Woonasa wene, okathi Yesu aari awe oPereya mpantta onikhuma nsuwa wa Muro Yordani, Yesu aahipaka nlikanyiho na epwittipwitthi ni musurukhu waarimenle. Yesu aaphavela wiixuttiha wira onnikhumelela ohakalala vaavo natampi onittharuwa awe, onatthikela wa Muluku. AFarisi ni alipa-oolepa yaahinvaanyiha Yesu, mwaha wa weettaka ni anatampi. Niireke anamavaanyiha ale a Yesu yaahiixutta etthu ni malikanyiho manli aapanke awe? Niireke awo yaanisuwela moota Tiithi ihu a wiirimu oniwoonela awe anatampi anittharuwa? Vano Yesu aahipaka nlikanyiho naattittimiherya mwaha owo.

Nlikanyiho nno naamuhimya tiithi aarina anamwane anli. Masi Yesu onnimulavula ikwaha sinceene mwaana mwaamukhaani. AFarisi ni alipa-oolepa ni atthu akina yanwiriyana Yesu, yanwerya wiixutta etthu ni ele Yesu aahimmye awe sa mwaana mwaamukhaani. Nave wuupuwelela ele Yesu aalavunle awe sa mukhalelo wa tiithi ni mwaana ole muulupale, nnoowerya wiixutta etthu. Vano nwuupuweleke atthu awo araru yaalavuliwe ni nlikanyiho na Yesu.

Yesu aapacenrye ohimyaka wira: “Mulopwana mmosá ahikhalana àn’awe anli. Ole mukhani ahiwirela atithi awe wira: ‘Tithi, mukikawele muhakhu munìranyu mukihiyerye’. Atithi ay’awo yahakawela muhakhu owànli aya”. (Luka 15:11, 12) Moone wira mwaana ola mwaamukhaani khaavekenle muhakhu awe woohiyeriwa mwaha wookhwa atithi awe. Maana nlelo awo yaari akumi. Hata vari siiso, mwaana ole aaphavela ovahiwa muhakhu awe okathi yoole wira okhume vate vale avareke enitthuna awe. Nto exeeni aapanke awe?

Yesu aahitthokiherya wira: “Vavinryaya mahiku vakhani, mwan’owo mukhani ahithukumanya muhakhu awe wothene, khuvenya arowaka elapo y’ottaiwene. Weiwo ahihonona muhakhu wothene, ni mwettelo wohiloka”. (Luka 15:13) Ohiya okhalaka vatthokoni vale okhapeleliwaka ni tiithi awe, mwaana ole aahikhuma orowaka elapo ekina. Nuumala-vo, aahihonona muhakhu awe wotheene eettaka onamuttompe.  Moottharelana, saahimukhumelela mixankiho ntoko Yesu aahimmye moottharelana.

Yesu aahimmye wira: “Vahononalyawe sothene, elapo eyo yahivola etala yinjene: owo khupajerya othoiwa. Tivó, ahirowa onvekela muteko mutthu mmosá èlapo yeyo: owo ahimuruma olyiha ikuluwe mmathalani. Mmirav’owo aniphavela olya mihokorokho sakhuraya ikuluwe: nto khavo anvaha”.​—Luka 15:14-16.

Nlamulo na Muluku naahimya wira ikuluwe saari inama sa mwiikho, nnaamwi vari siiso, mwaana ole aalyiha ikuluwe. Nuuvoliwa vanceene aaniphavela olya yoolya yaavahiwa inama paahi, niire so, yoolya yaavahiwa ikuluwe aalyiha awe. Okhala wira aanihaawa ni oxanka, vano “ahùpuwela makhalelo awe”. Nto aapanke exeeni? Owo uupuwenle so: “Anamuteko anjene àtithi ahana yolya yinjene, miyo va kikhwaka etala. Kinovenya, kàphwanye atithi, kahimerye wira: Tithi, miyo komutthekela Muluku, kihotthekelani-tho nyuwo. Nkimphwanela-tho wihaniwa mwan’inyu. Mukihiye kikhaleke vava ntoko namuteko anyu”. Naanaano-ru aahivenya khurowa waaphwanya atithi awe.​—Luka 15:17-20.

Tiithi awe aarowa woonela sai? Niireke aamunanariwa mwaha wa mwaana ole okhala mulolo ni okhuma vate vale? Niireke tiithi ole khaarowa omwaakhela saana mwanawe ole? Mwaari mwa nyuwo, mwaarowa opaka exeeni? Ankhi aari mwaninyu mwaamulopwana aahiiso mwaamuthiyana?

Yesu aahihimya moonelo wa tiithi ni ele aapanke awe, oriki: “Atithi awe awo [mwaana ole] yahimona ari ottaiwene nlelo: y’ahimmorela ikharari, yahimutthimakela, khumukhuparela, envahaka ibejo”. (Luka 15:20) Nnaamwi aiwale mweettelo woohiloka aarina awe mwanawe ole, tiithi ole aahimwaakhela saana. Niireke ahooleli a aYuda yaawo yaihimya osuwela ni omukokhorela Yehova, yaahoona moota Tiithi ihu a wiirimu oniwoonela awe anatampi anittharuwa? Niireke yaahoona wira Yesu aamutakiha tiithi awe?

Tiithi orina ankhili, anwerya woona wira oriipiwa murima, ovelavela ni oxanka wa mwaana ole, waanooniherya wira aahittharuwa. Tiithi ole taapacenrye omukhomasa omukhaliheryaka mwaana ole ohimya itampi sawe. Yesu aahimmye so: “Mwan’owo ahahimerya wira: ‘Tithi, miyo komutthekela Muluku, kihotthekelani-tho nyuwo. Nkimphwanela-tho wihaniwa mwan’inyu’”.​—Luka 15:21.

Tiithi ole aahaaleela arumeyi awe wira: “Mwakuveke, murowele nlaya notepexa orera, munwarihe ola. Munwarihe anela mukathani n’ixapattho mwinawuni. Mmuruhe mwanyonpe òneneva, mmuhité. Nilyeke, nitthapeke, okhala wira mwan’ak’ola ahikhwa, vano òkhala-tho mukumi: ahirimela, vano òphwanyaneya”. Nto yaahipacerya “yolya y’omutthapela”.​—Luka 15:22-24.

Okathi owo, mwaana muulupale iira ori ene omatta. Omuhimyaka mwaano owo, Yesu alavunle so: “Ahihokolowela owani. Attamelaka vaté, ahìwa wìpiwa ni wìniwa. Ahimwihana murumeyi mmosá, khumukoha wira: ‘Exen’iyo?’ Owo ahimwakhula wira: ‘Muhim’anyu t’ohokolonwe. Atith’inyu àmwivela mwanyompe òneneva, mana àmwakhela-tho ari mukumi’. Owo ahinanariwa vanjene, ahinatthuna okela mpani. Vano-nto atithi awe yahikhuma orowa omwepesa. Nto owo ahiwakhula atithi awe wira: ‘Sovira iyakha sinjene  miyo korumelakani, kihivannye nulumo nanyu nnákhala nimosá: vano nyuwo khamunakivahe epuri, wira kikhomalihe nìra n’apatthani aka. Vano, ophiya wene mwan’iny’ule, ohononne muhakhu anyu n’athiyana, momwivela mwanyompe òneneva’”.​—Luka 15:25-30.

Tani yaalikana ni mwaana ole muulupale, yaawo yaanyoonyiwe mwaha wa Yesu waathokorerya saana atthu pure ni anatampi? Yaari alipa-oolepa ni aFarisi. Okhala wira yaaninvaanyiha Yesu mwaha woowaakhela saana anatampi, eyo yaahimwiiriha opaka nlikanyiho nla. Mwekeekhai, khula mutthu onivaanyiha othunku wa Muluku onoowerya wiixutta etthu ni nlikanyiho na Yesu.

Yesu aahimaliha nlikanyiho nawe olavulaka moota tiithi ole aamuxonttenle awe mwanawe muulupale, oriki: “Mwan’aka, nyuwo munkhala ni miyo mahiku othene. Muhakhu aka wothene ti wawinyu-tho. Vano, nahana okhomaliha nìra nahu n’utthapa, mana muhim’any’ula amanle okhwa, vano òkhala-tho mukumi: ahirimela, vano òphwanyaneya”.​—Luka 15:31, 32.​

Yesu khaahimmye ele mwaana muulupale aapanke awe. Masi nuumala Yesu okhwa ni ohihimuxiwa, “alipa a mukuttho anjene yahakhela wamini”. (Miteko 6:7) Woonasa wene, yaahela muhina atthu yaale yaiwale nlikanyiho na Yesu na mwaana aarimenle. Moohaanyiherya, atthu awo yaahuupuwela makhalelo aya, khuttharuwa ni otthikela wa Muluku.

Okhuma nihiku nne orowa ohoolo, awiixutti a Yesu yaahiixutta etthu ni nlikanyiho noovara murima. Etthu yoopacerya nniixutta ahu, ori ovikaniha okhala ni atthu a Muluku. Maana ninnikhapeleliwa ni Tiithi ihu oophenta, ohiya orimeela niphavelaka wiihakalaliha “elapo y’ottaiwene”.

Etthu ekina eniixutta ahu tiila: akhala wira ninnihiya ephiro ya Muluku, moowiiyeviha nihaana otthikela wa Tiithi ihu, wira nlokiherye wataana wahu ni yena.

Ninniixutta etthu, naweha ovirikana waakhanle eriyari ya tiithi aamwaakhenle ni omulevelela mwanawe ni moota mwaana muulupale aanyoonyiwe awe ohinaphavela omwaakhela saana muhima awe. Tthiri arumeyi a Muluku ahaana olevelelana ni waakhelana saana akhala wira ookhala aarimenle khuttharuwa ni onatthikela ‘empa ya Tiithi’ihu’. Tivonto, nihakalaleke vaavo munna “amanle okhwa, vano òkhala-tho mukumi” ni ‘ahirimenle, vano òphwanyaneya’.