Nuumala Yesu othatuwa ni ompenuxa mmiravo aavariwe ni nlaikha nootakhala muttetthe wa oKesareya wa oFilipi, Yesu aahirowa oKafarnawu. Owo aaronwe ni awiixutti awe paahi ohisuweliwaka ni atthu akina. Maana “khaphavela osuweliwa varyawe”. (Marko 9:30) Opaka eyo, waahimukhaliherya waalakiherya awiixutti awe voohimya sa okhwa wawe ni muteko yaarowa aya ovaraka. Yesu aalenle wira: “Mwana a mutthu onrowa ovahereriwa mmatatani mw’atthu. Awo anrowa omwiva: vano mmurottoni mwaya onohihimuwa mokhwani”.​—Matheyo 17:22, 23.

Awiixutti a Yesu yaanisuwela saana mwaha ola. Maana Yesu aahilavula mukwaha mukina wira aarowa wiiviwa. Nave Pedru khaakupali wira eyo yaamwiiraneya. (Matheyo 16:21, 22) Nave-tho, arummwa araru yaahimoona Yesu othatunwe ene ni yaahiiwa olavuliwaka “okhwa” wa Yesu. (Luka 9:31) Vano “murima waharipa vanjene”, mwaha wa ele Yesu aalavunle awe. Nave khayiiwexenxe saana moolumo awe. (Matheyo 17:23) Hata vari siiso, yaahoovelela omukoha etthu.

Nave yaahirowa oKafarnawu, elapo yaakhuma aya arummwa anceene ni yahaareere aya olaleerya. Elapo ele, alopwana yaaliviha mpoosito yaahimwaattamela Pedru. Woonasa wene, aphavelaka omootherya Yesu wira khaaliva mpoosito, awo yaahimukoha wira: “Mwixuttihi anyu khanliva mpósito [wa otemplo]?”​—Matheyo 17:24.

Pedru aakhunle wira “Onníliva!” Nuumala otthikela owaani, Yesu aahisuwela ele yiiraneyale ni Pedru. Tivonto, ohinatthi Pedru ohimya etthu, Yesu aahimukoha wira: “Simoni, munòna sai? Mamwene a mulaponi-mu anakhela mpósito walá múlutha w’awani? Anakhela w’atthu aya walá w’amalapo?” Pedru aahaakhula wira: “W’amalapo”. Vano Yesu aahimuleela wira: “Vari siso, atthu aya khamphwanela oliva!”​—Matheyo 17:25, 26.

Tiithi awe Yesu tori Mwene a olumwenku wotheene ni ti Yoowo aakokhoreliwa otemplo.Nto Mwaana a Muluku khaatthuneya oliva mpoosito otemplo. Tivonto Yesu aahimmye wira: “Wira nihatikinihé atthu ale, murowé ophareya, mwamurihele jolo mmàsini. Ehopa empajeryanyu olowa [owatthula], nvare, mwathamihe. Mwano mwaya munophwanya musurukhu [waari musurukhu wa eparatha aahiiso edrakama] omphiyerya oliva mpósito aka ni wawinyu. Mukuxe, mwalive mpósito ahu”.​—Matheyo 17:27.

Moohipisa awiixutti yaahikhala vamosa, nto yaahimukoha Yesu wira ti pani aarowa okhala muulupale Moomweneni. Wira ohivinre okathi munceene okhuma vaavale yoovale aya omukoha Yesu voohimya sa okhwa wawe. Yesu aahisuwela etthu yuupuwela aya. Okathi yaarowa aya oKafarnawu arummwa ale yaahanle ottuli, nto yaatoko onyakulihana voohimya sa ole aari muulupale. Tivonto Yesu aakonhe awe wira: “Nyuwo mwavanyihana-ni mphironi?” (Marko 9:33) Awiixutti ale khiyaakhunle etthu, okhala wira yaahivaanyihana voohimya sa ole aari muulupale. Wanikisa waya, yooniheryaka etthu yaawiiriha ovaanyihana mphironi yaahimukoha Yesu wira: “Mulupalexa Momweneni wa wirimu t’ani?”​—Matheyo 18:1.

Nto waari vooriipiha murima awiixutti ale onyakulihana, okhala wira saahivira iyaakha saattamela tthaaru anwiriyanaka ni awehaka miteko sa Yesu. Masi awo yaari atthu oohimalela.  Nave yannuwale eriyari ya atthu a itiini, yaawo yaavaha efaita yuulupale okhulupale. Ohiya-vo, Pedru iira omwiiwale ene niinano-ru Yesu omuleiheryaka wira aamunvaha “mihulelo” sa Omwene. Niireke Pedru iixoona okhala muulupalexa? Yakobo ni Yohani yaahikhalana moonelo mmosaru, maana yaahinweha Yesu othatunwe ene omwaako.

Nnaamwi vaari siiso, Yesu aahaakhaliherya. Owo aahimwiitthana mwaana, khumpweha eriyari aya, onaaleela wira: “Mwahirukunuxe mirima sanyu, mwahikhaleke ntoko anamwane, khamunkela Momweneni wa wirimu. Tthiri, ole onìyeviha, aìkhalihaka ntoko mwanamwan’ola, owo t’ukhanle mulupalexa Momweneni wa wirimu. Vano, ole onimwakhela mwanamwane ntoko sula mwa nsina naka onikakhela yomi”.​—Matheyo 18:3-5.

Tthiri ela enamuna ya wiixuttiha yoovara murima! Yesu khaananariwe ni awiixutti awe ni khaahimmye okhala ananrima. Ohiya-vo, aahiwiixuttiha etthu yuulupale. Maana anamwane khaninlela nipuro nuulupale, niire so, okhulupale. Yesu aaphavela wira awiixutti awe akhalaneke moonelo ntoko wa anamwane aahiiso yiiyeviheke. Nto Yesu aahimaliha mwaha ole oriki: “Tthiri ule ori mwamukhanixa mwa nyuwo othene, yowo t’uri mulupale”.​—Luka 9:48.