Nlelo Yesu iira ori ene oYerusalemu Niira na Maxaxa. Yesu aahisiveliwa vanceene okhala wira “atthu anjene a muttitthi uwo yahimwamini”. Masi ahooleli a itiini khiyaasiveliwe. Awo yaahaaruma maguarda, yaawo yaari ntoko mapoliisia a etiini wira yanvare Yesu. (Yohani 7:31, 32) Nnaamwi vaari siiso, Yesu khiipinthe.

Owo aahivikaniha owiixuttiha atthu oYerusalemu, oriki: “Nlelo kinokhala ni nyuwo okathi vakhani: numalá, kinohokolowela wa Yole okirumme. Nyuwo munokiphavela muhikiphwanyé: mana iwo kinrowaka, nyuwo khamunwerya ophiya-wo“. (Yohani 7:33, 34) Okhala wira aYuda ale khiyaiwexenxe, awo yaanikohana wira: “Ola ontthuna orowa vai, hiyo ohinweryahu omphwanya? Khino ontthuna orowa w’aYuda amwarenle mmalaponi n’uwixuttiha amalapo? Anihimya exeni molumo ahimmyawe wira: ‘Nyuwo munokiphavela, muhikiphwanyé, mana iwo kinrowaka, nyuwo khamunwerya ophiya-wo’?” (Yohani 7:35, 36) Yesu aalavula sa okhwa ni ohihimuxiwa wawe wira orowe wiirimu, maana awanani awe khiyaawerya omutthara opuro owo.

Vano naahiphiya nihiku 7 na niira na maxaxa. Nto khula voosiisu, namukuttho aaniyiiherya maasi yaarikiwa Ntthiya na oSilowe, wira akhooweleke waltari wa etemplo. Woonasa wene, owuupuxeryaka yoolema ele, Yesu aahilavula orunyaka wira: “Akhalá mutthu ovoliwe ntthona, akirwele miyo; awuryé ole onikamini. ‘Mmurimani mwa mutthu yowo, munophattuwa miró sa màsi makumi’”.​—Yohani 7:37, 38.

Yesu aahimya ele yaarowa wiiraneya nuumala awiixutti awe woottihiwa ni munepa wootteela wira akhalane nlipelelo na orowa wiirimu. Eyo yaarowa wiiraneya nihiku na Pentekoositi, mwaakha waattharelana nuumala Yesu wiiviwa. Nihiku nne awiixutti oowoottihiwa ni munepa  wootteela yaahipacerya waalaleerya atthu ekeekhai. Nto maasi anivaha okumi yaahipacerya okhoowa.

Nuumala atthu ale wiiwa masu a Yesu, awo yaahimmye wira: “Vekekhai, ola ti profeta yole onihimmwa”, woonasa wene, amuhimyaka profeta muulupale onvikana Moise. Akina yaahimya wira: “Ola Kristú!” Masi akina-tho yaahimya wira: “Khino Kristu ontthuna okhuma oGalileyá? Tthiri Solempwa sinihimya wira Kristu ontthuna okhala a nloko na Davidi, ni wira ontthuna okhuma oBethelehemu, muttetthe wa Davidi”.​—Yohani 7:40-42.

Tthiri, muttitthi ole waahikawanyeya. Nnaamwi akina yaaphavela onvara Yesu khuuvo mutthu anvanre. Okathi maguarda yaatthikenle aya wa akhulupale a itiini ahinvanre Yesu, mukhulupale aanamukuttho ni aFarisi yaahaakoha wira: “Muhimuruhenle-ni?” Maguarda ale yaahaakhula wira: “Khavo otonko olavula ntoko mulopwan’owo!” Ananariwe ene, ahooleli a itiini yaahipacerya waanyohola, ariki: “Nave-tho nyuwo muhotothiwa? Khino òkhala mukhulupale walá nFarisi omwaminni yowo? Nto atthu ale ahisuwenle Ikanó t’òthanyeya”.​—Yohani 7:45-49.

Okathi ole, nFarisi Nikodemo, yoowo aari mmosa a makhulupale ooSineedrio, aahimwaakiha Yesu. Iyaakha piili nnimeya saavinre, Nikodemo aahirowa okumana ni Yesu ohiyu ooniheryaka omwaamini wawe. Vano Nikodemo aahihimya wira: “Khino Ikano sahu sinimutthukwela mutthu ahipajenrye toko wiwiwa n’usuweliwa sìryalyawe?” Awo yaahiixaakiha ahimyaka wira: “Ni nyuwo-tho mwá muGalileya? Musomeke orattene: musuwele wira khavo profeta onkhuma oGalileya!”​—Yohani 7:51, 52.

Soolempwa khasinihimya mooluluwanya wira ookhala profeta aakhumme oGalileya. Hata vari siiso, Nuulumo na Muluku ninnihimya wira Kristu aarowa okhuma oGalileya. Nave waahihimmwa vahinatthi wira “warya wulupale” waarowa wooniwa maloko a ‘oGalileya’. (Yesaya 8:23; 9:1; Matheyo 4:13-17) Ntoko saahimmwale aya vahinatthi, Yesu aayariwe oBethelehemu, nave aari osuulu wa Davidi. Nnaamwi aFarisi yaasuwela ela, woonasa wene ti yaawo yaamwara-mwanrye muupuwelo woohiloka, atthu yaarina aya voohimya sa Yesu.