyo hassayiyoogan, neeni eti he uraa siiqennaadan oottaasa gi qoppidi, neeyyo ammanettennan aggana danddayoosona. Eti issi issitoo, neeni eta aawa woy eta aayo gidennaagaa yootana danddayoosona. Hegaadan haasayiyoogee qohees. Gidikkokka, “elle hanqqettoppa.” (Eranchchaa 7:9) Naatu hanotaa giigissanau akeekaanne qaretaa koshshees.

23. Balakko naata waatidi seerana danddayettii?

²³ Issi uri naata seeriyo wode he eeshshati keehippe koshshoosona. Ubbatoo bessiyaagaadan seerana koshshees. (Leemiso 6:20; 13:1) Naati ubbay issi mala gidenna gishshau, seeriyo ogeekka hanotaadan dumma dumma. Koyro heeran, yelidaagee naata seeriyoogee loꞌꞌo gidiyoogaa balakko naata dichiyaageetuppe issoti issoti akeekidosona. SHin naata yelida urinne balakko naata dichiya uri naata seeriyoogaara gayttidaagan issoy issuwaara maayettananne issoy issuwaa kaafana bessees; balakko naata yelido naatuppe shaakki xeellana bessenna. (Leemiso 24:23) Naati azazettiyoogee keehi koshshees; shin issi issi balaa intte aggi aadhana bessees.  Bessiyaabaa oottite. Siiquwan seerite.—Qolasiyaasa 3:21.

24. Balakko naati deꞌiyo keettan kandduwaara gayttidaagan metoy gakkenna mala teqqanau aybi maaddana danddayii?

²⁴ So asay issippe haasayiyoogee metuwaa teqqanau keehi maaddana danddayees. Hegee, so asay deꞌuwan keehi koshshiyaaban xeelaa wottanaadan maaddana danddayees. (Piliphphisiyuusa 1:9-11⁠ra gatta xeella.) Hegee, so asay halchidobay polettanaadan so asaappe issi uri baayyo danddayettidabaa oottana mala maaddana danddayees. Hegaa bollikka, so asay qoncciyan haasayiyoogee kandduwaara gayttidaagan metoy gakkennaadan teqqana danddayees. Macca naati banttana dichiya aawaa sinttaaninne bantta aawaa woy bantta aayee naata gidenna attuma naatu sinttan bessiyaagaadan maayana koshshees; qassi attuma naati banttana dichiya  aayeeyyoonne bantta aawa woy bantta aayee naata gidenna macca naatuyyo suure eeshsha bessanaadan zorana koshshees.—1 Tasalonqqe 4:3-8.

25. Balakko naati deꞌiyo keettan sarotettay deꞌanaadan maaddana danddayiya eeshshati awugeetee?

²⁵ Balakko naata dichiyoogaara gayttidaagan dumma metoy gakkiyo wode, danddayancha gida. Ooratta dabbotaa minttiyoogee wode ekkiyaaba. Balakko naatun siiqettiyoogeenne bonchettiyoogee keehi metana danddayiyaaba. SHin hegee danddayettiyaaba. Yihoowa ufayssanau keehippe koyiya, aadhida eratettaynne akeekay deꞌiyo wozanay balakko naati deꞌiyo keettan sarotettay deꞌanaadan keehippe koshshiyaaba. (Leemiso 16:20) Hegaa mala eeshshay neeni hara hanotaakka xoona kiyanaadan maaddana danddayees.

26. Aquwaara gayttida metoynne xeelay so asay shaahettanaadan oottana danddayiyoy ayba ogiyaanee?

²⁶ Aquwaara gayttida metoynne xeelay daro ogiyan so asay shaahettanaadan oottana danddayees. Issi issi keettaa asay miishshaara gayttidaagan, duretanau koyiyoogan, woy loꞌꞌo duussaa deꞌanau koyiyoogan ooyettidi shaahettiyoogee azanttiyaaba. Azinaynne machiyaa qaxarettidi oottiyaabanne “ta miishshaa, ne miishshaa” giyaageeta gidikko, shaahotettay merettana danddayees. Ooshshay merettennaba gidikkokka, azinaynne machiyaa qaxaretti oottiyo wode, issippe aattiyo wodiyaa demmanau metootana danddayoosona. Aawati so asaara issippe deꞌiiddi demmiyoogaappe daro miishshaa demmanau daro wodiyau, giishin daro aginau, ubba daro layttau haahosaa biidi deꞌiyoogee ubbasan dari dari biis. Hegee keehi wolqqaama metuwaa kaalettana danddayees.

27. Miishshaa metoy gakkiyo so asaa maaddana danddayiya issi issi baaso siraatay awugee?

²⁷ Dumma dumma keettaa asaa gakkiya metoynne etau koshshiyaabay dumma dumma gidiyo gishshau, ha hanotata giigissanau higge kessana danddayettenna. Gidikkokka, Geeshsha Maxaafaa zoree maaddana danddayees. Leemisuwau, ‘zoriyaa ekkiyoogee’ bessennabaa oottiyoogaappe issi issitoo haakkanaadan maaddana danddayiyoogaa Leemiso 13:10y yootees. Hegee, issi asi ba qofaa yootiyoogaa xalla gidennan, zoriyaa koyiyoogaanne hara asi he hanotaa waati xeelliyaakko akeekiyoogaa gujjees. Hegaa bollikka, baajeetiyaa suure kessiyoogee so asay oottiyooban maayettanaadan maaddana danddayees. Naati woy etaara deꞌiya hara uri deꞌiyo wode, hegau kessiyo miishshaa demmanau, koshshiyaaba gidikko issi issitoo, geella guutta wodiyau azinaynne machiyaa qaxarettidi oottana danddayoosona. Hanotay hegaadaana gidikko, azinay ba macheera aattiyo wodiyaa xayennaagaa yootiyoogan o minttettana danddayees. Darotoo  maccaasiyaa barkka oottiyo oosuwaappe amaridaagaa azinay naatuura oottiyoogan o siiquwan maaddana danddayees.—Piliphphisiyuusa 2:1-4.

28. So asay issippetettay deꞌiyoogaa gidanaadan, ay akeekiyoogee maaddii?

²⁸ SHin, ha alamiyan miishshay koshshiyaaba gidikkonne, ufayttanaadan oottennaagaa hassaya. Miishshay asassi deꞌo immana danddayennaagee qoncce. (Eranchchaa 7:12) Aquwaabaa bessiyaagaappe aattidi xeelliyoogee ayyaanaabaaninne kandduwaaban qohana danddayees. (1 Ximootiyoosa 6:9-12) Nuuni deꞌuwaassi koshshiyaabaa kunttanau baaxetiyoogaa Yihooway anjjiyo gishshau, kasetidi, Xoossaa kawotettaanne a xillotettaa koyiyoogee keehi loꞌꞌo! (Maatiyoosa 6:25-33; Ibraawe 13:5) Geella ne soo asay issi issiban shaahettidaba gidikkokka, ayyaanaabaa kaseyiyoogaaninne ubbabaappe kasetidi Xoossaara sarotettan deꞌanau koyiyoogan, ubbaappe aadhiyaaban issippetettay deꞌiyoogaa gidana danddayees.