‘SHaaramuxiyoogaa muleera agganaadan’ Xoossay koyiyoogaa Geeshshaa Maxaafay yootees. (1 Tasalonqqe 4:3) “SHaaramuxiyoogaa” giya qaalay Geeshsha Maxaafan wodiraa laammiyoogaa, mattuman issi mala gidida asati mattumaa gayttiyoogaa, aqo oyqqibeenna attumaageenne maccaara mattumaa gayttiyoogaa qonccissees.

•  Coo issippe deꞌin woy aqo oyqqin Xoossaa qofissii? Aybissi?

•  Issoy issuwaara maayettanaakkonne giidi aqo oyqqanaappe kase issippe deꞌiyoogaa xeelliyaagan shin?

•  Azinaynne machchiyaa bantta aqo deꞌuwaa minttanawu waatana danddayiyoonaa?

•   Aqo deꞌuwaa giigissidaagee Xoossaa. I koyro asata azinanne machcho oottido wode aqo deꞌuwaa doomissiis. (Doomettaabaa 2:22-24) Issi attumaageenne maccaara aqo oyqqennan issippe deꞌanaadan I koyibeenna.

•   Asawu aybi kehakko Xoossay erees. I keettaa asay ubbay goꞌettanaadaaninne qohiyaabaappe naagettanaadan aqo deꞌuwan issi attumaageenne maccaara mule shaahettennan issippe deꞌanaadan halchchiis. Ane issi leemisuwaa beꞌa. Issibaa waati waaxanaakko hegaa giigissidaageeti yootidobay maaddiyoogaadan, Xoossay immiyo kaaletoy so asaa issippetettay minnanaadan ay oottana bessiyaakko qonccissees. Xoossaa maaraa kaalliya uri awudekka goꞌettees.—Isiyaasa 48:17, 18.

•   Aqo oyqqennan mattumaa gayttiyaageeti darotoo iita metuwan geloosona. Leemisuwawu, koyennan shahaaranaadan, mattuma gayttiyoogan yiya harggiyan oyqettanaadan, ba mooruwan keehi zilꞌꞌettanaadan oottees. a

•   Xoossay attumaageetinne maccaageeti mattumaa gayttiyoogan naata yelanaadan oottiis. Xoossay deꞌuwaa geeshshabadan xeellees, qassi naata yeliyoogee alꞌꞌo imota. Xoossay nuuni aqo deꞌuwaa giigissuwaa bonchchiyoogan he imotaakka bonchchanaadan koyees.—Ibraawe 13:4.

 Aqo deꞌuwan ufayttanawu maacettennan amarida wodiyaa issippe deꞌiyoogee maaddenna. SHin, aqo oyqqidaageeti issippe deꞌanawu murttiyaabanne metuwaa xoonanawu issippe oottiyaaba gidikko, aqo deꞌoy minnees. b Aqo laggeti maacettikko, haratuppe aaruwan shaahettennan deꞌana danddayoosona.—Maatiyoosa 19:6.

 Wottiyoobi baynna aqo deꞌoy baawa. Gidoppe attin, aqo oyqqidaageeti Xoossaa Qaalan deꞌiya zoriyaa oosuwan peeshshikko, eta aqo deꞌoy minnana danddayees. Amarida leemisota beꞌa:

•   Nebaappe aaruwan ne aqo laggiyaabaa qoppa.—1 Qoronttoosa 7:3-5; Piliphphisiyuusa 2:3, 4.

•   Issoy issuwaa siiqitenne bonchchite.—Efisoona 5:25, 33.

•   Haasayiyooban naagettiyoogaa meezeta.—Leemiso 12:18.

•   Danddayanchcha gida, qassi sohuwaara atto ga.—Qolasiyaasa 3:13, 14.