Xoossawu Aappun Sunttay Deꞌii?

KAASSA

Geeshsha Maxaafay yootiyoobaa

Xoossaayyo buzo sunttay issuwaa xallay deꞌees. A sunttay Ibraawettuwan יהוה hagaadan xaafettidaagaa gidishin, Inggilizettuwan a “Jehovah” geetettidi darotoo birshshettiis. Xoossay hananabaa yootiya Isiyaasa baggaara, “Taani Yihoowa, hagee ta sunttaa” yaagidi yootiis. (Isiyaasa 42:8, NW) Beni xaafettida koyro Geeshsha Maxaafan he sunttay 7,000 gidiya sohuwan deꞌees; hegee Xoossay xeegettiyo hara bonchcho sunttaappe woy hara ay asa sunttaappekka aaruwan xaafettiis. b

Yihoowayyo hara sunttati deꞌiyoonaa?

Geeshsha Maxaafay Xoossaayyo issi buzo suntta xallay deꞌiyoogaa yootikkokka, daro bonchcho sunttatanne qonccissota goꞌettees. Hagaappe kaallidi deꞌiya bonchcho sunttatinne qonccissoti Yihoowa eeshshaanne A oonatettaa bessoosona.

Bonchcho Sunttaa	Xiqisiyaa	Birshshettaa
Allah	(Baawa)	Arabattuwaappe ekettida “Allah” giyo qaalay buzo suntta gidennan, bonchcho suntta; hegaa birshshettay “Xoossaa” giyoogaa. Arabattonne hara qaalaa Geeshsha Maxaafaa birshshettati “Allah” giya qaala “Xoossaa” giidi birshshidosona.
Ubbaa Danddayiyaagaa	Doomettaabaa 17:1	Ooninne eqettanawu danddayenna wolqqay deꞌiyoogaa. Ibraawettuwan Elshaday woy “Ubbaa Danddayiya Xoossaa” giya qaalay Geeshsha Maxaafan laappun sohuwan deꞌees.
Alfaanne Omeegaa	Ajjuutaa 1:8; 21:6; 22:13	“Koyruwaanne wurssettaa” woy “doomettaanne poluwaa” giyoogaa; hegee Yihoowappe kase gidin woy appe simmin Ubbaa Danddayiya Xoossi baynnaagaa bessees. (Isiyaasa 43:10) Alfaynne omeegay Giriiketto pitaliyan koyronne wurssetta pitaleta.
Merinaasappe Deꞌiyaagaa	Daaneela 7:9, 13, 22	Doomettay baynnaagaa; oonikka woykko aybikka deꞌanaappe kase merinawu deꞌiyaagaa.—Mazamure 90:2.
Medhdhidaagaa	Isiyaasa 40:28	Ubbabaa medhdhidaagaa.
Aawaa	Maatiyoosa 6:9	Deꞌuwaa immiyaagaa.
Xoossaa	Doomettaabaa 1:1	Goynnana bessiyo wolqqaamaa. Eelohim giyo Ibraawetto qaalay selle gidennabaa qonccissees; hegee Yihoowa anggaa, bonchchuwaa woy gitatettaa bessees.
Xoossatu Xoossaa	Zaarettido Wogaa 10:17	Hegee issoti issoti goynniyo ‘eeqatuppe’ dumma gidida, wolqqaama Xoossaa.—Isiyaasa 2:8.
Gita Asttamaariyaa	Isiyaasa 30:20, 21	Maaddiyaabaa tamaarissiyaagaanne kaalettiyaagaa.—Isiyaasa 48:17, 18.
Gita Oosanchchaa	Mazamure 149:2, Ooratta Alamiyaa Birshshettaa	Ubbabay deꞌanaadan oottidaagaa.—Ajjuutaa 4:11.
Ufayttiya Xoossaa	1 Ximootiyoosa 1:11, Ooratta Alamiyaa Birshshettaa	Ufayttiyoogan erettiyaagaa.—Mazamure 104:31.
Woosaa Siyiyaagaa	Mazamure 65:2	Asay ammanuwan akko woossiyo woosa ubbaa siyees.
Taani Tanattennee	Kessaabaa 3:14	Ba halchchuwaa polanawu hanana bessiya ubbabaa hanees. Ha qofay “Taani hanana koyiyo ubbabaa hanana” geetettidikka birshshettana danddayees. (Ooratta Alamiyaa Birshshettaa) Ha qofay kaalliya payduwan odettida, Yihoowa giyo buzo sunttaa qonccissanawu maaddees.—Kessaabaa 3:15, Ooratta Alamiyaa Birshshettaa.
Qanaatiyaagaa	Kessaabaa 34:14	A goynuwaa aybinne koxxanaadan koyenna. Ha qaalay “koxxiyaabi deꞌanaadan oottenna” qassi “ba xallawu aqanaadan koyees” geetettidikka birshshettiis.—Ooratta Alamiyaa Birshshettaa.
Merinaa Kawuwaa	Ajjuutaa 15:3	A haaruwawu doometti woy wurssetti baawa.
Godaa	Mazamure 135:5	Aawatiyaagaa; Ibraawettuwan Adon qassi Adonim.
Olanchchatu Godaa	Isiyaasa 1:9, King Jems Verzhin; Roome 9:29, King Jems Verzhin	Cora olanchcha gidida kiitanchchatu gadaawaa. “Olanchchatu Godaa” giya qofay “Olanchchatu Xoossaa Yihoowa” qassi “Saluwaa olanchchatu Godaa” geetettidikka birshshettana danddayees.—Roome 9:29, Ooratta Alamiyaa Birshshettaa.
Ubbaappe Xoqqaa	Mazamure 47:2	Ubbaappe xoqqa maatay deꞌiyoogaa.
Geeshsha Godaa	Leemiso 9:10	Ooppekka aaruwan (kandduwaaninne xillotettan) keehi geeshsha.
Urqqaa Medhdhidaagaa	Isiyaasa 64:8	Urqqaa medhdhiyaagee urqqaa ba koyidoogaadan oottiyo aawatettay awu deꞌiyoogaadan, Xoossawukka asaa bollinne deriyaa bolli aawatettay deꞌees.—Roome 9:20, 21.
Woziyaagaa	Isiyaasa 41:14	Yesuus Kiristtoosa wozuwaa yarshshuwan asaa nagaraappenne hayquwaappe ashshees woykko zaarees.—Yohaannisa 3:16.
Zaallaa	Mazamure 18:2, 46	Geemmiyo ammanttiya qatonne attiyo soho.
Ashshiyaagaa	Isiyaasa 45:21	Iitabaappe woykko bashshaappe ashshees.
Henttanchchaa	Mazamure 23:1	A goynniyaageeta naagees.
Ubbaa Haariya Godaa	Doomettaabaa 15:2	Ubbabaa haariyaagaa; Ibraawettuwan Adonay.
Ubbaappe Xoqqiyaagaa	Daaneela 7:18, 27	Ubbaappe xoqqiya maatay deꞌiyoogaa.

Ibraawetto Geeshsha Maxaafan odettida sohotu sunttata

Geeshsha Maxaafan odettida issi issi sohotu sunttatun Xoossaa buzo sunttay deꞌees; shin hegeeti Xoossawu deꞌiya hara sunttata gidokkona.

Sohuwaa sunttaa	Xiqisiyaa	Birshshettaa
Yihoowa-yiriꞌe	Doomettaabaa 22:13, 14	“Yihooway Immana.”
Yihoowa-nissi	Kessaabaa 17:15	“Yihooway Ta Banddiraa.” Yihooway ba asay naagettanawunne maaduwaa demmanawu akko shiiqiyo Xoossaa.—Kessaabaa 17:13-16.
Yihoowa-shalom	Daannatu 6:23, 24	“Yihooway Saro.”
Yihoowa-shama	Hizqqeela 48:35	“Yihooway Hegan Deꞌees.”

Xoossaa sunttaa erananne xeesana bessiyo gaasota

Xoossay ba sunttay Geeshsha Maxaafan shaꞌan qoodettiya sohuwan deꞌanaadan oottido gishshawu, he sunttaa keehi koshshiyaabadan xeellees.—Milkkiyaasa 1:11.
Xoossaa Naꞌay Yesuusi Xoossaa sunttay keehi koshshiyaaba gidiyoogaa zaari zaaridi yootiis. Leemisuwawu, I Yihoowakko, “Ne geeshsha sunttay anjjetto” giidi woossiis.—Maatiyoosa 6:9; Yohaannisa 17:6.
Xoossaa sunttaa eridi xeesiyaageeti Yihoowaara dabbotanawu banttappe koyettiya koyrobaa oottoosona. (Mazamure 9:10; Milkkiyaasa 3:16) Hegaa mala dabbotay Xoossay hagaadan qaalaa gelido hidootan eti goꞌettanaadan oottees: “I tana siiqido gishshau, taani a ashshana. I ta sunttaa erido gishshau, taani a naagana.”—Mazamure 91:14.
Geeshsha Maxaafay, ‘haray atto saluwan gidin, saꞌankka daro xoossatinne daro godati deꞌana’ danddayiyoogaa yootees. (1 Qoronttoosa 8:5, 6) SHin issi tumu Xoossaa, Yihoowa A sunttan qonccissidi yootees.—Mazamure 83:18, Ooratta Alamiyaa Birshshettaa.

a Ibraawetto qaalaa eranchcha gidida issoti issoti Xoossaa sunttawu “Yahiwe” giyo birshshettaa dooroosona.

b Geeshsha Maxaafan “Yah” giyo qantta sunttay “Halleluyah” giyaagan deꞌiyaagaa gujjin, 50 gidiyaagee deꞌees; “Halleluyah” giyoogee “Yaha galatite” giyoogaa.—Ajjuutaa 19:1; Amerikan Standard Verzhin; King James Verzhin.