Yesu aahikhuma oYerikho orowaka oBethania. Ole waari mukwaha woovila okhala wira ephiro ele yaahikhalana etturuuru ya ikiloomo 20. Weereryaniha ni ephareya, muttetthe wa oYerikho waari vasulu imeeturu 250, masi oBethania waari vathi imeeturu 610. Laazaro ni axirokorawe anli yaakhala muttetthe mwaamukhaani wa oBethania, yoowo waarakamenle ikiloomo 3 ni oYerusalemu, ni waari mpantta onikhuma nsuwa wa Mwaako Olivera.

AYuda anceene yaahirowa niira na Paasikha oYerusalemu. Awo yaahaakuvela ophiya wira “ererihiwe”, akhala wira yaahivara murutthu aahiiso yaahipaka etthu ya mwiikho. (Yohani 11:55; Mothakoni 9:6-10) Atthu anceene yaakuvenle ophiya yaahithukumana otemplo. Awo yaaniikoha akhala wira Yesu aamoorwa niira nne na Paasikha.​—Yohani 11:56.

Anceene yaahikhalana moonelo woovirikana voohimya sa Yesu. Ahooleli akina a etiini yaaphavela onvara Yesu wira amwiive. Tthiri yaahaaleela atthu akina wira yanweha Yesu yaaleele “wira envare”. (Yohani 11:57) Ahooleli ale yaaheererya omwiiva Yesu nuumala owo omuhihimuxa Laazaro. (Yohani 11:49-53) Tivonto atthu akina yoona wira Yesu khaarowa wiixooniherya wa atthu otheene.

Yesu aahiphiya oBethania namathanu ahalaka “mahiku mathanu na mosa nihinatthi nìra na Pásikha”. (Yohani 12:1) Nihiku nsya (Saabadu 8 a Nisani) naapacerya nsuwa nikelaka. Nihinatthi nihiku na Saabadu, Yesu aahaana ophiya opuro aarowa awe. Okhala wira, nlamulo na aYuda khinaamweemererya mutthu weetta mukwaha nihiku na Saabadu, nenno naapacerya makaaripi wa Namathanu mpakha makaaripi a Saabadu, Yesu khaakhumme oYerikho. Woonasa wene, Yesu aaronwe owannyawe Laazaro, ntoko iirale awe ikwaha sikina.

Simoni, yoowo nave aakhala oBethania aahimulattula Yesu ni atthu yaamutthara, omuhela muhina Laazaro wira ohiyu wa Saabadu yalye owannyawe. Simoni aahisuweliwa okhala “namakuttula”, woonasa wene mwaha wa makuttula avonihiwe awe ni Yesu.Okhala wira Martha aaniwaakhela aletto, owo aahipacerya waarumeela atthu ale. Masi Maria aawiriyana soowiixuttiha sa Yesu, nto vano aahipaka etthu yaakumihenrye omwaano-mwaano.

Maria aahitthukula murinki awe waari “makhura òwùnkhela, yihaniwa ‘nardo’”. (Yohani 12:3) Makhura ale yaari a faita yuulupale. Awo yaatumihiwa (idenaario 300) musurukhu yoowo aaliviwa namuteko eyaakha ntero! Vano Maria aahittikitthela mmuruni ni mmettoni mwa Yesu onapuputtha ni ikharari sawe. Wunkhela wa makhura ale waahisareya empa yotheene.

Awiixutti yaahinanariwa anakoha wira: “Makhur’ala anihononeliwa-ni?” (Marko 14:4) Vano Yuda Isikaryoti aahihimya wira: “Makhur’ala ahitumiheriwe-ni musurukhu miloko miloko  miraru [300], ekaweliwa alipa-òhawa?” (Yohani 12:5) Yuda khahiyo wira aawoonela othunku alipa-oohaawa. Maama owo aari natarawu ni aaniiya musurukhu waaheliwa mukaaxani mwa awiixutti.

Yesu aahimwaakiha Maria, ohimyaka wira: “Munimùkhulela-ni muthiyan’ola? Ola òkìrela miyo etthu yorera. Vakekhai alipa-òhawa mokhalana eriyari anyu mahiku othene: nto miyo khamunkikhalana mahiku othene. Ola òttihaka makhura erutthu aka, òrerihela ovithiwa. Kinohimeryani ekhweli wira: mapuro othene anrowaya olaleiwa ehapar’ila yorera, mulaponi mothene, ela-tho muthiyan’ola yiralyawe enrowa olaleiwa, ùpuweliwaka yola”.​—Matheyo 26:10-13.

Naahivira nihiku nimosa, Yesu nlelo ori ene oBethania ni atthu anceene yaahisuwela wira Yesu aari elapo ele. Nto aYuda anceene yaahirowa etthoko ya Simoni ohiya paahi wira yanwehe Yesu, masi-tho yaaphavela onweha Laazaro yoowo “Yesu amuhihimuxalyawe mokhwani”. (Yohani 12:9) Mukhulupale aanamukuttho aahivaha miruku wira iiviwe Yesu ni Laazaro. Ahooleli ale a etiini yuupuwela wira mwaha wa Laazaro ohihimuxiwa, atthu anceene yaanimwaamini Yesu. Tthiri ahooleli ale a etiini yaari ootakhala!