Daro asawu Geeshsha Maxaafaa xaafiday oonakko nuuni erana danddayokko giyaagee odettiis. SHin Geeshsha Maxaafay A giddon deꞌiya qofaa xaafidaageeti oonakko darotoo qonccissidi yootees. Issi issi sohuwaa doomettan, ‘Hagee, . . . eranchchaa qaalaa’ ‘Isiyaasi beꞌido ajjuutaa,’ qassi ‘Yuu7eelakko GODAI kiittido qaalaa’ yaagees.—Eranchchaa 1:1; Isiyaasa 1:1; Yuu7eela 1:1.

 Geeshsha Maxaafaa xaafidaageetuppe dariya baggati eti xaafidoy tumu Xoossaa, Yihoowa sunttaana gidiyoogaa, qassi eta I kaalettidoogaa yootidosona. Ibraawettuwan xaafettida Geeshsha Maxaafaa xaafida hananabaa yootiyaageeti 300ppe dariya sohuwan: Yihooway “hagaadan yaagees” giidosona. (Amoxa 1:3; Mikiyaasa 2:3; Naahooma 1:12) Hara xaafeta Xoossaa kiitay kiitanchchatu baggaara gakkiis.—Zakkaariyaasa 1:7, 9.

 Geeshsha Maxaafaa 1,600ppe dariya layttan 40 gidiya asati xaafidosona. Issoti issoti Geeshsha Maxaafan deꞌiya issuwaappe dariya maxaafata xaafidosona. Geeshsha Maxaafay 66 maxaafata oyqqida guutta maxaafa keetta. Daroti Galꞌꞌa Maachchaa giyo, Ibraawettuwan xaafettida 39 maxaafatanne darotoo Ooratta Maachchaa geetettiya Giriikettuwan xaafettida 27 maxaafata oyqqiis.