1-3. Aawaa woy aayee xallay deꞌiyo keettaa asay daranaadan oottidabay aybee, he keettaa asay qohettiyoy ayba ogiyaanee?

 AAWAA woy aayee xallay deꞌiyo keettaa asay alame yuushuwan keehi dariiddi deꞌees. Machiyo yeddiyoogee, yeggidi biyoogee, shaahettiyoogeenne aqo oyqqennan yeliyoogee keehi darido gishshau, hegee miilooniyan qoodettiya yelidaageetu bollinne naatu bolli wolqqaama metuwaa gattiis.

² Issi aayyiyaa hagaadan gaasu: “Taani naaꞌꞌu naati deꞌiyo, layttay 28 gidido amꞌꞌe. Aaway baynnan naata dichanau koyenna gishshau, taani keehippe unꞌꞌettaas. Taayyo ooninne qoppennaba milatees. Taani muletoo yeekkiyoogaa ta naati beꞌoosona; qassi hegee eta qohees.” Naata barkka dichiya aawaappe woy aayeeppe dariya baggay hanqquwaa, bana mooranchadan xeelliyoogaanne boorasiyoogaa mala hanotaara baaxetiyoogaa gujjin, kare oosuwaanne so oosuwaa oottiyoogan metootees. Issi aayyiyaa hagaadan gaasu: “Aaway baynnan naata dichiyoogee metiyaaba. Daro baaxeti simmidi, darobaa suure oottiyoogaa doommeeta. Yaatinkka, oottana bessiyo harabay merettees.”

³ Aawaa woy aayee xallay deꞌiyo keettan deꞌiya yelagatikka darotoo baaxetiyo metoy deꞌees. Aaway woy aayyiyaa qoppennan yeggidi biyo wode woy hayqqiyo wode, he hanotay naata keehi qofissana danddayees. Aaway woy aayyiyaa baynnaagee daro yelagata keehi qohana danddayees.

4. Aawaa woy aayee xallay deꞌiyo keettaa asau Yihooway qoppiyoogaa waatidi erana danddayiyoo?

 ⁴ Aawaa woy aayee xallay deꞌiyo keettaa asay beni wodekka deꞌiyaaba. Geeshsha Maxaafay ‘aawi baynna naatanne amꞌꞌeta’ xeelliyaagan darosan yootees. (Kessaabaa 22:22; Zaarettido Wogaa 24:19-21; Iyyooba 31:16-22) Xoossaa Yihooway eta metuwaa beꞌidi aggi bayenna. Mazamuraawee Xoossay “aawi bainna naatussi aawa; qassi azinai haiqqido maccaasata naagiyaagaa” gidiyoogaa yootiis. (Mazamure 68:5) Aawaa woy aayee xallay deꞌiyo keettaa asau Yihooway ha wodiyankka hegaadan qoppees! Hegaa mala keettaa asay giiga gidanaadan maaddiyaabaa a Qaalay yootees.

5. Aawaa woy aayee xallay deꞌiyo keettaa asaa koyro heeran ayba metoy gakkii?

⁵ Keettaa ayssanau oottiyoobaa qoppa. Son attuma asi deꞌanaadan koshshiyaabay keehi daro. Leemisuwau, issi maccaasiyaa keettaa bottokonana koyiyo wode, waatada doommanaakko erennan aggana danddayawusu. Hegaadankka, maccaasiyo mata wode yeddida uri woy pootee, son oottiyo daro oosuwaa waati oottanaakko metootana danddayees. Keettay maarattennaageekka naati woppaa xayanaadaaninne unꞌꞌettanaadan oottiyaaba.

6, 7. (a) Leemiso maxaafan odettida ‘wozannaama machiyaa’ loꞌꞌo leemiso gidiyoy aybiinee? (b) So oosuwaa minnidi oottiyoogee aawaa woy aayee xallay deꞌiyo keettaa asaa maaddiyoy ayba ogiyaanee?

⁶ Hegau aybi maaddana danddayii? Leemiso 31:10-31n odettida ‘wozannaama machee’ leemisuwaa akeeka. A oottiyoobay keehi daro; shammawusu, bayzzawusu, sikkawusu, kattawusu, gadiyaa shammawusu, gaden oottawusunne zalꞌꞌissawusu. A hegaadan gooba gididoy aybissee? A qammanaashin oottiya, qassi wonttaara denddadakka oottiya mino oosancha. A ubbabaa suure oottiya, oosanchatuyyo oosuwaa bazziyaanne ba kushiyan oottada harata maaddiya asa. A tumukka galatettana bessiya asa!

 ⁷ Neeni nerkka naata dichiya aawa woy aayo gidikko, neeppe koyettiyaabaa son oottanau akeekancha gida. Hegaa mala oosoy ne naati keehi ufayttanaadan oottiyo gishshau, ufayssan ootta. SHin, kasetidi halchiyoogeenne hanotata giigissiyoogee keehippe koshshees. Geeshsha Maxaafay, “Mino oosanchchaa halchchoi dureyees” yaagees. (Leemiso 21:5) Barkka naata dichiya aaway, “Tana namisana gakkanaassi qumaabaa qoppikke” yaagiis. SHin qoppidi kattiyo qumay dirbbidi kattiyo qumaappe keehi maaddeesinne maanaukka ufayssees. Neeni son dumma dummabaa oottiyoogaa tamariyoogeekka koshshana danddayees. Barkka naata dichiya aayyiyaa, keettay aattiyo wode woy issi issibaa giigissana koshshiyo wode, qassi son koshshiya miishshaa shammiyo wode ba laggeta woy hara asaa zoriyaa oychiyoogan hegaa malabaa oottana danddayawusu.

8. Aawaa woy aayee xallay deꞌiyo keettan naati waatidi maaddana danddayiyoonaa?

⁸ Naati maaddana mala oychiyoogee bessiyaabee? Barkka naata dichiya issi aayyiyaa, “Aqo laggee baynna gishshau paccidabaa kunttanau naata ootissanau koyeeta” yaagaasu. Hegaadan oottiyoogee bessiyaaba gidana danddayees; shin hegan naati ubbatoo ufayttennan aggana danddayoosona. Beni wode, Xoossaa yayyiya yelagati banttau imettida bessiya oosuwaa oottidosona. (Doomettaabaa 37:2; Siiquwaa Sabaa 1:6) Yaatiyo gishshau, ne naatuyyo deexo oosuwaa immenna mala naagettana koshshikkonne, qumaa miido miishshaa naati meeccanaadaaninne wuygiyaa pittanaadan yootana danddayaasa. Issi issi oosuwaa ayssi issippe oottekketii? Hegee keehi ufayssiyaaba gidana danddayees.

9. Banttarkka naata dichiya aayeta darotoo miishshaara gayttida metoy gakkiyoy aybissee?

⁹ Barkka naata dichiya aawatuppe woy aayetuppe  daroti miishshaara gayttidaagan metootoosona; qassi aqo oyqqennan yelida yelaga aayeti darotoo waayettoosona. a Kawoy issi issiban maaddiyo biittan deꞌiyaageeti ooso demmana gakkanaassi hegan maadettana danddayoosona. Koshshiyo wode Kiristtaaneti hegaa malabaa goꞌettanaadan Geeshsha Maxaafay yootees. (Roome 13:1, 6) Amꞌꞌetanne azinay yeddido maccaasata hegaa mala metoy gakkees. Daro wodiyau son oottiiddi takkida daro aayeti hanotay giddin qaxarettidi oottoosona; hegee darotoo guutta miishshaa demmiyo ooso gidana danddayees. Issoti issoti amarida oosuwaa loohiyoogan woy guutta wodiyau tamaariyoogan, bantta deꞌoy kaseegaappe loꞌꞌanaadan oottoosona.

10. Barkka naata dichiya issi aayyiyaa qaxarettada oottana koshshiyoy aybissakko ba naatussi waatada yootana danddayay?

¹⁰ Neeni oosuwaa koyiyo wode ne naati ufayttennaba gidikko garamettoppa; qassi moorobaa oottidabadan qoppoppa. Yaatiyoogaappe, neeni oosuwaa oottana koshshiyoy aybissakko etau yoota; qassi neeni etassi koshshiyaabaa kunttanaadan Yihooway koyiyoogaa eti akeekanaadan maadda. (1 Ximootiyoosa 5:8) Guyyeppe, daro naati bantta qofaa laammoosona. Gidikkokka, neeyyo oosoy peeqattiyo wode etaara daro wodiyaa aattanau baaxeta. Naata hegaadan siiqiyoogee, miishshaara gayttida metuwaa qoppiyoogan so asay keehi qohettennaadan maaddana danddayees.—Leemiso 15:16, 17.

11, 12. Barkka naata dichiya aaway woy aayyiyaa kanttana bessenna zaway awugee, eti hegaadan waatidi oottana danddayiyoonaa?

¹¹ Barkka naata dichiya aaway woy aayyiyaa naata  keehi siiqiyoogee meeze gididaba; shin yelidaageetu giddooninne naatu giddon Xoossay wottido zawaa kanttennaadan naagettana koshshees. Leemisuwau, barkka naata dichiya aayyiyaa, aaway oottiyo oosuwaa naꞌay oottanaadan koyiyaaba woy bana keehi metidabaa ba naꞌeessi ubbatoo yootiyoogan iira ulottiyaaba gidikko, wolqqaama metoy merettana danddayees. Hegaadan oottiyoogee bessennaba; qassi naati unꞌꞌettanaadaaninne etau hanotay kirqqi gaanaadan oottana danddayees.

¹² Aayo gidiyoogaadan etau koshshiyaabaa kunttiyay nenappe attin, neessi eti kunttennaagaa ne naati akeekanaadan ootta. (2 Qoronttoosa 12:14⁠ra gatta xeella.) Issi issitoo neeyyo zoree woy maadoy koshshana danddayees. Zoriyaa oychana koshshiyoy ne naata gidennan, gubaaꞌiyaa cimata woy kayma gidida Kiristtaane maccaasata gidana bessees.—Tiitu 2:3.

13. Seeriyoogaara gayttidaagan naata barkka dichiya aayyiyo gakkana danddayiya metoy aybee?

¹³ Naati darotoo aawaa seeraa siyoosona; shin aayee seeraa siyennan aggana danddayoosona. Barkka naata dichiya issi aayyiyaa, “Ta attuma naati asa gamma gakkidosona. Yaatiyo gishshau, taani yootiyoobaa issi issitoo siyokkona” yaagaasu. Hegaa bolli, neeni siiqiyo aqo laggee hayqqido gishshau azzaniyaaro woy aqoy laalettido gishshau nena mooranchadan xeelliyaaro woy yiillotiyaaro gidana danddayaasa. Intte naꞌaykka naata dichanaadan pirdda keettay pirddidaba gidikko, ne naati neeppe shaahettida aqo laggiyaakko deꞌanau baanaakkonne gaada hirggana danddayaasa. Hegaa mala hanotan bessiya ogiyan seeriyoogee metana danddayees.

14. Naata banttarkka dichiya aawati woy aayeti seeraa waati bessiyaagaadan xeellana danddayiyoonaa?

¹⁴ Geeshsha Maxaafay, “Yedan diccida na7i ba aayyiyo kaushshees” yaagees. (Leemiso 29:15) Neeni dambbiyaa keessanaadaaninne so asay hegaa kaallanaadan oottana mala Xoossaa Yihooway maaddees; yaatiyo gishshau, nena mooranchadan xeelloppa, zilꞌꞌettoppa, woy yayyoppa. (Leemiso 1:8) Geeshsha Maxaafaa baaso siraatata kaalliyoogaa aggoppa. (Leemiso 13:24) Bessiyaagaadan haniyaagaanne giidobaa poliyaagaa gida. Wodeppe daro naati neeni koyiyoogaadan hanana danddayoosona. Yaatikkonne, ne naatu hanotaa qoppana koshshees. Naata barkka dichiya issi aaway hagaadan giis: “Aayyiyaa baynnaagan naati keehi unꞌꞌettido gishshau, eta seeriyo wode he hanotaa akeekays. Taani demmido injje ubban etaara haasayays. Kahuwaa kattiyo wode nuuni ulobaa haasayoos. He wode eti taayyo aybanne qottennan yootoosona.”

15. Aqo laggiyaappe paraman shaahettida uri ba kase azinaabaa woy kase macheebaa haasayiyo wode aybippe haakkana koshshii?

¹⁵ Neeni aqo laggiyaappe paraman shaahettidaba gidikko, he uraa kariyoogee aybanne maaddiyaaba gidenna.  Yelidaageeti bessiya bessennaban ooyettiyoogee naata qohees; qassi naati eta bonchennaadan oottees. Hegaa gishshau, “Neeni ne aawau kiyadasa!” giyaagaa mala qohiyaabaa haasayoppa. Kase azinay woy kase machiyaa inttena ay keena qohidaba gidikkonne, haꞌꞌikka intte naaꞌꞌaykka naata siiqananne seerana koshshees. b

16. Aawaa woy aayee xallay deꞌiyo keettan naata ubbatoo seeranau ayyaanaaban ayba giigissoy deꞌana koshshii?

¹⁶ Kasetiya shemppotun qonccidaagaadan, seeray naata qaxxayiyoogaa xalla gidennan, loohissiyoogaanne tamaarissiyoogaa gujjees. Ayyaanaaban loohissiyo loꞌꞌo maaraa kaalliyoogan daro metuwaa teqqana danddayettees. (Piliphphisiyuusa 3:16) Kiristtaane shiiqotun ubbatoo shiiqiyoogee keehippe koshshiyaaba. (Ibraawe 10:24, 25) So asay saaminttan saaminttan Geeshsha Maxaafaa ubbatoo xannaꞌiyoogeekka koshshiyaaba. Pacissennan hegaadan xannaꞌiyoogee metana danddayiyoogee qoncce.  Akeekancha gidida issi aayyiyaa hagaadan gaasu: “Oosuwaappe soo yi simmidi, shemppana koyeeta. SHin, oottana koshshiyaaba gidiyoogaa eriyo gishshau, ta naꞌeera xannaꞌanau ta hanotaa giigissays. So asaa xinaatee o keehi ufayssees!”

17. PHauloosa lagge gidida Ximootiyoosi diccido loꞌꞌo hanotaappe ay tamaarana danddayiyoo?

¹⁷ Kiitettida PHauloosa lagge gidida Ximootiyoosa, Geeshsha Maxaafaabaa loohissiday aawaa gidennan, aayyiyoonne aayee aayyiyo gidiyoogee qoncce. Gidikkonne, Ximootiyoosi keehi loꞌꞌo Kiristtaane gidiis! (Oosuwaa 16:1, 2; 2 Ximootiyoosa 1:5; 3:14, 15) Neeni ne “naata Godaa seeraaninne zoriyan” dichanau baaxetiyaaba gidikko, ne naatikka hegaa mala gidanaagaa naagana danddayaasa.—Efisoona 6:4.

18, 19. (a) Barkka naata dichiya aaway woy aayyiyaa boorasiyoy ayba ogiyaanee? (b) Ha saꞌaa amuwaa teqqanau maaddiya ayba zoree imettidee?

¹⁸ Barkka naata dichiya aayyiyaa, “Taani soo yiyo wode tana keettay maana hanees; ubba qassi naati zinꞌꞌiichidaba gidikko, taani keehi boorasays” yaagaasu. Barkka naata dichiya aawaassi woy aayeessi darotoo gita meto gidiyaabay boorasiyoogaa. Aquwaa oyqqidi  siiquwaaninne ufayssan deꞌanau amottiyoogee wottin deꞌiyaaba. SHin issi uri ba hanaa hano giidi, ba amuwaa polanau baaxetana koshshii? Amꞌꞌe gidida yelaga maccaasatuppe amaridaageeti kiitettida PHauloosa wode “banttana azinaa gela gela giyo wode, Kiristtoosa aggi” bayidosona. (1 Ximootiyoosa 5:11, 12) Asatettaabaa koshshay ayyaanaabaa teqqanaadan oottiyoogee qohiyaaba.—1 Ximootiyoosa 5:6.

¹⁹ Issi Kiristtaanee hagaadan giis: “Asho gaytotettaa koshshay wolqqaama; shin xoonana danddayeeta. He qofay karhi giyo wode, hegaa wotti denttidi qoppana bessenna. Hegaa qoppiyoogaa aggana koshshees. Intte naatubaa qoppiyoogeekka maaddees.” Xoossaa Qaalay, ‘ha saꞌaa amo gidida shaaramuxanau koyiyoogaa worite’ yaagidi zorees. (Qolasiyaasa 3:5) Neeni ushshaa uyiyoogaa agganau baaxetiya asa gidikko, ushshaa bayzziyo heeraara ubbatoo kanttay, woy muletoo ushshaabaa haasayiya asatuura laggetay? Hegaadan oottennaagee qoncce! Ha saꞌaa amuwaara gayttidaagankka hanotay hegaara issi mala.

20. (a) Ammanenna uraa ekkanau oychiyaageeta woy gelanau giigiyaageeta ayba metoy gakkii? (b) Koyro xeetu layttaaninne ha wodiyan amꞌꞌeti boorasiyaa agganau baaxetidoy ayba ogiyaanee?

²⁰ Issoti issoti ammanennaageeta ekkanau oychidosona woy gelanau giigidosona. (1 Qoronttoosa 7:39) Hegee eta metoy giiganaadan oottii? CHii. Azinay yeddido issi Kiristtaaniyaa, “Azinaa gelennan deꞌiyoogaappe keehi iita gidida issibay deꞌees. Hegee hanenna uraa geliyoogaa!” yaagaasu. Koyro xeetu layttan deꞌida amꞌꞌeti boorasidoogee qoncce; shin erancha gididaageeti “imattaa mokkiyoogan, geeshshatu tohuwaa meecciyoogan, waayettida asaa maaddiyoogan” oosoy daridoogeeta gididosona. (1 Ximootiyoosa 5:10) Xoossaa yayyiya aqo laggiyaa demmanau daro layttaa naagida ammanettida Kiristtaanetikka ha wodiyan hegaadan oosoy daridoogeeta gididosona. Azinay hayqqido, layttay  68 gidido Kiristtaaniyaa boorasiyo wode hara amꞌꞌeta baada oychawusu. A, “Hegaadan baada oychiyoogee, so oosuwaa oottiyoogeenne ayyaanaaban koshshiyaabaa kunttiyoogee taani boorasennaadan maaddiis” yaagaasu. Xoossaa Kawotettaabaa hara asaa tamaarissiyoogee keehippe maaddiya loꞌꞌo ooso.—Maatiyoosa 28:19, 20.

21. Woosaynne loꞌꞌo laggetettay boorasennaadan waatidi maaddana danddayiyoonaa?

²¹ Boorasiyaa sohuwaara agganau danddayennaagee  qoncce. SHin Yihooway immiyo wolqqan genccana danddayettees. Issi Kiristtaanee “gallassinne qammi Xoossai maaddana mala” woossiyo wodenne oychiyo wode he wolqqaa demmees. (1 Ximootiyoosa 5:5) Issi Kiristtaanee maaduwaa demmanau keehi yeekkidinne afuxxidi woossiyoogaanne oychiyoogaa koshshana danddayees. (Ibraawe 5:7⁠ra gatta xeella.) “Gallassinne qammi” Yihoowayyo ne wozanaa qofaa yootiyoogee maaddana danddayees. Hegaa bollikka, laggetuura ufayssiya hanotan wodiyaa aattiyoogee boorasennaadan keehi maaddana danddayees. Leemiso 12:25n odettidaagaadan, loꞌꞌo laggeti haasayiyo “shonggaara de7iya haasayai” issi uraa minttettana danddayees.

22. Issi issitoo boorasiyo wode ay qoppiyoogee maaddii?

²² Issi issitoo boorasiyaaba gidikko, tuggatennan deꞌiya asi baynnaagaa hassaya. Alame yuushuwan deꞌiya ‘ishanttu’ maabaraa dumma dumma metoy gakkees. (1 PHeexiroosa 5:9) Aadhidabaa wotta denttada qoppoppa. (Eranchchaa 7:10) Neessi deꞌiya loꞌꞌobaa qoppa. Ubbaappe aaruwan, suure asa gidada deꞌanaunne Yihoowa wozanaa ufayssanau baaxeta.—Leemiso 27:11.

23. Barkka naata dichiya aawaa woy aayyiyo gubaaꞌiyan deꞌiya Kiristtaaneti waatana koshshii?

²³ Hara Kiristtaanetu maadoy keehippe koshshees. Yaaqooba 1:27y, “Xoossaa Aawaa sinttan pokkoi bainna geeshsha ammanoi hagaa; hegee augee giikko, aaya aawi bainna naatanne waayettiya am77eta [maaddanaagaa]” yaagees. Aawaa woy aayee xallay deꞌiyo keettaa asaa Kiristtaaneti maaddoosona. Hegaadan oottana danddayiyo issi issi ogeti awugeetee?

24. Maadoy koshshiyo, aawaa woy aayee xallay deꞌiyo keettaa asaa waati maaddana danddayiyoo?

²⁴ Koshshiya issi issiban eta maaddana danddayettees. Geeshsha Maxaafay, “SHin dure asi ooninne ba ishai metootiyoogaa be7iiddi, ayyo qarettennan ixxikko,  ba wozanan Xoossaa siiqoi de7ees gaanau waani danddayii?” yaagees. (1 Yohaannisa 3:17) Giriikettuwan “be7iiddi” geetettida qaalaa birshshettay coo xeelliyoogaa gidennan, loytti xeelliyoogaa. Hagee, Keha gidida Kiristtaanee issi keettaa asaa hanotaanne etau koshshiyaabaa kasetidi loytti akeekees giyoogaa. Geella etau miishshi koshshana danddayees. Issotu issotuyyo keettaa bottokoniyoogaa koshshana danddayees. Woy qumaa shoobbanaadan woy haratuura issippe wodiyaa aattanau eti koyana danddayoosona.

25. Barkka naata dichiya aawaayyo woy aayeeyyo eta mala Kiristtaaneti ayba ogiyan qarettana danddayiyoonaa?

²⁵ Hegaa bollikka, 1 PHeexiroosa 3:8y, ‘Ubbay issi qofan deꞌite. Issoy issuwau qarettidi, ishanttudan siiqettite; qassi issoy issuwau kehiyaageeta gidite’ yaagees. Barkka usuppun naata dichiya issi aayyiyaa hagaadan gaasu: “Hegee keehippe deexxiyaaba; qassi issi issitoo taani unꞌꞌettays. SHin ishantti woy michontti, ‘Joꞌanaa, neeni loꞌꞌobaa oottaydda deꞌaasa. Neeni sinttappe anjjettana’ yaagoosona. Harati intte hanotaa akeekiyoogaanne inttessi qoppiyoogaa eriyoogee keehi minttettees.” Kiristtaane gidida cimida michontti, banttarkka naata dichiya yelaga aayeti attuma asau yootanau yeellatiyo metuwaa etau yootiyo wode ezggiyoogan loytti maaddana danddayoosona.

26. Aaway baynna naata kayma gidida Kiristtaane attuma asati waatidi maaddana danddayiyoonaa?

²⁶ Kiristtaane gidida attuma asay hara ogiyan maaddana danddayees. Xillo asa gidida Iyyoobi, “Aawai aayyiyaa xayin, maaddiyaabi bainnaageeta taani ashshaas” yaagiis. (Iyyooba 29:12) Ha wodiyan deꞌiya issi issi Kiristtaane attuma asatikka, aaway baynna naatussi qoppoosona; qassi ‘geeshsha wozanaappe beettiya siiquwaa’ etau qonccissoosona. (1 Ximootiyoosa 1:5) Bantta soo asaa aggi bayennan, eti hegaa mala naatuura issi issitoo haggaazanaunne so asaa xinaatiyaa wode woy allaxxiyo  wode eta shoobbanau danddayoosona. Hegaa mala kehatettay aaway baynna naati iitaban gelennaadan ashshana danddayees.

27. Barkka naata dichiya aawati woy aayeti ayba maaduwaa demmana danddayiyoonaa?

²⁷ Barkka naata dichiya aaway woy aayyiyaa “huuphiyan huuphiyan ba toohuwaa tookkanau” koshshees. (Galaatiyaa 6:5) Gidikkokka, Kiristtaane ishatinne michoti eta siiqoosona; qassi Xoossaa Yihoowaykka eta siiqees. Geeshsha Maxaafay Yihoowa xeelliyaagan, “Am77etanne aawai bainna naata maaddees” yaagees. (Mazamure 146:9) I siiquwan maaddiyo gishshau, aawaa woy aayee xallay deꞌiyo keettaa asay giiga gidana danddayees!