Yesu nlelo aari oYerusalemu nihiku na Saabadu. Vaavo Yesu ni awiixutti awe yaari aya opooma, yaahimoona nasimola aayariwe ohoonaka. Awiixutti ale yaahimukoha Yesu wira: “Pwiya, ola ahalaka oyariwa ohònene, otthenke t’uvi? Otthenke mmansawe, walá atthenke alipa amuyanre?”​—Yohani 9:2.

Awiixutti yaahisuwela wira mulopwana ole khaarina erooho ehinooneya, yeeyo yaakhanle ohinatthi oyariwa. Masi yaaphavela osuwela akhala wira mutthu onnittheka ori ene mmirimani mwa amamawe. Yesu aawaakhunle wira: “Ola khatthenke, hatá alipa amuyanre khatthenke. Nto ohona iwo okhumelenle wira mwa mutth’ula sòneye miteko sa Muluku”. (Yohani 9:3) Nnakhala mulopwana ole aahiiso anamuyari awe, khuuvo aarina nthowa mwaha wooyariwa ohoonaka. Maana mwaha wa etampi ya Adamu, apinaatamu aniyariwa oottheka ene, nto annirakala. Masi ohoona wa mulopwana ole waahinvaha eparakha Yesu wira ooniherye miteko sa Muluku. Ntoko siisaale aapenunxa awe atthu yaawereiwa.

Yesu aahooniherya otthuneya waya ovara mowaakuveya miteko iye oriki: “Othana sisa, kihana ovara miteko s’Atithi akirumme. Ohiyu onnattamela, ohinweryawe mutthu ovara muteko. Okathi wothene onkhalaka molumwenkuni, miyo ki warya w’olumwenku”. (Yohani 9:4, 5) Moohipisa, nuumala Yesu okhwa aarowa okhala mweepiphini aahiiso mmahiye ahaarowa awe owerya opaka etthu. Masi, okathi Yesu aari awe mukumi, owo aari muthuko wa olumwenku.

Niireke Yesu aamumpenuxa mulopwana ole? Akhala wira ampake eyo, moota xeeni? Yesu aahisenela vathi eetheya etthaya. Aahikuxa etthaya eyo khuhela mmaithoni mwa mulopwana ole ahoona, omwiirela wira: ‘Rowani, mwakuse vatthiyani n’oSilowé’. (Yohani 9:7) Nto mulopwana ole aahirowa, khukusa onapacerya woona! Mwekeekhai mulopwana ole aahitthapa vanceene!

Okhala wira ale aattamanne awe ni atthu akina yaahisuwela wira aayariwe ohoonaka, yaahitikinihiwa. Nto yaanikohana wira: “Ola khahiyó yole akilathi anavekela esimola?” Akina yaahimya wira “Ti yowo!” Nave-tho, akina yaahimya wira: “Nnari! Onolikanano”. Mulopwana ole aahiwaakhula wira: “Ti yomi!”​—Yohani 9:8, 9.

Vano yaahimukoha wira: “Nanso maitho anyu atthukunwe sai?” Owo aahaakhula wira: “Mulopwan’ole, onìhaniwa Yesu, etheiye etthaya, akisirikela maitho, khukihimerya wira: ‘Rowani oSilowé, mwakuse’. Miyo kahirowa, kahikusa, khupajerya wona”. Nuumala-vo, yaahimukoha wira: “Owo ori vai?” Nasimola ole aahiwaakhula wira: “Kahiki!”​—Yohani 9:10-12.

Atthu yaahimuroiha mulopwana ole opuro yaari aya aFarisi, maana awo yaaphavela osuwela  moota aatthukuliwa awe maitho awe. Nto aahaaleela wira: ‘Owo etheiye etthaya, akisirikela maitho: vano miyo n’okusa, khíyona’. AFarisi ale yaahaana ohakalala mwaha woowi nasimola ole aahivonihiwa. Masi aFarisi akina yaahimunyohola ariki: “Mulopwan’owo khahiyó mutthu a Muluku, okhala wira khanttittimiha nihiku na Sábadu”. Nave akina yaahimya wira: “Àri mulipa-òttheka, awerya sai wira mitikiniho sisa?” (Yohani 9:15, 16) Tthiri aFarisi ale yaahikawanyeya.

Okhala wira mwaha ole waahaaxankiha, awo yaahimukoha mulopwana ole aavonihiwe wira: “Khi weyo, onihimya-ni sa yole òtthukunle maitho?” Okhala wira aahimukupali Yesu, owo aahaakhula wira: “Ti profeta”.​—Yohani 9:17.

AYuda yaahikhootta okupali eyo. Awo yuupuwela wira mulopwana ole aaroovaanela ni Yesu wira aawokeke atthu. Vano yaahoona wira enamuna yooloka ya ophuka mwaha ole waari waakoha anamuyari a nasimola ole, wira asuwele akhala wira tthiri aayariwe ohoonaka.