Yesu aahirowa oYerusalemu niira na Otthapela Empa ya Muluku (aahiiso Hanuka). Niira nne naari na otthikela otthapeliwa wa empa ya Muluku. Eseekulu emosa yaavinre, Mwene a wAsiria Antíoco IV Epifânio aahimuteka altari nipuro na altari a Muluku mutemplo. Muhoolo mwaya, anamwane a namukuttho muYuda yaahikuxa muttetthe wa oYerusalemu khunvahererya etemplo Yehova. Okhuma vaavale, naanipakiwa niira na otthapela nihiku 25 na mweeri wa Kisilevi, yoowo onipacerya eriyari ya Novembro ni Dezembro.

Waari eyiita ni waaniriirya vanceene. Yesu aaneetta mutemplo mpantta wa niphiryo na Salomoni. Opuro ole, aYuda yaahimurukurerya anahimya wira: “Munnikhuwa mpakha lini? Nyuwo mwàri Kristu, munihimerye orattene, muhinikhuwé”. (Yohani 10:22-24) Yesu aarowa owaakhula sai? Owo aawaakhunle so: “Miyo kihohimeryani: nyuwo khuhamini”. Yesu khaaleelale mooluluwanya wira ti Kristu, ntoko siisaale aamuleelale awe mooluluwanya muthiyana muSamariya aavanelana awe weehimeni. (Yohani 4:25, 26) Masi aahihimya omutthu awe vaavo aalenle awe wira: “Abrahamu ahinatthi okhala, miyo t’ule onkhala”.​—Yohani 8:58.

Yesu aaphavela wira atthu ale asuweleke mmansayaru wira owo ti Kristu, alikanyihaka itthu aapaka awe ni iye saahimmwale vahinatthi wira Kristu ampaka. Ti maana aya aaleelale awe awiixutti awe wira ahimuleele mutthu wira owo aari Mesiya. Masi, okathi ole aahaaleela aYuda ale yanvaanyiha wira: “Miteko sinvaraka n’uwerya w’Atithi, sinnikikhalela onamona. Nto nyuwo khamunamini”.​—Yohani 10:25, 26.

Xeeni yahaakupali aya wira Yesu ti Kristu? Yesu aahihimya wira: “Nto nyuwo khamunamini, okhala wira khamuhiyó ipwittipwitthi saka. Ipwittipwitthi saka sinnìwa nsu naka: miyo kinnisuwela seiyo, n’iyo sinnikitthara. Miyo kinnivaha seiyo ekumi yohimala: tivó khasinrimela-tho. Khavo onrowa okakha seiyo mmatatani mwaka. Atithi akivahale ipwittipwitth’iya t’alupalexa wavikana atthu othene”. Nuumala-vo, Yesu aahaaleela wataana wooloka aarina awe ni Tiithi awe, oriki: “Miyo n’Atithi nri mmosáru”. (Yohani 10:26-30) Okathi ole Yesu aari valaponi, masi Tiithi awe aari wiirimu. Nto Yesu khaaphavela ohimya wira owo ni Tiithi awe mutthu mmosaru. Masi aaphavela ohimya wira arina yoolakela emosaru ni yaari oowiiraana.

Moolumo a Yesu yaahiwiiriha aYuda onanariwa, mpakha okuxa maluku wira amwiive. Masi moohoova Yesu aahihimya wira: “Miyo kowoniheryani miteko sinjene sorera, sinrwa w’Atithi: mwa miteko seiyo t’uvi ontthunanyu okivonyerya maluku?” Awo yaahimwaakhula wira: “Hiyo khinnovonyeryani maluku mwaha wa muteko anyu worera, masi mwahá w’onveha Muluku: tthiri nyuwo, . . . munnìpaka Muluku”. (Yohani 10:31-33) Yesu khonahimye wira aari muluku, nto xeeni yaamootherya aya?

Tthiri, aYuda ale yaanikupali wira owerya Yesu aahimya awe wira aahikhalana waari wa Muluku. Mwa ntakiheryo, olavulaka sa “ipwittipwitthi” Yesu aahimmye wira: “Miyo kinnivaha seiyo ekumi yohimala”, etthu yeeyo pinaatamu ohinwerya awe opaka. (Yohani 10:28) AYuda ale khiyaacalenle okathi Yesu aahimmye awe oratteene wira aahivahiwa owerya ni Tiithi awe.

Aakhulaka ovaanyiha waya, Yesu aahimmye so: “Solempwa sanyu [Esalimo 82:6] sinihimya wira: ‘Miyo kohimya wira: Nyuwo mw’àmuluku’? . . . Vakhalá wira Muluku ahiwihana amuluku atthu alalèriwe molumo awe, votepa miyo: Muluku òkireriha, khukiruma orwa molumwenkuni-mu. Nto nyuwo munihimerya-ni wira miyo kininveha Muluku, kìraka: ‘Miyo ki Mwana a Muluku’?”​—Yohani 10:34-36.

Tthiri Soolempwa sinnaahimya apinaatamu oohixariya okhala ‘amuluku’. Nto xeeni aYuda yanvaha aya nthowa Yesu mwaha woohimya  wira aari “Mwana a Muluku”? Yesu aahihimya etthu wira aakupalihe oriki: “Miyo kahivareke miteko s’Atithi aka, muhikaminiki. Nto kavaraka seiyo, mwahikaminiki miyo kimwanene, mukupaliki mano miteko saka. Siso munimona ni munosuwelexa wira Atithi ari ni miyo ni wira miyo kiri n’Atithi”.​—Yohani 10:37, 38.

AYuda ale yaahiphavela-tho onvara Yesu, masi owo aahitthyawa. Nuumala-vo, Yesu aahirowa oYerusalemu ni aahilapuwa Muro Yordani orowaka muttetthe Yohani aapacenrye awe waabatiza atthu iyaakha xexe saavinre. Woonasa wene, muttetthe ole waahikhuveela mpantta wa okuusini wa Ephareya ya oGalileya.

Muttitthi waahirowa opuro aari Yesu khuhimya wira: “Yohani khirale sotikiniha: vano sothene Yohani uwo sahimyawe sa Yes’ula ti s’ekekhai”. (Yohani 10:41) Tthiri, aYuda anceene yaahimwaamini Yesu.