Laggeti nuuni ufayssiyaanne injje deꞌuwa deꞌanaadan maaddoosona. Loꞌꞌo laggeti issoy issuwa loytti maaddananne loꞌꞌo asa gidanaadan oottana danddayoosona.—Leemiso 27:17

 Gidikkonne, Geeshsha Maxaafay nuuni laggeta akeekan dooriyoogee keehi koshshiyaaba gidiyoogaa yootees. Qassi, nuuni iita laggeta doorikko gakkana iitabaakka yootees. (Leemiso 13:20; 1 Qoronttoosa 15:33) Hegaa mala laggeti, issi uri eeyyabaa kuuyanaadan oottana woy issi ura loꞌꞌo eeshshaa moorana danddayoosona.

Ha huuphe yohuwan

•  Issi ura loꞌꞌo lagge oottiyaabay aybee?

•  Geeshsha Maxaafan deꞌiya loꞌꞌo laggetuppe amaridaageeti awugeetee?

•  Issi uri Xoossaara dabbotana danddayii?

•  Laggetettaabaa yootiya Geeshsha Maxaafaa xiqiseta

 Loꞌꞌo lagge gidanawu issi malabaa dosiyoogaa woy issi malaban ufayttiyoogaa xallay gidennaagaa Geeshsha Maxaafay yootees. Leemisuwawu, Mazamure 119:63y hagaadan gees: “Taani neeyyo a yayyiyaageetu ubbaayyoonne ne wogaa naagiyaageetuyyo dabbo.” Ha Geeshsha Maxaafaa xiqisiyaa xaafidaagee, Xoossaa ufayssanawu koyiyaanne I kessido maaraadan deꞌiya laggeta dooridoogaa akeeka.

 Geeshsha Maxaafay loꞌꞌo laggiyaassi deꞌana bessiya eeshshata yootees. Leemisuwawu:

•   “Laggee mule wodekka siiqees; ishaikka metuwaa wode maaddanaassi yelettees.”—Leemiso 17:17.

•   “Daro laggee de7iyo asi xayana; shin ishappe aadhdhidi ammanttiya laggee de7ees.”—Leemiso 18:24.

 Loꞌꞌo laggee ammanettiyaagaa, siiqiyaagaanne keha gidiyoogaa Geeshsha Maxaafay yootees. Tumu laggee nuna metoy gakkiyo wode nu miyyiyan gididi nuna maaddana danddayiya ura. Qassi, hegaa mala laggee nuuni bessennabaa oottiyo wode woy iitabaa kuuyana haniyo wode xalatettan nuna zorees.—Leemiso 27:6, 9.

 Geeshsha Maxaafay eta layttay, diccido hanotay, wogaynne etawu deꞌiya maatay dumma dumma gidido loꞌꞌo laggetubaa yootees. Hegaa mala laggetuppe heezzata beꞌite.

•   Urutonne Naaꞌoomo. Uruta Naaꞌoomissi naꞌaa machchiyo, qassi Naaꞌooma Urutippe daro layttaa bayratiyoogee qoncce. Hegaa mala dummatettay deꞌishinkka eti mino dabbotettaa medhdhidosona.—Uruto 1:16.

•   Daawitanne Yonaataana. Yonaataani Daawitappe 30 gidiya layttaa bayratikkonne, Geeshsha Maxaafay Daawiti Yonaataanaara “daro mata dabbotettaa” medhdhidoogaa yootees.—1 Sameela 18:1.

•   Yesuusanne I kiittidoogeeta. Yesuusawu I kiittidoogeetuppe dariya maatay deꞌees, ayssi giikko I eta tamaarissiyaagaanne eta godaa. (Yohaannisa 13:13) SHin eti banaara laggetanawu bessenna asadan I qoppibeenna. Ubba, I etaara mino dabbotettaa medhdhiis. I hagaadan giis: “Taani inttena ta laggeta gaas. Aissi giikko, ta Aawaappe siyido ubbabaa taani intteyyo yootaas.”—Yohaannisa 15:14, 15.

 Ee, asay Xoossaara dabbotiyoogee danddayettiyaaba. Geeshsha Maxaafay hagaadan gees: “Suuretuyyo i ulottees.” (Leemiso 3:32) Hegaa giyoogee, loꞌꞌo eeshshay deꞌiyo, ammanettiya, harata bonchchiya, qassi likkebaanne likke gidennabaa xeelliyaagan I kessido maaraa kaallanawu baaxetiya asata Xoossay ba dabbo oottees giyoogaa. Leemisuwawu, ammanettida bitanee Abrahaami Geeshsha Maxaafan Xoossaa dabbo geetettidi xeegettiis.—2 Hanidabaa Odiya 20:7; Isiyaasa 41:8; Yaaqooba 2:23.